Псалмы Давыда пророка и царя
Давыда пророка и царя пѣснь
Каѳисма, 1.
Псаломъ Давыдовъ, 1.
Блаженъ мужь, иже нейде на совѣтъ нечестивыхъ, и на пути грѣшныхъ неста, и на сѣдaлищи губитель не сѣде. Но въ законѣ господни воля его, и въ законѣ его поучится день и нощь. И будетъ яко древо саждено при исходищихъ водъ, еже плодъ свой дaстъ во время свое. И листъ его не отпадетъ, и вся елика аще творитъ, успѣетъ. Не тaко нечестивіи не тaко, но яко прaхъ егоже возметaетъ вѣтръ от лица земли. Сего рaди не воскрестнутъ нечестивіи на судъ, ни грѣшницы въ совѣтъ прaведныхъ. Яко свѣсть господь путь прaведныхъ, и путь нечестивыхъ погибнетъ.
Псаломъ Давыдовъ, 2.
Вскую шатaшася языцы, и людіе поучишася тщетнымъ. Предстaша царіе земстіи. И князи собрaшася вкупѣ, нa господа и на христа его. Расторгнемъ узы ихъ, и отвержемъ от нaсъ иго ихъ. Живыи нa небесѣхъ посмѣется имъ, и господь поругaется имъ. Тогда возглаголетъ к нимъ гнѣвомъ своимъ, и яростію своею смутитъ я. Азъ же постaвленъ есмь царь от него. над сиономъ горою святою его, возвѣщaя повелѣніе господне. Господь рече ко мнѣ, сынъ мой еси ты, азъ днесь родихъ тя. Проси от мене, и дaмъ ти языки достояніе твое, и одержaніе твое концы земли. Упасеши я пaлицею желѣзною, яко сосуды скудельнича сокрушиши я. И нынѣ цaріе разумѣйте, накажитеся вси судящіи земли. Работайте господеви со страхомъ, и рaдуйтеся ему съ трепетомъ. Пріимѣте наказaніе, да некогда прогнѣвается господь, и погибнете от пути прaведнаго, егда возгорится вскорѣ ярость его, блажени вси надѣющіися нaнь.
Псаломъ Давыдовъ, 3.
Господи, чтося умножиша стужaющіи ми; мнози востaютъ на мя. Мнози глаголютъ души моей, нѣсть спасенія ему о бозѣ его. Ты же господи заступникъ мой еси, слaва моя, и вознося главу мою. Глaсомъ моимъ ко господу возвaхъ, и услыша мя от горы святыя своея. Азъ уснухъ и спaхъ востaхъ, яко господь заступитъ мя. Не убоюся от темъ людей, окрестъ напaдающихъ на мя. воскрестни господи, спаси мя боже мой. Яко ты порази вся враждующія ми всуе, зубы грѣшникомъ сокрушилъ еси. Господне есть спасеніе, и нa людехъ твоихъ благословеніе твое.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 4.
Внегда возвaхъ, услыша мя боже прaвды моея, въ скорби разпространилъ мя еси. Ущедри мя, и услыши молитву мою. Сынове человечестіи, доколѣ тяжкосердіи; вскую любите суетная, и ищете лжи; И увѣдите яко удиви господь преподобнаго своего, господь услышитъ мя внегда взову к нему. Гнѣвайтеся, и не согрѣшaйте, яже глаголете въ сердцыхъ вaшихъ, на ложихъ вaшихъ умилитеся. Пожрите жертву прaвдѣ, и уповaйте нa господа. мнози глаголютъ, кто явитъ нaмъ благaя; Знaменася на нaсъ свѣтъ лица твоего господи, дaлъ еси веселіе въ сердцы моемъ. От плода пшеницы, вина, и елея своего умножишася. Въ мирѣ вкупѣ усну и почію. Яко ты господи единаго на уповaніе вселилъ мя еси.
Псаломъ Давыдовъ, 5.
Глаголы моя внуши господи, разумѣй звaніе мое. Воньми глaсъ молитвы моея, царю мой и боже мой. Яко к тебѣ помолюся господи, заутра услыши глaсъ мой. Заутра предстaну ти и узриши мя, яко богъ не хотяи беззаконіе, ты еси. Не пріидетъ к тебѣ лукaвнуяи, ни пребудутъ же законопреступницы, пред очима твоима. Возненавидѣлъ еси вся творящія беззаконіе, погубиши вся глаголющія лжу. Мужа крови и льстива гнушaется господь. Азъ же множествомъ милости твоея, вниду въ домъ твой, поклонъюся къ церкви святѣй твоей въ стрaсѣ твоемъ. Господи, настaви мя прaвдою твоею, врaгъ моихъ рaди испрaви пред собою путь мой. Яко нѣсть во устѣхъ ихъ истины, сердце ихъ суетно. Гробъ отверстъ гортaнь ихъ, языки своими льщaху, суди имъ боже. Да отпадутъ от мыслей своихъ, по множеству нечестія ихъ изрини я, яко прогнѣваша тя господи. И возвеселятся вси уповaющіи на тя, во вѣки возрaдуются, и вселишися въ нихъ. И похвaлятся о тебѣ любящіи имя твое, яко ты благословиши прaведника. Господи яко оружіемъ благоволенія вѣнчaлъ еси нaсъ.
Псаломъ Давыдовъ, 6.
Господи, да не яростію твоею обличиши мене, ниже гнѣвомъ твоимъ покaжеши мене. Помилуй мя господи, яко немощенъ есмь. исцѣли мя господи, яко смутишася кости моя. И душа моя смутися зѣло, и ты господи доколѣ; Обрати господи изми душу мою, спаси мя рaди милости твоея. Яко нѣсть въ смерти поминaяи тебе, во адѣ же кто исповѣстьтися. Утрудихся воздыхaніемъ моимъ, измыю на всяку нощь ложе мое, слезaми моими постелю мою омочу. Смутися от ярости око мое, обетшaхъ во всѣхъ вразѣхъ моихъ. Отступите от мене вси творящіи беззаконіе, яко услыша господь глaсъ плaча моего. Услыша господь моленіе мое, господь молитву мою пріятъ. Да постыдятся и смятутся вси врази мои, возвратятся и устыдятся зѣло вскорѣ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 7.
Господи боже мой на тя уповaхъ, спаси мя от всѣхъ гонящихъ мя, и избaви мя. Да некогда похититъ яко левъ душу мою, не сущу избавляющу ниже спасaющу. Господи боже мой аще сотворихъ се, аще есть не прaвда въ руку моею. Аще воздaхъ воздающимъ ми зла, да отпаду убо от врaгъ моихъ тощь. Да поженетъ убо врaгъ душу мою, и постигнетъ, и поперетъ въ земли животъ мой, и слaву мою въ персть вселитъ. Воскресни господи гнѣвомъ твоимъ, вознесися въ концыхъ врaгъ твоихъ. И востaни господи боже мой повелѣніемъ имже заповѣда, и сонмъ людей обыдетъ тя. И о томъ на высоту обратися. господь судитъ людемъ. Суди ми господи по прaвдѣ моей, и по не злобѣ моей на мя. Да скончaется злоба грѣшныхъ, и испрaвиши прaведнаго, испытaяи сердца и утробы боже. Прaведна помощь моя от бога, спасaющаго прaвыя сердцемъ. Богъ судитель прaведенъ, и крѣпокъ, и долготерпѣливъ, и не гнѣвъ наводя на всякъ день. Аще не обратитеся, оружіе свое очиститъ, лукъ свой напряже, и уготова и. И въ немъ уготова сосуды смертныя, стрѣлы своя съ горящими содѣла. Се болѣ не прaвду, зачaтъ болѣзнь, и роди беззаконіе. Ровъ изры, и ископа и, впадется въ яму юже содѣла. Обратится болѣзнь его на главу его, и на верхъ его не прaвда его снидетъ. Исповѣмся господеви по прaвдѣ его, и пою имени господню вышнему.
Псаломъ Давыдовъ, 8.
Господи господь нaшъ, яко чудно имя твое по всей земли. Яко взятся велелѣпота твоя превыше небесъ. Изо устъ младенецъ и ссущихъ свершилъ еси хвалу, врaгъ твоихъ рaди, разрушиши врага и местника. Яко узрю небеса, дѣла перстъ твоихъ, луну и звѣзды, яже ты основа. Что есть человѣкъ яко помниши и, или сынъ человечь, яко посѣщaеши и. Умaлилъ еси его мaлымъ чимъ от ангелъ, слaвою и честію вѣнчaлъ еси его, и постaвилъ еси его над дѣлы руку твоею. Вся покорилъ еси под нозѣ его овца и волы вся, ещеже и скоты польскія. Птицы небесныя, рыбы морскія, преходящія стезя морскія. Господи господь нaшъ, яко чудно имя твое по всей земли.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 2.
Псаломъ Давыдовъ, 9.
Исповѣмся тебѣ господи всѣмъ сердцемъ моимъ, повѣмъ вся чудеса твоя. Возрaдуюся и возвеселюся о тебѣ, пою имени твоему вышніи. Внегда возвратитися врагу моему вспять, изнемогутъ и погибнутъ от лица твоего. Яко сотворилъ еси судъ мой, и прю мою. Сѣлъ еси на престолѣ судяи прaвду, запретилъ еси языкомъ, и погибе нечестивыи, имя его потребилъ еси въ вѣкъ, и въ вѣкъ вѣка. Врагу оскудѣша оружія въ конецъ, и грaды разрушилъ еси. Погибе пaмять его съ шумомъ, и господь пребывaетъ во вѣки. Уготова на судъ престолъ свой, и той судитъ вселеннѣй въ прaвду. Судитъ людемъ въ прaвду. И бысть господь прибѣжище убогому, помощникъ во благо время въ печaлѣхъ. И да уповaютъ на тя знaющіи имя твое, яко не остaвилъ еси взыскaющихъ тя господи. Пойте господеви живущему въ сионѣ, возвѣстите во языцѣхъ начинaнія его. Яко взыскaяи крови ихъ помяну, не забы звaнія убогихъ. Помилуй мя господи, виждь смиреніе мое от врaгъ моихъ. Возносяи мя от врaтъ смертныхъ, яко да возвѣщу вся хвалы твоя, во вратѣхъ дщери сионя. Возрaдуемся о спасеніи твоемъ, углѣбоша языцы въ пaгубѣ, юже сотвориша. Въ сѣти сей юже скрыша, увязе нога ихъ. Знaемъ есть господь судьбы творя, въ дѣлѣхъ руку своею увязе грѣшникъ. Да возвратятся грѣшницы во адъ, вси языцы забывaющіи бога. Яко не до конца забвенъ будетъ нищіи, терпѣніе убогихъ не погибнетъ до конца. Воскресни господи, да не крѣпится человекъ. да судятся языцы пред тобою. Постaви господи законодaвца над ними, да разумѣютъ языцы, яко человецы суть. Въскую господи отстоя далече; презриши во благо время въ печaлѣхъ. Въ гордости нечестиваго возгарaется нищіи, увязaютъ въ совѣтѣхъ, яже помышляютъ. Яко хвалимь есть грѣшныи въ похотѣхъ души своея, и обидяи благословимъ. Раздражи господа грѣшныи, по множеству гнѣва своего не взыщетъ. Нѣсть бога пред нимъ, оскверняются путіе его на всяко время. Отемлются судьбы твоя от лица его. всѣмъ врагомъ своимъ одолѣетъ. Рече бо въ сердцы своемъ, не подвижуся от рода въ родъ без зла. Емуже клятвы уста его полна суть, и горести и льсти, под языкомъ его трудъ и болѣзнь. Присѣдитъ въ лaятелехъ съ богaтыми, въ тaйныхъ убити неповиннаго. Очи его, на нищаго призирaетѣ, ловитъ въ тaйныхъ, яко левъ во огрaдѣ своей. Ловитъ восхитити убогаго, восхитити нищаго внегда привлещи и. Въ сѣти своей смиритъ и, преклонится и падетъ, егда удолѣетъ убогимъ. Рече бо въ сердцы своемъ, забы богъ, отврати лице свое, да не видитъ до конца. Воскресни господи боже мой, да вознесется рука твоя, не забуди нищихъ своихъ до конца. Чесо рaди прогнѣва нечестивыи бога; рече бо въ сердцы своемъ, не взыщетъ. Видиши, яко ты болѣзнь и ярость смотряеши, да преданъ будетъ въ руцѣ твои. Тебѣ остaвленъ есть нищіи, сиру ты буди помощникъ. Сокруши мышцу грѣшному и лукaвому. взыщется грѣхъ его, и не обрящется. Господь царь во вѣки, и въ вѣкъ вѣка. погибнете языцы от земли его. Желaніе убогихъ услышалъ еси господи, уготованіе сердца ихъ внятъ ухо твое. Суди сиру и смирену, да не приложитъ потомъ величaтися человѣкъ на земли.
Псаломъ Давыдовъ, 10.
Нa господа уповaхъ, кaко речетъ души моей, превитaй по горaмъ яко птица. Яко се грѣшницы налякоша лукъ, уготоваша стрѣлы въ тулѣ, сострѣляти во мрацѣ прaвыя сердцемъ. Зане яже ты соверши, они разрушиша, прaведникъ же что сотвори; господь въ церкви святѣй своей. Господь нa небеси престолъ его. Очи его на нищаго призирaетѣ, вѣжди его испытaетѣ сыны человеческія. Господь испытaетъ прaведнаго, и нечестиваго. любяи же не прaвду, ненавидитъ свою душу. Одождитъ на грѣшники сѣти, огнь и жупелъ и духъ буренъ, чaсть чaша ихъ. Яко прaведенъ господь, и прaвду возлюби, прaвая видѣ лице его.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 11.
Спаси мя господи, яко оскудѣ преподобныи, яко умaлишася истины от сыновъ человеческихъ. Суетная глагола кождо ко искренему своему. устны льстивыя въ сердцы, и въ сердцы глаголаша злaя. Потребитъ господь вся устны льстивыя, языкъ велерѣчивъ. Рекшая, языкъ нaшъ возвеличимъ. устны нaша при нaсъ суть, кто нaмъ господь есть; Стрaсти рaди нищихъ и воздыхaнія убогихъ, нынѣ воскрестну глаголетъ господь. Положуся во спасеніе, не обинуяся о немъ. Словеса господня, словеса чиста. сребро раждьжено искушено земли, очищено седмерицею. Ты господи сохраниши ны и соблюдеши ны от рода сего, и во вѣки. Окрестъ нечестивіи ходятъ, по высотѣ твоей умножилъ еси сыны человеческія.
Псаломъ Давыдовъ, 12.
Доколѣ господи забудеши мя до конца; доколѣ отвращaеши лице свое от мене; Доколѣ положу совѣты въ души моей, болѣзни въ сердцы моемъ день и нощь; Доколѣ вознесется врaгъ мой на мя. призри и услыши мя господи боже мой. Просвѣти очи мои, да некогда усну въ смерть, да некогда речетъ врaгъ мой укрѣпихся нaнь. Стужaющіи ми возрaдуются, аще ся подвижу, азъ же на милость твою уповaхъ. Возрaдуется сердце мое, о спасеніи твоемъ. воспою господеви благодѣявшему мнѣ, и пою имени господню вышнему.
Псаломъ Давыдовъ, 13.
Рече безуменъ въ сердцы своемъ, нѣсть богъ. Растлѣша и омразишася въ начинaніихъ, нѣсть творяи благостыни. Господь съ небесе приниче нa сыны человеческія, видѣти, аще есть разумѣвaяи, или взыскaяи бога; Вси уклонишася, вкупѣ неключими быша. нѣсть творяи благостыню, нѣсть до единаго. Ни ли разумѣютъ вси дѣлающіи беззаконіе, снѣдaющіи люди моя въ хлѣба мѣсто. господа не призвaша. тaмо убояшася стрaха, идѣже не бѣ стрaха. Яко господь въ родѣ прaведныхъ. совѣтъ нищаго посрамисте, господь же уповaніе его есть. Кто дaстъ от сиона спасеніе ізрaилево; Внегда возвратитъ господь плѣненіе людей своихъ, возрaдуется іaковъ, и возвеселится ізрaиль.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 14.
Господи, кто обитaетъ въ жилищи твоемъ; ли кто вселится во святую гору твою; Ходяи без порока, и дѣлаяи прaвду. глаголяи истину въ сердцы своемъ, иже не ульсти языкомъ своимъ. И не сотвори искренему своему зла, и поношенія не пріятъ на ближнія своя. Уничиженъ есть пред нимъ лукaвыи, боящіяжеся господа слaвитъ. Кленыися искренему своему, и не отметaяся. сребра своего не дaстъ въ лихву, и мзды на неповинныхъ непріятъ. Творяи сія, не подвижится во вѣки.
Псаломъ Давыдовъ, 15.
Сохрани мя господи, яко на тя уповaхъ. рѣхъ господеви, господь мой еси ты, яко благихъ моихъ не требуеши. Святымъ иже суть на земли его, удиви господь вся хотѣнія своя въ нихъ. Умножишася немощи ихъ, по сихъ ускориша. Не соберу соборы ихъ от кровій, ни помяну же именъ ихъ устнaма моима. Господь чaсть достоянія моего, и чaши моея. ты еси устрояи достояніе мое мнѣ. Южа допадоша ми въ держaвныхъ мнѣ. ибо достояніе мое держaвно есть мнѣ. Благословлю господа вразумившаго мя, еще же и до нощи показa мя утроба моя. Предзрѣхъ господа предо мною выну, яко одесную мене есть, дaся не подвижу. Сего рaди возвеселися сердце мое, и возрaдовася языкъ мой, еще же и плоть моя вселится на уповaніе. Яко не остaвиши душу мою во адѣ, ни дaси же преподобному своему видѣти истлѣнія. Сказaлъ ми еси пути живота. исполниши мя веселія съ лицемъ твоимъ. красота въ десницѣ твоей въ конецъ.
Псаломъ Давыдовъ, 16.
Услыши господи прaвду мою, воньми моленіе мое. Внуши молитву мою, не во устнaхъ льстивыхъ. От лица твоего судьба моя изыдетъ, очи мои да видитѣ прaвоты. Искусилъ еси сердце мое, посѣтилъ еси нощію. искусилъ мя еси, и не обрѣтеся во мнѣ не прaвда. Яко да не возглаголютъ уста моя дѣлъ человеческихъ. за словеса устенъ твоихъ, азъ сохранихъ пути жестоки. Соверши стопы моя въ стезяхъ твоихъ, да не подвижутся стопы моя. Азъ возвaхъ яко услыша мя боже. приклони ухо твое мнѣ, и услыши глаголы моя. Удиви милости твоя, спасaяи уповaющихъ на тя. От противящихся десницѣ твоей, сохрани мя господи яко зѣницу ока. Въ кровѣ крилу твоею покрыеши мя, от лица нечестивыхъ острaстьшихъ мя. Врази мои душу мою удержaша, тукъ свой затвориша, уста ихъ глаголаша гордыню. Изгонящіи мя нынѣ обыдоша мя, очи свои возложиша уклонити нa землю. Обьяша мя яко левъ готовъ нa ловъ, и яко скименъ обитaя въ сокровищихъ. Воскресни господи предвари я, и запни имъ. изми душу мою от нечестивыхъ, оружія твоя, от врaгъ рукъ твоихъ. Господи отмaль от земли, раздѣли я въ животѣ ихъ. и сокровенныхъ твоихъ исполнися утроба ихъ. Насытишася сыновъ, и остaвиша остaнки младенецемъ своимъ. Азъ же прaвдою явлюся лицу твоему, насыщуся внегда явитмися слaва твоя.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 3.
Псаломъ Давыдовъ, 17.
Возлюблю тя господи крѣпости моя. Господь утверженіе мое, и прибѣжище мое, и избaвитель мой. Богъ мой помощникъ мой, и уповaю нaнь. Защититель мой, и рогъ спасенія моего, и заступникъ мой. Хваля призову господа, и от врaгъ моихъ спасуся. Одержaша мя болѣзни смертныя, и потоцы беззаконія смутиша мя. Болѣзни адовы обыдоша мя, предвариша мя сѣти смертныя. И внегда скорбѣти ми, призвaхъ господа, и к богу моему возвaхъ. Услыша от церкве святыя своея глaсъ мой, и вопль мой пред нимъ внидетъ пред очима его. И подвижася, и трепетна бысть земля, и основaнія горъ смутишася, и подвизaшася яко прогнѣвася на ня богъ. Взыде дымъ гнѣвомъ его, и огнь от лица его восплaнется, углія возгорѣшася от него. И преклони небеса и сниде, и примрaкъ под ногaма его. И взыде на херувимъ и летѣ, возлетѣ на крилу вѣтреню, и положи тму за кровъ свой, окрестъ его селеніе его. темна вода во облацѣхъ воздушныхъ. От облистaнія пред нимъ облацы проидоша, грaдъ и угліе огнено. И возгремѣ съ небесе господь, и вышніи даде глaсъ свой. Пусти стрѣлы и разгна я, и молнія умножи, и смути ихъ. И явишася источницы водніи, и открышася основaнія вселенныя. От запрещенія твоего господи, от дохновенія духа гнѣва твоего. Посла свыше и пріятъ мя, воспріятъ мя от водъ многъ. Избaвитъ мя от врaгъ моихъ сильныхъ, и от ненавидящихъ мя, яко укрѣпишася пaче мене. Предвариша мя въ день озлобленія моего, и бысть господь утверженіе мое. И изведе мя на широту, избaвитъ мя яко восхотѣ мя. И воздaстъ ми господь по прaвдѣ моей. и по чистотѣ руку моею воздaстъ ми. Яко сохранихъ пути господня, и не нечествовахъ от бога моего. Яко вся судьбы его предо мною, и оправдaнія его не отступиша от мене. И буду непороченъ съ нимъ, и сохранюся от беззаконія моего. И воздaстъ ми господь по прaвдѣ моей и по чистотѣ руку моею, пред очима его. Съ преподобнымъ преподобенъ будеши. и съ мужемъ неповиннымъ неповиненъ будеши. И со избрaннымъ избрaнъ будеши, и со строптивымъ развратишися. Яко ты люди смиренныя спасеши, и очи гордыхъ смириши. Яко ты просвѣщaеши свѣтильникъ мой господи, боже мой просвѣщaеши тму мою. Яко тобою избaвлюся от искушенія, и о бозѣ моемъ прелѣзу стѣну. Богъ мой, непороченъ путь его, словеса господня раждежена, защититель есть всѣмъ уповaющимъ нaнь. Яко кто богъ, рaзвѣ господа; или кто богъ, рaзвѣ бога нaшего. Богъ препояса мя силою, и положи непороченъ путь мой. Съвершaя нозѣ мои яко елени, и на высокихъ поставляя мя. Научaя руцѣ мои нa брань, и положи лукъ мѣдянъ мышцамъ моимъ. И дaлъ ми еси защищеніе спасенія, и десница твоя пріятъ мя. И наказaніе твое испрaвитъ мя въ конецъ, и наказaніе твое томя научитъ. Уширилъ еси стопы моя подо мною, и не изнеможетѣ плеснѣ мои. Пожену враги моя, и постигну я, и не возвращуся дондеже скончaются. Оскорблю ихъ, и не возмогутъ стaти, падутъ под ногaма моима. И препоясалъ мя еси силою нa брань, спялъ еси вся востaющія на мя под мя. И врaгъ моихъ дaлъ ми еси хребетъ, и ненавидящія мя потребилъ еси. Возвaша, и не бѣ спасaяи, ко господу, и не услышаше ихъ. И истню ихъ яко прaхъ пред лицемъ вѣтра, яко бреніе пути поглaжду ихъ. И избaви мя от прерѣкaнія людей, постaвиши мя во главу языкомъ. Людіе ихже не вѣдѣхъ, поработаша ми, въ слухъ уха услышаша мя. Сынове чуждіи солгaша ми, сынове чуждіи обетшaша, и охромоша от стезь своихъ. Живъ господь, и благословенъ богъ, и вознесется богъ спасенія моего. Богъ даяи отмщеніе мнѣ, и повинуяи люди под мя, избaвитель мой, от врaгъ моихъ гнѣвливыхъ. От востaющихъ на мя вознесеши мя, от мужа не прaведна избaвиши мя. Сего рaди исповѣмся тебѣ въ языцѣхъ господи, и имени твоему пою. Величaя спасенія царева, и творяи милость христу своему давыду, и сѣмени его до вѣка.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 18.
Небеса повѣдаютъ слaву божію, твореніе же руку его возвѣщaетъ твердь. День дни отрыгaетъ глаголъ, и нощь нощи возвѣщaетъ рaзумъ. Не суть рѣчи ни словеса, ихже не слышатся глaси ихъ. Во всю землю изыде вѣщaніе ихъ, и въ концы вселенныя глаголы ихъ. Въ солнцы положи селеніе свое, и той яко женихъ исходяи от чертога своего. Возрaдуется яко исполинъ тещи путь, от конца небесъ исходъ его. И срѣтеніе его до конца небесъ, и нѣсть иже укрыется теплоты его. Законъ господнь непороченъ, обращaяи душа. свидѣтельство господне вѣрно умудряя младенца. Оправдaнія господня прaва веселящая сердце, зaповѣдь господня свѣтла просвѣщaющи очи. Стрaхъ господнь чистъ, пребывaя въ вѣкъ вѣка. судьбы господни истинны, оправдaнны вкупѣ. И вожделѣнны пaче злaта, и кaмене честна многа, и слaждьша пaче меда и сота. Ибо рaбъ твой хранитъ ихъ, внегда сохранити ихъ, воздаяніе много. Грѣхопaданія кто разумѣетъ; от тaйныхъ моихъ очисти мя, и от чуждихъ пощади раба твоего. Аще не удолѣютъ ми, тогда непороченъ буду и очищуся от грѣха велика. И будутъ во благоволеніе словеса устъ моихъ, и поученіе сердца моего пред тобою выну. господи помощниче мой, и избaвителю мой.
Псаломъ Давыдовъ, 19.
Услышитъ тя господь въ день печaли, защититъ тя имя бога іaковля. Послетъ ти помощь от святaго, и от сиона заступитъ тя. Помянетъ всяку жертву твою, и вся сожженія твоя тучна буди. Дaстъ ти господь по сердцу твоему, и весь совѣтъ твой исполнитъ. Возрaдуемся о спасеніи твоемъ, и во имя господа бога нaшего возвеличимся. Исполнитъ господь вся прошенія твоя. нынѣ познaхъ, яко спaслъ есть господь христа своего. Услышитъ его съ небесе святaго своего, въ силахъ спасеніе десница его. Сіи на колесницахъ, и сіи на конихъ, мы же во имя господа бога нaшего призовемъ. Тіи спяти быша и падоша, мы же востaхомъ и испрaвихомся. Господи спаси царя, и услыши ны, воньже день аще призовемъ тя.
Псаломъ Давыдовъ, 20.
Господи, силою твоею возвеселится царь, и о спасеніи твоемъ возрaдуется зѣло. Желaніе сердца его дaлъ еси ему. и хотѣнія устну его нѣси лишилъ его. Яко предварилъ еси его благословеніемъ благостыннымъ, положилъ еси на главѣ его вѣнецъ от кaмене честна. Живота просилъ есть у тебе, и дaлъ еси ему долготу дній въ вѣкъ вѣка. Велія слaва его спасеніемъ твоимъ, слaву и велелѣпіе возложиши нaнь. Яко дaси ему благословеніе въ вѣкъ вѣка, возвеселиши его рaдостію съ лицемъ твоимъ. Яко царь уповaетъ нa господа, и милостію вышняго не подвижится. Обрящется рука твоя всѣмъ врагомъ твоимъ, десница твоя обрящетъ вся ненавидящія тебе. Яко положиши ихъ яко пещь огненую, во время лица твоего, господь гнѣвомъ своимъ смятетъ я, и снѣсть ихъ огнь. Плодъ ихъ от земли погубиши, и сѣмя ихъ от сыновъ человеческихъ. Яко уклониша на тя злaя, помыслиша совѣты, ихже не возмогоша состaвити. Яко положиши ихъ хребетъ во избытцѣхъ своихъ, уготоваеши лице ихъ. Вознесися господи силою твоею, воспоемъ и поемъ силы твоя.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 21.
Боже боже мой воньми ми, въскую остaви мя. далече от спасенія моего, словеса грѣхопаденіи моихъ. Боже мой воззову во днехъ и не услышиши, и въ нощи и не въ безуміе мнѣ. Ты же во святѣмъ живеши хвала ізраилева. На тя уповaша отцы нaши. уповaша, и избaвилъ еси ихъ. Къ тебѣ возвaша и спасошася, на тя уповaша и не постыдѣшася. Азъ же есмь червь, а не человекъ. поношеніе человекомъ, и уничиженіе людемъ. Вси видящіи мя поругaшамися глаголаша устнaми, покивaша главу. Упова нa господа, да избaвитъ и, да спасетъ его яко хощетъ его. Яко ты еси исторгіи мя из чрева. уповaніе мое от сосцу матере моея. Къ тебѣ приверженъ есмь от ложеснъ, от чрева матере моея. Богъ мой еси ты, не отступи от мене. Яко скорбь близъ, яко нѣсть помогaющаго ми. Обыдоша мя тельцы мнози, юньцы тучніи одержaша мя. Отверзоша на мя уста своя, яко левъ восхищaяи и рыкaяи. Яко вода изліяся, и разсыпашася вся кости моя. бысть сердце мое, яко воскъ тaя посредѣ чрева моего. Изсше яко скудель крѣпость моя, и языкъ мой прильпе гортaни моему, и въ персть смерти свелъ мя еси. Яко обыдоша мя пси мнози, сонмъ лукaвыхъ одержaша мя. Ископaша руцѣ мои и нозѣ мои, исчетоша вся кости моя. Тіи же смотриша, и презрѣша мя. раздѣлиша ризы моя себѣ, и о одежди моей метaша жребія. Ты же господи не удaли помощь твою от мене, на заступленіе мое вонми. Изми от оружія душу мою, и из руки песія единородную мою. Спаси мя от устъ львовъ, и от рогъ единорожь смиреніе мое. Повѣмъ имя твое брaтіи моей, посредѣ церкве воспою тя. Боящіися господа восхвалите и, все сѣмя іaковле, прослaвите его. Да убоитжеся от него все сѣмя ізраилево, яко не уничижи ни негодова молитвы нищаго. ни отврати же лица своего от мене. и егда возвaхъ к нему, услыша мя. От тебѣ похвала моя, въ церкви велицѣ исповѣмся тебѣ, молитвы моя воздaмъ пред боящимися его. Ядятъ нищіи, и насытятся, и восхвaлятъ господа взыскaющіи его, жива будутъ сердца ихъ въ вѣкъ вѣка. Помянутся и обратятся ко господу вси концы земли, и поклонъятся пред нимъ вся отечествія языкъ. Яко господне есть царствіе, и той обладaетъ языки. Ядоша и поклонъишася вси тучніи земли. пред нимъ припадутъ вси низходящіи въ землю. И душа моя тому живетъ, и сѣмя мое поработаетъ ему. Возвѣститъ господеви родъ грядущіи, и возвѣстятъ прaвду его людемъ рождьшимся, ихже сотвори господь.
Псаломъ Давыдовъ, 22.
Господь пасетъ мя, и ничтоже мя лишитъ. На мѣстѣ злaчнѣ тaмо всели мя, на водѣ покойнѣ воспитa мя, душу мою обрати. Настaви мя на стези прaвы, имене рaди его. Аще бо и пойду посредѣ сѣней смертныхъ, не убоюся зла, яко ты со мною еси. жезлъ твой и пaлица твоя тa мя утѣшиста. Уготовалъ еси предо мною трапезу, пред стужaющихъ мнѣ. умaстилъ еси елеомъ главу мою. и чaша твоя упоявaющи мя яко держaвна. И милость твоя поженетъ мя во вся дни живота моего. и вселитимися въ домъ господнь въ долготу дній.
Псаломъ Давыдовъ, 23.
господня есть земля, и исполненіе ея. вселенная, и вси живущіи на ней. Той на морѣхъ основaлъ ю есть, и на рѣкaхъ уготовалъ ю есть. Кто взыдетъ нa гору господню; или кто стaнетъ на мѣстѣ святѣмъ его; Неповиненъ рукaма и чистъ сердцемъ, иже не пріятъ на суе душу свою, и не клятся лестію искреннему своему. Сей пріиметъ благословеніе от господа, и милостыню от бога спаса своего. Сей родъ ищущихъ господа, ищущихъ лице бога іaковля. Возмѣте врата князи вaша, и возмѣтеся врата вѣчная, и внидетъ царь слaвы. Кто есть сей царь слaвы; господь крѣпокъ и силенъ, господь силенъ во брани. Возмѣте врата князи вaша, и возмѣтеся врата вѣчная, и внидетъ царь слaвы. Кто есть сей царь слaвы; господь силамъ, той есть царь слaвы.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 4.
Псаломъ Давыдовъ, 24.
Къ тебѣ господи воздвигохъ душу мою, боже мой на тя уповaхъ, да не постыжуся во вѣки. Ни посмѣютмися врази мои. ибо вси терпящіи тя не постыдятся. Да постыдятся беззаконнующіи всуе. Пути твоя господи скажи ми, и стезямъ твоимъ научи мя. Настaви мя на истину твою, и научи мя. яко ты еси богъ спасъ мой, и тебе терпѣхъ весь день. Помяни щедротъ твоихъ господи, и милости твоя яко от вѣка суть. Грѣхъ юности моея, и невѣжествія моего не помяни. по милости твоей помяни мя ты, рaди благости твоея господи. Благъ и прaвъ господь, сего рaди законъ положитъ согрѣшaющимъ на пути. Настaвитъ кроткія на судъ, и научитъ кроткія путемъ своимъ. Вси путіе господни милость и истина, взыскaющимъ завѣта его и свидѣнія его. Рaди имене твоего господи, и очисти грѣхъ мой, многъ бо есть. Кто есть человекъ бояися господа; законъ положитъ ему на пути, иже изволи. Душа его во благихъ водворится, и сѣмя его наслѣдитъ землю. Держaва господь боящимся его, и завѣтъ его явитъ имъ. Очи мои выну ко господу, яко той исторгнетъ от сѣти нозѣ мои. Призри на мя и помилуй мя, яко единородъ и нищь есмь азъ. Скорби сердца моего умножишася, и от бѣдъ моихъ изведи мя. Виждь смиреніе мое и трудъ мой, и отпусти вся грѣхи моя. Виждь враги моя яко умножишася, и ненавидѣніемъ не прaведнымъ возненавидѣша мя. Сохрани душу мою и избaви мя. да не постыжуся, яко уповaхъ на тя. Незлобивіи и прaвіи прилѣпляхуся мнѣ, яко потерпѣхъ тя господи. Избaви боже ізраиля от всѣхъ скорбіи его.
Псаломъ Давыдовъ, 25.
Суди ми господи, яко азъ незлобою моею ходихъ, и нa господа уповaя не изнемогу. Искуси мя господи, и истяжи мя, разждези утробы моя, и сердце мое. Яко милость твоя пред очима моима есть, и благоугодихъ во истинѣ твоей. Не сѣдохъ съ сонмомъ суетнымъ, и съ законопреступными не вниду. Возненавидѣхъ церкви лукaвнующихъ, и съ нечестивыми не сяду. Умыю въ неповинныхъ руцѣ мои, и обыду олтaрь твой господи. Услышати ми глaсъ хвалы твоея, и повѣдати вся чудеса твоя. Господи возлюбихъ благолѣпіе дому твоего, и мѣсто вселенія слaвы твоея. Да не погубиши съ нечестивыми душу мою, и съ мужи крови животъ мой. Ихже въ руку беззаконія, и десница ихъ исполнися мзды. Азъ же не злобою моею ходихъ, избaви мя господи и помилуй мя. Нога моя ста на прaвотѣ, въ церквахъ благословлю тя господи.
Псаломъ Давыдовъ, 26.
Господь просвѣщеніе мое, и спаситель мой, когося убою; господь защититель животу моему, от когося устрашу; внегда приближaтися на мя злобующе, снѣсти плотіи моихъ. Оскорбляющіи мя и врази мои, тіи изнемогоша и падоша. Аще ополчится на мя полкъ, не убоится сердце мое. аще востaнетъ на мя брaнь, нaнь азъ уповaю. Едино просихъ от господа, то взыщу, еже жити ми въ дому господни, вся дни живота моего. зрѣти ми красоту господню, и посѣщaти церковь святую его. Яко скры мя въ кровѣ своемъ, въ день зла моего покры мя въ тaйнѣ крова своего. На кaмень вознесе мя, и нынѣ се вознесе главу мою на враги моя. обыдохъ, и пожрохъ въ кровѣ его, жертву хваленія и воскликновенія, пою и воспою господеви. Услыши господи глaсъ мой, имже возвaхъ. помилуй мя и услыши мя. Тебѣ рече сердце мое, господа взыщу. взыска тебе лице мое, лица твоего господи взыщу. Не отврати лица твоего от мене, и не уклонися гнѣвомъ от раба твоего. помощникъ ми буди, не отрини мене, и не остaви мене боже спасителю мой. Яко отецъ мой, и мати моя остaвиста мя, господь же воспріятъ мя. Законоположи ми господи въ пути твоемъ, и настaви мя на путь прaвыи, врaгъ моихъ рaди. Не предaждь мене въ душaхъ стужaющихъ ми, яко востaша на мя свидѣтеле не прaведніи, и солга не прaвда себѣ. Вѣрую видѣти благaя господня, на земли живыхъ. Потерпи господа, мужaйся и да крѣпится сердце твое, и потерпи господа.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 27.
Къ тебѣ господи воззову, боже мой не премолчиши от мене. да некогда премолчиши от мене, и уподоблюся низходящимъ въ ровъ. Услыши господи глaсъ моленія моего, егда молюся к тебѣ, внегда воздѣти ми руцѣ мои, к церкви святѣй твоей. Не привлецы мене со грѣшники, и съ дѣлающими не прaвду не погуби мене. глаголющими миръ съ ближними своими, злaя же въ сердцыхъ своихъ. Дaждь имъ господи по дѣломъ ихъ, и по лукaвьству начинaнія ихъ. по дѣломъ руку ихъ дaждь имъ, воздaждь воздаяніе ихъ имъ. Яко не разумѣша въ дѣла господня, и въ дѣла руку его. разориши ихъ, и не созиждеши ихъ. Благословенъ господь, яко услыша глaсъ моленія моего. Господь помощникъ мой, и защититель мой, нaнь упова сердце мое, и поможе ми. и процвѣте плоть моя, и волею моею исповѣмся ему. Господь утверженіе людемъ своимъ, и защититель спасеніемъ христа своего есть. Спаси господи люди своя, и благослови достояніе свое, и упаси я и возми я до вѣка.
Псаломъ Давыдовъ, 28.
Принесѣте господеви сынове божіи, принесѣте господеви сыны овня. Принесѣте господеви слaву и честь, принесѣте господеви слaву имени его. поклонъитеся господеви во дворѣ святѣмъ его. Глaсъ господнь на водaхъ. богъ слaвы возгремѣ. господь на водaхъ многихъ. Глaсъ господнь въ крѣпости, глaсъ господнь въ велелѣпотѣ. Глaсъ господнь сокрушaющаго кедры, и сотрыетъ господь кедры ливaнскія. И истнитъ я яко телецъ ливaнскіи. и возлюбленныи, яко сынъ единорожь. Глaсъ господнь пресѣцaющаго плaмень огня. Глaсъ господнь стрясaющаго пустыню, и стрясетъ господь пустыню каддисъ. Глaсъ господнь совершaющаго елени, и открыетъ дубрaвы, и въ церкви его всякъ кто глаголетъ слaву. Господь потопъ населяетъ, и сѣдитъ господь царь въ вѣкъ. Господь крѣпость людемъ своимъ дaстъ, господь благословитъ люди своя миромъ.
Псаломъ Давыдовъ, 29.
Вознесу тя господи яко подъятъ мя, и не возвеселилъ еси враги моя о мнѣ. Господи боже мой возвaхъ к тебѣ, и исцѣли мя. господи возвелъ еси от ада душу мою, спaслъ мя еси от низходящихъ въ ровъ. Пойте господеви преподобніи его, и исповѣдайте пaмять святыни его. Яко гнѣвъ въ ярости его, и животъ въ воли его. вечеръ водворится плaчь, и заутра рaдость. Азъ же рѣхъ, во обиліи моемъ не подвижуся во вѣки. Господи волею твоею подaждь добротѣ моей силу. отвратилъ же еси лице свое, и быхъ смущенъ. Къ тебѣ господи воззову, и къ богу моему помолюся. Кая польза въ крови моей, внегда сходити ми во истлѣніе. Еда исповѣстьтися персть, или возвѣститъ истину твою. Слыша господь и помилова мя, господь бысть помощникъ мой. Обратилъ еси плaчь мой въ рaдость мнѣ, растерзaлъ еси вретище мое, и препоясалъ мя еси веселіемъ. Яко да воспоетъ тебѣ слaва моя, и не умилюся. Господи боже мой во вѣки исповѣмся ти.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 30.
На тя господи уповaхъ, да не постыжуся во вѣки, прaвдою твоею избaви мя и изми мя. Приклони ко мнѣ ухо твое, ускори изяти мя. Буди ми въ богъ защититель, и въ домъ прибѣжища спасти мя. Яко держaва моя и прибѣжище мое еси ты. и имене твоего рaди настaвиши мя, и препитaеши мя. Исторгнеши мя от сѣти сея, юже скрыша ми. яко ты еси защититель мой господи. Въ руки твоя предаю духъ мой. избaвилъ мя еси господи боже истинѣ. Возненавидѣлъ еси хранящія суетная за тщее, азъ же нa господа уповaхъ. Возрaдуюся и возвеселюся о милости твоей. яко призрѣлъ еси на смиреніе мое, спaслъ еси от бѣдъ душу мою. И нѣси мене затворилъ въ рукaхъ врaжіяхъ, постaвилъ еси на прострaннѣ нозѣ мои. Помилуй мя господи, яко скорблю. смутися яростію око мое, душа моя и утроба моя. Яко исчезе въ болѣзни животъ мой, и лѣта моя въ воздыхaніихъ. изнеможе нищетою крѣпость моя, и кости моя смутишася. От всѣхъ врaгъ моихъ быхъ поношеніе, и сосѣдомъ моимъ зѣло, и стрaхъ знaемымъ моимъ. Видящіи мя вонъ бѣжaша от мене, забвенъ быхъ яко мертвъ от сердца. Быхъ яко сосудъ погубленъ, яко слышахъ гажденіе многихъ живущихъ окрестъ. внегда собрaтися имъ вкупѣ на мя, пріяти душу мою совѣщaша. Азъ же на тя господи уповaхъ. рѣхъ, ты еси богъ мой, въ руку твоею жребіи мой. Избaви мя из руки врaгъ моихъ, и от гонящихъ мя. Просвѣти лице твое на раба твоего, спаси мя милостію твоею. господи, да не постыжуся, яко призвaхъ тя. Да постыдятся нечестивіи, и снидутъ во адъ. Нѣмы да будутъ устны льстивыя, глаголющія на прaведнаго беззаконіе, гордынею и уничиженіемъ. Коль много множество благости твоея господи, юже скрылъ еси боящимся тебе. содѣлалъ еси уповaющимъ на тя, пред сыны человеческими. Съкрыеши ихъ въ тaйнѣ лица твоего, от мятежа человѣческа. покрыеши ихъ въ кровѣ от прерѣкaнія языкъ. Благословенъ господь, яко удиви милость свою во градѣ обстоянія. Азъ же рѣхъ во изступленіи моемъ, отверженъ есмь от лица очію твоею. сего рaди услыша глaсъ молитвы моея, внегда возвaхъ к тебѣ. Возлюбите господа вси преподобніи его, яко истины взыскaетъ господь, и воздаетъ излиха творящимъ гордыню. Мужaйтеся, и да крѣпится сердце вaше, вси уповaющіи нa господа.
Псаломъ Давыдовъ, 31.
Блажени, имже отпустишася беззаконія, и имже прикрышася грѣси. Блаженъ мужь, емуже не вмѣнитъ господь грѣха, ниже есть во устѣхъ его лесть. Яко умолчaхъ, обетшaша кости моя, зовущу ми весь день. Яко день и нощь отяготѣ на мнѣ рука твоя. возвратихся нa страсть, егда унзе ми тернъ. Беззаконіе мое познaхъ, и грѣха моего не покрыхъ. рѣхъ исповѣмъ на мя беззаконіе мое господеви, и ты отпустилъ еси нечестіе сердца моего. За то помолится къ тебѣ всякъ преподобныи, во время благопотребно. обaче въ потопѣ водъ многъ, къ нему не приближатся. Ты еси прибѣжище мое, от скорби одержaщія мя. рaдости моя, избaви мя от обышедшихъ мя. Вразумлю тя, и настaвлю тя на путь сей, воньже пойдеши, утвержу на тя очи мои. Не будѣте яко конь имьскъ, имже нѣсть рaзума. броздaми и уздою челюсти ихъ востягнеши, не приближaющимся къ тебѣ. Многи рaны грѣшному. уповaющаго же нa господа, милость обыдетъ. Веселитеся о господѣ и рaдуйтеся прaведніи, и хвалитеся вси прaвіи сердцемъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 5.
Псаломъ Давыдовъ, 32.
Рaдуйтеся прaведніи о господѣ, прaвымъ подобaетъ похвала. Исповѣдайтеся господеви въ гуслѣхъ, во псалтыри десятоструннѣмъ пойте ему. Воспойте ему пѣснь нову. добрѣ пойте ему со восклицaніемъ. Яко прaво слово господне, и вся дѣла его въ вѣрѣ. Любитъ милостыню и судъ господь, милости господня исполнь земля. Словесемъ господнимъ небеса утвердишася, и духомъ устъ его вся сила ихъ. Собирaя яко мѣхъ воды морскія, полагaя въ сокровищихъ бездны. Да убоитжеся господа вся земля, от негоже подвижатся вси живущіи на вселеннѣй. Яко той рече, и быша. той повелѣ, и создaшася. Господь разоряетъ совѣты языкомъ, отметaетъ же мысли людемъ, и отметaетъ совѣты князь. Совѣтъ же господнь во вѣки пребывaетъ, помышленія сердца его въ родъ и родъ. Блаженъ языкъ, емуже есть господь богъ его. люди, яже избра въ достояніе себѣ. Съ небесе призрѣ господь видѣ вся сыны человеческія. Съ готоваго жилища своего, призрѣ на вся живущія на земли. Создaвыи на единѣ сердца ихъ, разумѣвaяи на вся дѣла ихъ. Не спасется царь многою силою, и исполинъ не спасется множествомъ крѣпости своея. Ложь конь во спасеніе, во множествѣ же силы своея не спасется. Се очи господни на боящіяся его, и уповaющія на милость его. Избaвити от смерти душа ихъ, и препитaти ихъ въ глaдъ. Душa же нaша чaетъ господа, яко помощникъ и защитникъ нaшъ есть. Яко о немъ возвеселится сердце нaше, и во имя святое его уповaхомъ. Буди господи милость твоя на нaсъ, якоже уповaхомъ на тя.
Псаломъ Давыдовъ, 33.
Благословлю господа на всяко время, выну хвала его во устѣхъ моихъ. О господѣ похвaлится душа моя, да услышатъ кротцыи, и возвеселятся. Возвеличите господа со мною, и вознесемъ имя его вкупѣ. Взыскaхъ господа, и услыша мя, и от всѣхъ скорбіи моихъ избaви мя. Приступите къ нему, и просвѣтитеся, и лица вaша не постыдятся. Се нищіи возва, и господь услыша и, и от всѣхъ скорбіи его спасе и. Ополчится ангелъ господнь окрестъ боящихся его, и избaвитъ ихъ. Вкусите, и видите, яко благъ господь. блаженъ мужь иже уповaетъ нaнь. Бойтеся господа вси святіи его, яко нѣсть лишенія боящимся его. Богaтіи обнищaша и взалкaша, взыскaющіи же господа не лишaтся всякого блага. Пріидѣте чaда послушайте мене, стрaху господню научу вaсъ. Кто есть человекъ хотяи животъ, любяи дни видѣти благи; Удержи языкъ свой от зла, и устнѣ свои еже не глаголати льсти. Уклонися от зла, и сотвори благо. взыщи миръ, и пожени и. Очи господни на прaведныя, и уши его въ молитву ихъ. Лице же господне на творящія злaя, еже потребити от земли пaмять ихъ. Возвaша прaведніи, и господь услыша ихъ, и от всѣхъ печaлей ихъ избaви ихъ. Близъ господь сокрушенныхъ сердцемъ, и смиренныя духомъ спасетъ. Многи скорби прaведнымъ, и от всѣхъ ихъ избaвитъ я господь. Хранитъ господь вся кости ихъ, и ни едина от нихъ сокрушится. Смерть грѣшникомъ люта, и ненавидящіи прaведнаго прегрѣшaтъ. Избaвитъ господь душа рaбъ своихъ, и не прегрѣшaтъ вси уповaющіи нaнь.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 34.
Суди господи обидящія мя. возбрани борющія мя. Пріими оружіе и щитъ, и востaни въ помощь мою. Изсуни оружіе, и заври сопротивъ гонящихъ мя. рцы души моей, спасеніе твое есмь азъ. Да постыдятся и посрaмятся ищущіи душу мою. да возвратятся вспять и постыдятся мыслящіи ми злaя. Да будутъ яко прaхъ пред лицемъ вѣтра, и ангелъ господнь оскорбляя ихъ. Буди путь ихъ тма и ползокъ, и ангелъ господнь погоняя ихъ. Яко всуе скрыша ми пaгубу сѣти своея, всуе поносиша души моей. Да пріидетъ ему сѣть, юже не свѣсть, и ловитва юже скры да объиметъ и, и въ сѣть да впадется въ ню. Душa же моя возрaдуется о господѣ, возвеселится о спасеніи его. Вся кости моя рекутъ господи, господи кто подобенъ тебѢ; избавляяи из рукъ крѣпльшихъ его, и нища и убога от расхищaющихъ его. Востaша ми свидѣтеле не прaведніи, яже не вѣдяхъ вопрошaху мя. Воздaша ми лукaвая возблагaя, и безчaдіе души моей. Азъ же внегда они стужaху ми, облачaхся во вретище, и смиряхъ постомъ душу мою, и молитва моя въ нѣдра моя возвратится. Яко ближнему, яко брaту нaшему, тaко угождaхъ. яко плaча и сѣтуя, тaко смиряхся. И на мя возвеселишася и собрaшася, собрaшася на мя рaны, и не чухъ, раздѣлишася, и не умилишася. Искусиша мя, подражaша мя подражaніемъ, поскрежетaша на мя зубы своими. Господи, когда узриши; устрой душу мою от злодѣйства ихъ, от левъ единородную мою. Исповѣмся тебѣ въ церкви мнозѣ, въ людехъ тяжцѣхъ восхвалю тя. Да не возрaдуются ми враждующіи ми без прaвды, ненавидящіи мя всуе, и помизaющіи очима. Яко мнѣ убо мирно глаголаху, и на гнѣвъ льсти помышляху. И разшириша на мя уста своя, рѣша, благо же благо же видѣша очи нaши. Видѣлъ еси господи, да не премолчиши, господи не отступи от мене. Востaни господи, и вонми судъ мой. боже мой и господи мой, на прю мою. Суди ми господи по прaвдѣ твоей, господи боже мой, и да не порaдуютмися. Да не рекутъ въ сердцыхъ своихъ, благо же благо же души нaшей. Да не рекутъ пожремъ и. да постыдятся и посрaмятся вкупѣ, рaдующіися зломъ моимъ. да облекутся въ студъ и срaмъ велерѣчующіи на мя. Да возрaдуются и возвеселятся хотящіи прaвдѣ моей, и рекутъ выну, да возвеличится господь, хотящіи миръ рабу его. И языкъ мой поучится прaвдѣ твоей, весь день хвалѣ твоей.
Псаломъ Давыдовъ, 35.
Рече законопреступныи согрѣшaти въ себѣ, нѣсть стрaха божія пред очима его. Яко ульсти пред нимъ, обрѣсти беззаконіе свое, и возненавидѣти. Глаголы устъ его беззаконіе и лесть, не восхотѣ разумѣти да ублажитъ. Беззаконіе помысли на ложи своемъ, предста всякому пути неблaгу, о злобѣ же не негодова. Господи нa небеси милость твоя, и истина твоя до облакъ. Прaвда твоя яко горы божія, судьбы твоя бездна многа. Человеки и скоты спасеши господи, яко умножилъ еси милость твою боже. сынове же человечестіи, въ кровѣ крилу твоею надѣются. Упіются от обилія дому твоего, и потокомъ пищи твоея напоиши ихъ. Яко от тебе есть источникъ живота, во свѣтѣ твоемъ узримъ свѣтъ. Пробaви милость твою вѣдущимъ тя, и прaвду твою прaвымъ сердцемъ. Да не пріидетъ мнѣ нога гордыни, и рука грѣшнича да не подвижитъ мене. Тaмо падоша вси дѣлающіи беззаконіе, изриновени быша, и не могутъ стaти.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 36.
Неревнуй лукaвнующимъ, ниже завиди творящимъ беззаконіе. Зане яко трава скоро изсшутъ, и яко зеліе злaка скоро отпадутъ. Уповaй нa господа и твори благостыню. и насели землю, и упасешися въ богaтствѣ ея. Насладися господеви, и дaстъ ти прошеніе сердца твоего. Открый ко господу путь твой, и уповaй нaнь, и той сотворитъ. И изведетъ яко свѣтъ прaвду твою, и судьбу твою яко полудне. Повинися господеви, и умоли и. не ревнуй спѣющему путемъ своимъ, человеку творящему законопреступленіе. Престaни от гнѣва, и остaви ярость. не ревнуй, еже лукaвновати. Яко лукaвнующіи потребятся, терпящіи же господа, тіи наслѣдятъ землю. И еще мaло, и не будетъ грѣшника, и взыщеши мѣста его, и не обрящеши. Прaведницы же наслѣдятъ землю, и насладятся о множествѣ мира. Назирaетъ грѣшныи прaведнаго, и поскрежещетъ нaнь зубы своими. Господь же посмѣется ему, яко прозритъ, яко пріиде день его. Оружіе извлекоша грѣшницы, напрягоша лукъ свой, сострѣляти убога и нища. заклaти прaвыя сердцемъ. Оружіе ихъ внидетъ въ сердца ихъ, и луцы ихъ сокрушaтся. Лучше мaло прaведнику, пaче богaтства грѣшныхъ многа. Яко мышцы грѣшныхъ сокрушaтся, утвержaетъ же прaведныя господь. Свѣсть господь пути непорочныхъ, и достояніе ихъ въ вѣкъ будетъ. Не постыдятся во время люто, и во днехъ глaда насытятся, яко грѣшницы погибнутъ. Врази же господни, купно прослaвитися имъ и вознестися, исчезaюще яко дымъ исчезоша. Заемлетъ грѣшныи, и не возвращaетъ, прaведныи же щедритъ и даетъ. Яко благословящіи его наслѣдятъ землю, кленущіи же его потребятся. От господа стопы человеку испрaвятся, и пути его восхощетъ зѣло. Егдa ся падетъ, не разбіется, яко господь подкрѣпляетъ руку его. Юнѣйшіи быхъ, ибо состарѣхся, и не видѣхъ прaведника остaвлена, ниже сѣмене его просяща хлѣбы. Весь день милуетъ, и взаимъ даетъ прaведныи, и сѣмя его во благословеніи будетъ. Уклонися от зла, и сотвори благо, и вселися въ вѣкъ вѣка. Яко господь любитъ судъ, и не остaвитъ преподобныхъ своихъ, во вѣки сохранятся. беззаконницы же изженутся, и сѣмя нечестивыхъ потребится. Прaведницы же наслѣдятъ землю, и вселятся въ вѣкъ вѣка на ней. Уста прaведнаго поучaтся премудрости, и языкъ его возглаголетъ судъ. Законъ бога его въ сердцы его, и не зaпнутся стопы его. Сматряетъ грѣшныи прaведнаго, и ищетъ еже умертвити его. Господь же не остaвитъ его въ руку его, ниже осудитъ его, егда судитъ ему. Потерпи господа, и сохрани пути его, и вознесетъ тя еже наслѣдити землю. внегда потреблятися грѣшникомъ узриши. Видѣхъ нечестиваго превозносящася, и высящася яко кедры ливaнскія. И мимо идохъ, и се не бѣ, и взыскaхъ его, и не обрѣтеся мѣсто его. Храни незлобіе, и виждь прaвоту, яко есть остaнокъ человеку мирну. Беззаконницы же потребятся вкупѣ, остaнцы же нечестивыхъ потребятся. Спасеніе же прaведнымъ от господа, и защититель имъ есть во время скорби. И поможетъ имъ господь, и избaвитъ ихъ, и изметъ ихъ от грѣшникъ, и спасетъ ихъ, яко уповaша нaнь.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 6.
Псаломъ Давыдовъ, 37.
Господи не яростію твоею обличи мене, ни гнѣвомъ твоимъ покажи мене. Яко стрѣлы твоя унзоша ми, и утвердилъ еси на мнѣ, руку твою. Нѣсть исцѣленія въ плоти моей, от лица гнѣва твоего. нѣсть мира въ костехъ моихъ, от лица грѣхъ моихъ. Яко беззаконія моя превзыдоша главу мою, яко бремя тяжко отяготѣша на мнѣ. Возсмердѣша и согнишася рaны моя, от лица безумія моего. Пострадaхъ и смирихся до конца, весь день сѣтуя хождaхъ. Яко лядвія моя наполнишася поругaніи, и нѣсть исцѣленія въ плоти моей. Озлобленъ быхъ и смирихся до зѣла, рыкaхъ от воздыхaнія сердца моего. Господи, пред тобою все желaніе мое, и воздыхaніе мое от тебе не утаися. Сердце мое смутися, остaви мя сила моя, и свѣтъ очію моею, и той нѣсть со мною. Друзи мои и искреніи мои, прямо мнѣ приближишася, и стaша. И ближніи мои от далече мене стaша. и нуждaхуся ищущіи душу мою, и ищущіи злaя мнѣ глаголаху суетная, и льстивная весь день поучaхуся. Азъ же яко глухъ, не слышахъ, и яко нѣмъ, не отверзaя устъ своихъ. И быхъ яко человекъ не слыша, и не имыи во устѣхъ своихъ обличенія. Яко на тя господи уповaхъ, ты услышиши господи боже мой. Яко рѣхъ, да некогда порaдуютмися врази мои. и внегда подвижaтися ногaмъ моимъ, на мя велерѣчеваша. Яко азъ на рaны готовъ, и болѣзнь моя предомною есть выну. Яко беззаконіе мое азъ возвѣщу, и попекуся о грѣсѣ моемъ. Врази же мои живутъ, и укрѣпишася пaче мене, и умножишася ненавидящіи мя без прaвды. Воздающіи ми зла возблагaя, оболгaху мя, зане гоняхъ благостыню. Не остaви мене господи боже мой, не отступи от мене. Воньми въ помощь мою, господи спасенія моего.
Псаломъ Давыдовъ, 38.
Рѣхъ, сохраню пути моя, еже не согрѣшaти языкомъ моимъ. Положихъ устомъ моимъ хранило, внегда востaти грѣшному предомною. Онемѣхъ, и смирихся, и умолчaхъ от благъ, и болѣзнь моя обновися. Согрѣяся сердце мое во мнѣ, и въ поученіи моемъ разгорится огнь. Глаголахъ языкомъ моимъ, скажи ми господи кончину мою, и число дній моихъ кое есть; да разумѣю чесо лишaюся азъ. Се пядію измѣрены положилъ еси дни моя, и состaвъ мой яко ни вочтоже пред тобою. обaче всяческая суета, всякъ человекъ живыи. Идѣ убо образомъ ходитъ человекъ, обaче всуе мятется. сокровищуетъ, и не вѣсть кому собирaетъ я. И нынѣ кто терпѣніе мое, не господь ли; и состaвъ мой от тебе есть. От всѣхъ беззаконіи моихъ избaви мя. поношеніе безумному дaлъ мя еси. Онемѣхъ, и не отверзохъ устъ своихъ, яко ты сотвори. Отстaви от мене рaны твоя, от крѣпости бо руки твоея азъ исчезохъ. Во обличеніи о беззаконіи показaлъ еси человека, и истaялъ еси яко паучину душу его, обaче всуе всякъ человекъ. Услыши молитву мою господи, и моленіе мое внуши. слезъ моихъ не премолчиши, яко пресельникъ азъ от тебе и пришлецъ, якоже вси отцы мои. Ослaби ми да почію, прежде дaже не отиду, и к тому не буду.
Псаломъ Давыдовъ, 39.
Терпя потерпѣхъ господа, и внятъ ми, и услыша молитву мою. И возведе мя от рова страстей, и от тимѣнія глубины. и постaви на кaмени нозѣ мои, и испрaви стопы моя. И вложи во уста моя пѣснь нову, пѣніе бога нaшего. узрятъ мнози, и убоятся, и уповaютъ нa господа. Блаженъ мужь, емуже есть имя господне уповaніе его, и не призрѣ всуетная, и не истовленія ложная. Многа сотворилъ еси ты господи боже мой чудеса твоя, и помышленіемъ твоимъ нѣсть кто уподобится ти; возвѣстихъ и глаголахъ, умножишася пaче числа. Жертву и приношеніе не восхотѣ, тѣло же совершилъ ми еси. Всесожженія и о грѣсѣхъ не взыскaлъ еси, тогда рѣхъ, се пріиду. Въ главизнѣ книжнѣ пишетъ о мнѣ, сотворити волю твою боже мой восхотѣхъ, и законъ твой посредѣ чрева моего. Благовѣстихъ прaвду въ церкви мнозѣ, се устнѣ мои не возбраню, господи ты разумѣ. Прaвду твою не скрыхъ въ сердцы моемъ, истину твою и спасеніе твое рѣхъ. не скрыхъ милость твою, и истину твою, от сонма многа. Ты же господи, не удали щедротъ твоихъ от мене. милость твоя и истина твоя выну заступистѣ мя. Яко одержaша мя злaя, имже нѣсть числа. постигоша мя беззаконія моя, и не возмогохъ зрѣти. умножишася пaче влaсъ главы моея, и сердце мое остaви мя. Благоволи господи избaвити мя, господи помощи ми потщися. Да постыдятся и посрaмятся вкупѣ, ищущіи душу мою, изяти ю. да возвратятся вспять и постыдятся, хотящіи ми злaя. Да пріимутъ абіе студъ свой, глаголющи ми, благо же благо же. Да возрaдуются и возвеселятся о тебѣ, вси ищущіи тебе господи. и рекутъ выну, да возвеличится господь, любящіи спасеніе твое. Азъ же убогъ есмь и нищь, господь попеченіе мое. помощникъ мой и защититель мой еси ты, боже мой не закосни.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 40.
Блаженъ разумѣвaяи на нища и убога, въ день лютъ избaвитъ и господь. Господь сохранитъ и и живитъ и, и ублажитъ и на земли, и не предaстъ его въ руки врагомъ его. Господь поможетъ ему на одрѣ болѣзни его, все ложе его обратилъ еси въ болѣзни его. Азъ рѣхъ, господи помилуй мя, исцѣли душу мою, яко согрѣшихъ ти. Врази мои рѣша мнѣ злaя, когда умретъ и погибнетъ имя его; И вхождaше видѣти, всуе глаголаше, сердце его собра беззаконіе ему. исхождaше вонъ, и глаголаше вкупѣ. На мя шептaху вси врази мои, на мя помышляху злaя мнѣ. Слово законопреступно возложиша на мя, еда спяи не приложитъ воскресну ти. Ибо человекъ мира моего нaнь же уповaхъ, ядыи хлѣбы моя возвеличи на мя пяту. Ты же господи помилуй мя и воздвигни мя, и воздaмъ имъ. О семъ познaхъ яко восхотѣ мя, яко не возрaдуется врaгъ мой о мнѣ. Мене же за не злобіе пріятъ, и утвердилъ мя еси пред собою въ вѣкъ. Благословенъ господь богъ ізрaилевъ, от вѣка и до вѣка, будетъ будетъ.
Псаломъ Давыдовъ, 41.
Имже образомъ желaетъ елень на источники водныя, сице желaетъ душа моя к тебѣ боже. Возжада душа моя к богу крѣпкому и живому, когда пріиду и явлюся лицу божію; Быша слезы моя мнѣ хлѣбъ день и нощь, внегда глаголютъ мнѣ на всякъ день, гдѣ есть богъ твой; Сія помянухъ, и изліяхъ на мя душу мою. яко пройду въ мѣсто крова дивна, дaже до дому божія. Во гласѣ рaдованія, и исповѣданія шума прaзднующаго. въскую прискорбна еси душе моя, и въскую смущaеши мя; уповaй нa бога, яко исповѣмся ему, спасеніе лицу моему и богъ мой. Ко мнѣ душа моя смутися, сего рaди помянухъ тя от земли іордaнски и ермоніимски, от горы мaлы. Бездна бездну призывaетъ, во гласѣ хлябіи твоихъ. вся высоты твоя и волны твоя по мнѣ преидоша. Въ день заповѣсть господь милость свою, и нощію пѣснь его от мене. Молитва богу живота моего. реку богу, заступникъ мой еси, почто мя забы; и въскую сѣтуя хожду, внегда стужaетъ врaгъ; Внегда сокрушaхуся кости моя, поношaху ми врази мои, внегда глаголати имъ мнѣ на всякъ день, гдѣ есть богъ твой; Въскую прискорбна еси душе моя, и въскую смущaеши мя; уповaй нa бога, яко исповѣмся ему, спасеніе лицу моему, и богъ мой.
Псаломъ Давыдовъ, 42.
Суди ми боже, и разсуди прю мою, от языка непреподобна, от человека не прaведна и льстива избaви мя. Яко ты еси боже держaва моя, въскую отрину мя, и въскую сѣтуя хожду, внегда стужaетъ врaгъ. Посли свѣтъ твой, и истину твою, тa мя настaвиста, и введоста мя въ гору святую твою, и въ жилища твоя. И вниду къ жертвенику божію, къ богу веселящему юность мою. исповѣмся тебѣ въ гуслѣхъ боже, боже мой. Вскую прискорбна еси душе моя. и вскую смущaеши мя; уповaй нa бога, яко исповѣмся ему. спасеніе лица моего, и богъ мой.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 43.
Боже ушима нaшима услышахомъ, и отцы нaши возвѣстиша нaмъ, дѣло, еже содѣла во днехъ ихъ, во днехъ первыхъ. Рука твоя языки потреби, и насади я. озлоби люди и изгна я. Не оружіемъ своимъ наслѣдиша землю, и мышца ихъ не спасе ихъ. но десница твоя, и мышца твоя, и просвѣщеніе лица твоего, яко благоволилъ еси въ нихъ. Ты еси сaмъ царю мой и боже мой, заповѣдаяи спасенія іaковля. О тебѣ враги нaша избодемъ роги, и о имени твоемъ уничижимъ востaющія на ны. Не нa лукъ бо мой уповaю, и оружіе мое не спасетъ мене. Спaслъ бо еси нaсъ от стужaющихъ нaмъ, и ненавидящихъ нaсъ посрамилъ еси. О бозѣ похвaлимся весь день, и о имени твоемъ исповѣмыся во вѣки. Нынѣ же отрину и посрамилъ еси нaсъ, и не изыдеши боже въ силахъ нaшихъ. Возвратилъ еси нaсъ при вразѣхъ нaшихъ, и ненавидящіи нaсъ расхищaху себѣ. Дaлъ еси нaсъ яко овца снѣди, и въ языцѣхъ разсѣялъ ны еси. Отдaстъ люди своя без цѣны, и не бѣ множество въ восклицaніихъ нaшихъ. Положилъ еси нaсъ поношеніе сосѣдомъ нaшимъ, подражaніе и поругaніе сущимъ окрестъ нaсъ. Положилъ еси нaсъ въ притчу во языцѣхъ, покивaнію главѣ въ людехъ. Весь день срaмъ мой предомною есть, и студъ лица моего покры мя. Отгласа поношaющихъ и оклеветaющихъ, от лица врaжія и изгонящаго. Сія вся пріидоша на ны, и не забыхомъ тебе, и не не прaвдихомъ въ завѣтѣ твоемъ. И не отступи вспять сердце нaше, и уклонилъ еси стези нaша от пути твоего. Яко смирилъ еси нaсъ на мѣстѣ озлобленія, и прикры ны сѣнь смертная. Аще забыхомъ имя бога нaшего, и аще воздѣхомъ руки нaша к богу чуждему. Не богъ ли взыщетъ сихъ; той бо свѣсть тaйная сердца. Яко тебе рaди умерщвяеми есмы весь день, вмѣнихомся яко овца заколенія. Востaни, въскую спиши господи; воскрестни, и не отрини до конца. Въскую лице твое отвращaеши; забывaеши нищету нaшу и печaль нaшу; Яко смирися въ персть душа нaша, прилпе земли утроба нaша. Воскресни господи помози нaмъ, и избaви нaсъ имене рaди твоего.
Псаломъ Давыдовъ, 44.
Отрыгну сердце мое слово благо, глаголю азъ дѣла моя цареви. языкъ мой, трость книжника скорописца. Красенъ добротою пaче сыновъ человеческихъ, изліяся благодaть во устнaхъ твоихъ, сего рaди благослови тя богъ во вѣки. Препояши оружіе свое по бедрѣ твоей сильнѣ. Красотою твоею и добротою твоею, и наляцы и спѣй и царствуй. Истины рaди и кротости и прaвды, и настaвитъ тя дивно десница твоя. Стрѣлы твоя из ощренны сильнѣ, людіе под тобою падутъ въ сердцы врaгъ царевъ. Престолъ твой боже въ вѣкъ вѣка. жезлъ прaвости, жезлъ царствія твоего. Возлюбилъ еси прaвду, и возненавидѣ беззаконіе, сего рaди помaза тя боже богъ твой, елеомъ рaдости пaче причaстникъ твоихъ. Смирну и стaкти и касія от ризъ твоихъ, от тяжестей слоновыхъ, из нихже возвеселиша тя, дщери царей въ чести твоей. Предста царица одесную тебе, въ ризахъ позлащенныхъ одѣянна и преиспещренна. Слыши дщи и виждь, и приклони ухо твое, и забуди люди твоя, и домъ отца твоего. И вожделѣетъ царь добротѣ твоей, яко той есть господь твой, и поклонъишася ему. И дщи тирова съ дaры, лицу твоему помолятся богaтіи людьстіи. Вся слaва дщере царевѣ внутрь, рясны златыми одѣянна, и преиспещренна. Приведутся царю дѣвы въ слѣдъ ея, и искреняя ея приведутся тебѣ. Приведутся въ веселіе и рaдость, введутся въ церковь цареву. Вмѣсто отецъ твоихъ быша сынове твои, устaвиши ихъ князи по всей земли. Помяну имя твое во всякомъ родѣ и родѣ. сего рaди людіе исповѣдятся тебѣ въ вѣкъ, и въ вѣкъ вѣка.
Псаломъ Давыдовъ, 45.
Богъ нaмъ прибѣжище и сила, помощникъ въ скорбѣхъ обрѣтшихъ ны зѣло. Сего рaди не убоимся внегда смущaется земля, и прелагaются горы въ сердца морскaя. Возшумѣша и смутишася воды ихъ, смутишася горы крѣпостію его. Рѣчная устремленія веселятъ грaдъ божіи, освятилъ есть село свое вышніи. Богъ посредѣ его, и не подвижится, поможетъ ему богъ утро за утра. Смутишася языцы, уклонишася царствія, даде глaсъ свой вышніи, потрясеся земля. Господь силамъ съ нaми, заступникъ нaшъ богъ іaковль. Пріидѣте, и видите дѣла божія, яже положи чудеса на земли, отемля брaни до конца земли. Лукъ сокрушитъ, и сломитъ оружіе, и щиты сожжетъ огнемъ. Упразднитеся, и разумѣйте, яко азъ есмь богъ. вознесуся во языцѣхъ, вознесуся на земли. Господь силъ съ нaми, заступникъ нaшъ богъ іaковль.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 7.
Псаломъ Давыдовъ, 46.
Вси языцы восплещите рукaми, воскликните богу глaсомъ рaдости. Яко господь вышніи стрaшенъ, царь веліи по всей земли. Покори люди нaмъ, и языки под ноги нaша. Избра нaмъ достояніе свое, доброту іaковлю юже возлюби. Взыде богъ въ воскликновеніи, господь во гласѣ трубнѣ. Пойте богу нaшему пойте, пойте цареви нaшему пойте. Яко царь всей земли богъ, пойте разумно. Воцарися богъ над языки, богъ сѣдитъ на престолѣ святѣмъ своемъ. Князи людьстіи собрaшася съ богомъ авраaмлемъ, яко божіи держaвніи земли зѣло вознесошася.
Псаломъ Давыдовъ, 47.
Веліи господь, и хвaленъ зѣло, во градѣ бога нaшего, въ горѣ святѣй его. Благокоренномъ рaдованіемъ всея земли, горы сионскія, ребра сѣверова, грaдъ царя великаго. Богъ въ тяжестѣхъ его знaемь есть, егда заступaетъ и. Яко се царіе земстіи собрaшася, снидошася вкупѣ. Тіи видѣвше тaко дивишася, смутишася подвизaшася, трепетъ пріятъ я. Ту болѣзни яко раждaющей. духомъ бурномъ сокрушиши корабли ѳарсійскія. Якоже слышахомъ, тaко и видѣхомъ, во градѣ господа силъ, во градѣ бога нaшего. Богъ основа и въ вѣкъ. пріяхомъ боже милость твою, посредѣ людей твоихъ. По имени твоему боже, тaко и хвала твоя на концыхъ земли, прaвды исполнь десница твоя. Да возвеселится гора сионская, и возрaдуются дщери іудейскія, судебъ рaди твоихъ господи. Обыдите сионъ и пріимѣте и, возвѣстите въ столпѣхъ его. Положите сердца вaша въ силу его, и раздѣлите домъ его, яко да повѣсте въ родѣ иномъ. Яко той есть богъ нaшъ во вѣки и въ вѣкъ вѣка. той упасетъ нaсъ во вѣки.
Псаломъ Давыдовъ, 48.
Услышите сія вси языцы, внушите вси живущіи по вселеннѣй. Земніи же и сынове человечестіи, вкупѣ богaтъ и убогъ. Уста моя возглаголютъ премудрость, и поученіе сердца моего рaзумъ. Приклоню въ притчахъ ухо мое, отверзу во псалтыри ганaніе мое. Въскую боюся въ день лютъ; беззаконіе пяты моея обыдетъ мя. Надѣющіися силѣ своей, и множествомъ богaтства своего хвалящеся. Брaтъ не избaвитъ, избaвитъ ли человекъ; не дaстъ богу измѣны за ся, и цѣну избавленія души своея; и утрудися во вѣки, и живъ будетъ до конца. Не узритъ пaгубы, егда видитъ премудрыя умирaюща. Вкупѣ безуменъ и несмысленъ погибнета, и остaвятъ чуждимъ богaтство свое, и гроби ихъ жилища ихъ во вѣки. Селенія ихъ въ родъ и родъ, нарекоша имена своя на земныхъ. и человекъ въ чести сыи, не разумѣ, приложися скотомъ несмысленымъ и уподобися имъ. Сей путь ихъ соблaзнъ имъ, и посихъ во устѣхъ своихъ благоизволятъ. Яко овца во адѣ положени суть, смерть упасетъ ихъ. и обладaютъ ими прaвіи заутра. И помощь ихъ обетшaетъ во адѣ, от слaвы своея изриновени быша. Обaче богъ избaвитъ душу мою из руки адовы, егда пріемлетъ мя. Не убоюся егда разбогaтѣетъ человекъ, или егда умножится слaва дому его. Яко егда умирaетъ, не остaвитъ ли вся. ниже снидетъ съ нимъ слaва его; Яко душа его въ животѣ его благословится, исповѣстьтися егда благо сотвориши ему. Вселится дaже до рода отецъ своихъ, дaже до вѣка не узритъ свѣта. И человекъ въ чести сыи, не разумѣ, приложися скотѣхъ несмысленыхъ, и уподобися имъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 49.
Богъ богомъ господь глагола, и призва землю, от востокъ солнца до зaпадъ. От сиона благолѣпіе красоты его. Богъ явѣ пріидетъ, богъ нaшъ, и не премолчитъ. огнь пред нимъ возгорится, и окрестъ его буря зѣльна. Призоветъ небо свыше, и землю разсудити люди своя. Соберѣте ему преподобныя его, завѣщaющія завѣтъ его о жертвахъ. И возвѣстятъ небеса прaвду его, яко богъ судія есть. Слышите людіе мои, и возглаголю вaмъ. ізрaилю, и засвидѣтельствую ти. богъ богъ твой есмь азъ. Не о жертвахъ твоихъ обличу тя, всесожженія же твоя предо мною суть выну. Не пріиму от дому твоего тельца, ни от стaдъ твоихъ козлы. Яко мои суть вси звѣріе дубрaвніи, скоти въ горaхъ, и волове. Познaхъ вся птицы небесныя, и красота сельная со мною есть. Аще взaлчу, не реку тебѣ, моя бо есть вселенная, и исполненіе ея. Еда ямъ мяса юнча; или кровь козлію пію; Пожри богови жертву хвалѣ, и воздaждь вышнему молитвы твоя. И призови мя въ день печaли твоея, и избaвлю тя, и прослaвиши мя. Грѣшнику же рече богъ, въскую ты повѣдаеши оправдaнія моя, и воспріемлеши завѣтъ мой устны твоими. Ты же возненавидѣ наказaніе, и отверже словеса моя вспять. Аще видяше тaтя, течaше съ нимъ, и съ прелюбодѣемъ учaстіе свое полагaше. Уста твоя умножиша злобу, и языкъ твой сплетaше льщенія. Сѣдя на брaта своего клеветaше, и нa сына матере своея полагaше соблaзнъ. Сія сотворилъ еси, и умолчaхъ. вознепщевaлъ еси беззаконіе, яко буду тебѣ подобенъ. обличу тя, и предстaвлю пред лицемъ твоимъ грѣхи твоя. Разумѣйте же сія забывaющіи бога, да некогда похититъ и не будетъ избавляяи. Жертва хвалѣ прослaвитъ мя, и ту путь, имже явлю ему спасеніе мое.
Псаломъ Давыдовъ, 50.
Помилуй мя боже по велицѣй милости твоей. И по множеству щедротъ твоихъ, очисти беззаконіе мое. Наипaче омый мя от беззаконія моего, и от грѣха моего очисти мя. Яко беззаконіе мое азъ знaю, и грѣхъ мой предо мною есть выну. Тебѣ единому согрѣшихъ, и лукaвое пред тобою сотворихъ. Яко да оправдишися во словесѣхъ своихъ, и побѣдиши внегда судити. Себо въ беззаконіихъ зачaтъ есмь, и во грѣсѣхъ роди мя мати моя. Себо истину возлюбилъ еси, безвѣстная и тaйная премудрости твоея, явилъ ми еси. Окропиши мя vссопомъ, и очищуся. омыеши мя, и пaче снѣга убѣлюся. Слуху моему дaси рaдость и веселіе, возрaдуются кости смиренныя. Отврати лице твое от грѣхъ моихъ, и вся беззаконія моя очисти. Сердце чисто созижди во мнѣ боже, и духъ прaвъ обнови во утробѣ моей. Не отверзи мене от лица твоего, и духа твоего святaго не отими от мене. Воздaждь ми рaдость спасенія твоего, и духомъ владычномъ утверди мя. Научу беззаконныя путемъ твоимъ, и нечестивіи к тебѣ обратятся. Избaви мя от кровій боже, боже спасенія моего, возрaдуется языкъ мой прaвдѣ твоей. Господи устнѣ мои отверзеши, и уста моя возвѣстятъ хвалу твою. Яко аще бы восхотѣлъ жертвѣ, дaлъ быхъ убо. всесожженія не благоволиши. Жертва богу духъ сокрушенъ. сердце сокрушено и смирено богъ не уничижитъ. Ублажи господи благоволеніемъ твоимъ сиона, и да созиждутся стѣны іеросалимскія. Тогда благоволиши жертву прaвдѣ, возношеніе и всесожегaемая. Тогда возложaтъ на олтaрь твой тельца.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 51.
Что ся хвaлиши въ злобѣ сильне беззаконіемъ; весь день не прaвду умысливъ. языкъ твой яко бритва изощренна, сотворилъ еси лесть. Возлюбилъ еси злобу, пaче благостыни, не прaвду, неже глаголати прaвду. Возлюбилъ еси вся глаголы потопныя, языкъ льстивъ. Сего рaди богъ разрушитъ тя до конца, восторгнетъ тя и преселитъ тя от селенія твоего, и корень твой от земли живыхъ. Узрятъ прaведніи и убоятся, и о немъ возсмѣются и рекутъ. Сей человѣкъ, иже не положи бога помощника себѣ, но упова на множество богaтства своего, и возможе суетою своею. Азъ же яко мaслина плодовита въ дому божіи, уповaхъ на милость божію во вѣки, и въ вѣкъ вѣка. Исповѣмся тебѣ во вѣки, яко сотворилъ еси. и терплю имя твое яко благо, пред преподобными твоими.
Псаломъ Давыдовъ, 52.
Рече безуменъ въ сердцы своемъ, нѣсть бога. Растлѣша и омразишася въ беззаконіихъ, нѣсть творяи благостыню. Богъ съ небесе приниче нa сыны человѣческія, видѣти, аще есть разумѣвaя, или взыскaя бога; Вси уклонишася, вкупѣ непотребни быша. нѣсть творяи благое, нѣсть до единаго. Ни ли разумѣютъ вси дѣлающіи беззаконіе, снѣдaющіи люди моя въ хлѣба мѣсто; Б3а не призвaша, тaмо устрашишася стрaха, идѣже не бѣ стрaха. Яко богъ разсыпа кости человекоугодникомъ. постыдѣшася, яко богъ уничижи ихъ. Кто дaстъ от сиона спасеніе ізрaилево; внегда возвратитъ богъ плѣненіе людей своихъ, возрaдуется іaковъ, и возвеселится ізрaиль.
Псаломъ Давыдовъ, 53.
Боже во имя твое спаси мя, и въ силѣ твоей суди ми. Боже услыши молитву мою, внуши глаголы устъ моихъ. Яко чуждіи востaша на мя, и крѣпцыи взыскaша душу мою, и не предложиша бога пред собою. Себо богъ помогaетъ ми, и господь заступникъ души моей. Отвратитъ злaя врагомъ моимъ, истиною твоею потреби ихъ. Волею пожру тебѣ, исповѣмся имени твоему господи, яко благо. Яко от всякія печaли избaви мя. и на враги моя воззрѣ око мое.
Псаломъ Давыдовъ, 54.
Внуши боже молитву мою, и не презри моленія моего. воньми ми, и услыши мя. Возскорбѣхъ печaлію моею, и смутихся, от гласа врaжія и отстуженія грѣшнича. Яко уклониша на мя беззаконіе, и во гнѣвѣ враждовaху ми. Сердце мое смутися во мнѣ, и стрaхъ смерти нападе на мя. Боязнь и трепетъ пріиде на мя, и покры мя тма. И рѣхъ, кто дaстъ ми крилѣ яко голуби; и полещу, и почію. Се удалихся бѣгая, и водворихся въ пустыни. Чaяхъ бога спасaющаго мя, от малодушія и бури. Потопи господи, и раздѣли языки ихъ. яко видѣхъ беззаконіе, и пререкaніе во градѣ. День и нощь обыдетъ и по стѣнaмъ его, беззаконіе и трудъ посредѣ его, и не прaвда. И не оскудѣ от путей его лихва и лесть. Яко аще бы врaгъ поносилъ ми, претерпѣлъ быхъ убо. И аще бы ненавидяи мя на мя велерѣчевалъ, укрылбыхся от него. Ты же человече равнодушне, владыко мой и знaемыи мой, иже купно насладилъ мя еси брaшна, во храмѣ божіи ходиховѣ единомышленіемъ. Да пріидетъ же смерть на ня, и снидутъ во адъ живи. яко лукaвство въ жилищихъ ихъ, посредѣ ихъ. Азъ къ богу возвaхъ, и господь услыша мя. Вечеръ и заутра и полудне, повѣмъ и возвѣщу, и услышитъ глaсъ мой. Избaвитъ миромъ душу мою от приближaющихся мнѣ, яко во мнозѣ бяху со мною. Услышитъ богъ, и смиритъ ихъ, сыи прежде вѣкъ. Нѣсть бо имъ измѣненія, яко не убояшася бога. Простретъ руку свою на воздаяніе, оскверниша завѣтъ его. Раздѣлишася от гнѣва лица его, и приближишася сердца ихъ. умякнуша словеса ихъ пaче елея, и та суть стрѣлы. Возверзи нa господа печaль твою, и той тя препитaетъ. не дaстъ въ вѣкъ молвы прaведнику. Ты же боже низведеши ихъ въ студенецъ истлѣнія. Мужіе крови и льсти, не преполовятъ дней своихъ, азъ же господи уповaю на тя.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 8.
Псаломъ Давыдовъ, 55.
Помилуй мя боже, яко попрa мя человѣкъ, весь день боря стужи ми. Попрaша мя врази мои весь день, яко мнози борющіи мя свыше. Въ день не убоюся, азъ же уповaю на тя. О бозѣ похвалю словеса моя, нa бога уповaхъ, не убоюся что сотворитъ мнѣ плоть; Весь день словесъ моихъ гнушaхуся, на мя вся помышленія ихъ на зло. Вселятся и скрыютъ, тіи пяту мою хранятъ. Якоже потерпѣша душу мою, ни о чесомъ же остaвиши ихъ. гнѣвомъ люди низбіеши. Боже животъ мой возвѣстихъ тебѣ, положилъ еси слезы моя пред собою, яко и во обѣтовaніи твоемъ. Да возвратятся врази мои вспять, воньже день аще призову тя. се познaхъ, яко богъ мой еси ты. О бозѣ похвалю глаголъ, о господѣ похвалю слово. Нa бога уповaхъ, не убоюся что сотворитъ мнѣ человѣкъ; Во мнѣ боже молитвы, яже воздaмъ хвалѣ твоей. Яко изятъ душу мою от смерти, очи мои от слезъ, и нозѣ мои от поползновенія. благоугожду пред господемъ, во свѣтѣ живыхъ.
Псаломъ Давыдовъ, 56.
Помилуй мя боже, помилуй мя, яко на тя упова душа моя. И на сѣнь крилу твоею надѣюся, дондеже прейдетъ беззаконіе. Воззову къ богу вышнему, богу благодѣявшему мнѣ. Посла съ небесе, и спасе мя. даде въ поношеніе попирaющія мя. Посла богъ милость свою, и истину свою, и изятъ душу мою от среды скименъ. поспaхъ смущенъ. Сынове человѣчестіи, зубы ихъ оружія и стрѣлы, и языкъ ихъ мечь остръ. Вознесися на небеса боже, и по всей земли слaва твоя. Сѣть уготоваша ногaмъ моимъ, и смириша душу мою. Ископaша пред лицемъ моимъ яму, и впадошася въ ню. Готово сердце мое боже, готово сердце мое, пою и воспою въ слaвѣ моей. Востaни слaва моя, востaни псалтырю и гусли, востaну рaно. Исповѣмся тебѣ въ людѣхъ господи, пою тебѣ во языцѣхъ. Яко возвеличися до небесъ милость твоя, и дaже до облакъ истина твоя. Вознесися на небеса боже, и по всей земли слaва твоя.
Псаломъ Давыдовъ, 57.
Аще воистину убо прaвду глаголете, прaвая судите сынове человѣчестіи. Ибо въ сердцы беззаконіе дѣлаете на земли, не прaвду руки вaша сплетaютъ. Очуждени быша грѣшницы от ложеснъ, заблудиша от чрева, глаголаша лжу. Ярость ихъ по подобію зміину, яко аспида глуха затыкaющаго уши свои. Иже неслышитъ глaса обавaющихъ. обавaемъ, обавaется от премудра. Богъ сокрушитъ зубы ихъ во устѣхъ ихъ, и члѣновныя львомъ сокрушилъ есть господь. Уничижaтся яко вода мимотекущая, напряжетъ лукъ свой дондеже изнемогутъ. Яко воскъ растaявъ отимутся. паде огнь на нихъ, и невидѣша солнца. Прежде дaже разумѣти тернія вaшего рaмна, яко живы, яко во гнѣвѣ пожретъ ихъ. Возвеселится прaведникъ, егда видитъ отмщеніе, руцѣ свои умыетъ въ крови грѣшника. И речетъ человекъ, аще убо есть плодъ прaведника, аще есть богъ судя имъ на земли.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 58.
Изми мя от врaгъ моихъ боже, и от востaющихъ на мя избaви мя. Изми мя от творящихъ беззаконіе, и от мужь крове спаси мя. Яко се уловиша душу мою, нападоша на мя крѣпцыи. Ни беззаконіе мое, ни грѣхъ мой господи. Без беззаконія текохъ, и напрaвихъ. Востaни въ стрѣтеніе мое, и виждь. и ты господи боже силъ, боже ізрaилевъ. Воньми посѣтити вся языки, не ущедриши вся дѣлающія беззаконіе. Возвратятся нa вечеръ, и взaлчутъ яко пси, и обыдутъ грaдъ. Се тіи отвѣщaютъ усты своими, и оружіе во устнaхъ ихъ. яко кто слыша; И ты господи посмѣешися имъ, уничижиши вся языки. держaву мою к тебѣ сохраню. Яко ты боже заступникъ мой еси. богъ мой, милость его предваритъ мя. Богъ мой явитъ мнѣ на вразѣхъ моихъ. не убій ихъ, да некогда забудутъ законъ твой. Разжени ихъ силою твоею, и низложи ихъ защитниче мой господи. Грѣхъ устъ ихъ, слово устенъ ихъ, и яти будутъ въ гордыни своей. И от клятвы и лжи возвѣстятся въ кончинѣ, во гнѣвѣ кончины, и небудутъ. И увѣдятъ, яко богъ обладaетъ іaковомъ и концы земли. Возвратятся нa вечеръ, и взaлчутъ яко пси, и обыдутъ грaдъ. Тіи разыдутся ясти. аще ли же ненасытятся и поропщутъ. азъ же воспою силу твою, и возрaдуюся заутра милости твоей. Яко бысть заступникъ мой, и прибѣжище мое, въ день печaли моея. Помощникъ мой еси тебѣ пою. яко богъ помощникъ мой есть, боже мой милость моя.
Псаломъ Давыдовъ, 59.
Боже отринулъ ны еси, и низложилъ еси нaсъ. разгнѣвался еси, и ущедрилъ еси нaсъ. Стряслъ еси землю, и смути ю. исцѣли сокрушеніе ея, яко подвижася. Явилъ еси людемъ своимъ жестокая. напоилъ еси нaсъ виномъ умиленія. Дaлъ еси боящимся тебе знaменіе, еже убѣжaти от лица лука. Яко да избaвятся возлюбленіи твои, спаси десницею твоею, и услыши мя. Богъ возглагола во святѣмъ своемъ, возрaдуюся и раздѣлю сикиму, и юдоль жилищь размѣрю. Мой есть галаaдъ, и мой есть манасій, и ефремъ крѣпость главы моея. Іуда царь мой. моaвъ конобъ уповaнія моего. На идумею простру сапогъ мой, мнѣ иноплеменницы покоришася. Кто введетъ мя во градъ обстоянія; или кто настaвитъ мя до идумея; Не ты ли боже отринувыи нaсъ; и не изыдеши боже въ силахъ нaшихъ. Дaждь нaмъ помощь от печaли, и суетно спасеніе человеческо. О бозѣ сотворимъ силу, и той уничижитъ стужaющія нaмъ.
Псаломъ Давыдовъ, 60.
Услыши боже моленіе мое, воньми молитвѣ моей. От конецъ земли к тебѣ возвaхъ. егда уны сердце мое, на кaмень вознесе мя. Настaвилъ мя еси, яко бысть уповaніе мое, столпъ крѣпости от лица врaжія. Вселюся въ жилищи твоемъ во вѣки, покрыюся въ кровѣ крылъ твоихъ. Яко ты боже услыша молитвы моя, дaлъ еси достояніе боящимся имене твоего. День от дне цареви приложиши лѣта его, до дне рода и рода. Пребывaетъ въ вѣкъ пред богомъ. милость и истину его кто взыщетъ; Тaко пою имени твоему во вѣки, воздaти ми молитвы моя день дне.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 61.
Не богу ли повинется душа моя; от того бо спасеніе мое. Ибо той богъ мой, и спасъ мой, заступникъ мой, неподвижуся пaче. Доколѣ належите на человека. убивaете вси вы, яко стѣну преклонену, и плоть возриновенъ. Обaче цѣну мою совѣщaша отринути, текоша въ жaжди. Усты своими благословляху, и сердцемъ своимъ кленяху. Обaче богови повинися душе моя, яко от того терпѣніе мое. Ибо той богъ мой, и спасъ мой заступникъ мой, неподвижуся. О бозѣ спасеніе мое и слaва моя. Богъ помощи моея, и уповaніе мое нa бога. уповaйте нaнь весь сонмъ людей, изліяйте пред нимъ сердца вaша, яко богъ помощникъ нaшъ. Обaче суетни сынове человечестіи, лживи сынове человечестіи, въ мѣрилѣхъ не оправдити, тіи от суеты вкупѣ. Не уповaйте на не прaвду, и на восхищеніе не желaйте. богaтство аще течетъ не прилагaйте сердца. Единою глагола богъ, двое се слышахъ. яко держaва божія, и твоя господи милость, яко ты воздaси комуждо по дѣломъ его.
Псаломъ Давыдовъ, 62.
Боже боже мой, к тебѣ утренюю. возжада тебе душа моя, коль множицею тебѣ плоть моя. въ земли пустѣ и не проходнѣ и безводнѣ. Тaко во святѣмъ явихся тебѣ видѣти силу твою, и слaву твою. Яко лучше милость твоя пaче животъ, устнѣ мои похвалитѣ тя. Тaко благословлю тя въ животѣ моемъ, о имени твоемъ воздежу руцѣ мои. Яко от тука и мaсти исполнися душа моя, и устнѣ рaдости восхвaлятъ тя уста моя. Аще поминaхъ тя на постели моей, на утренихъ поучaхся въ тя. Яко бысть помощникъ мой, и въ кровѣ крылу твоею возрaдуюся. Прильпе душа моя по тебѣ, мене же пріятъ десница твоя. Тіи же всуе искaша душу мою, внидутъ въ преисподняя земли. Предадятся въ руки оружію, чaсти лисовомъ будутъ. Царь же возвеселится о бозѣ, похвaлится всякъ кленыися имъ. Яко заградишася уста глаголющихъ не прaвду.
Псаломъ Давыдовъ, 63.
Услыши боже молитву мою, внегда молитимися к тебѣ, от страха врaжія изми душу мою. Покрый мя от сонма лукaвнующихъ, и от множества дѣлающихъ не прaвду. Иже изостриша яко оружіе языки своя, напрягоша лукъ свой вещь горьку. Сострѣляти въ тaйныхъ непорочна. внезaпу сострѣляютъ его, и не убоятся. Утвердиша себѣ слово лукaво, повѣдаша скрыти сѣть. рѣша, кто узритъ ихъ; Испытaша беззаконіе, исчезоша испытaющіи испытaнія. приступитъ человѣкъ, и сердце глубоко, и вознесется богъ. Стрѣлы младенецъ быша язвы ихъ, и изнемогоша въ нихъ языцы ихъ. Смутишася вси видящіи ихъ, и убояся всякъ человекъ. И возвѣстиша дѣла божія, и творенія его разумѣша. Возвеселится прaведникъ о господѣ, и уповaетъ нaнь. и похвaлятся вси прaвіи сердцемъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 9.
Псаломъ Давыдовъ, 64.
Тебѣ подобaетъ пѣснь боже въ сионѣ, и тебѣ воздaстся молитва во іерусалимѣ. Услыши молитву мою, к тебѣ всяка плоть пріидетъ. Словеса беззаконникъ премогоша нaсъ, и нечестія нaша ты очистиши. Блаженъ егоже избра и пріятъ, и вселиши во дворы своя. Исполнимся во благихъ дому твоего. свята церкви твоя дивна въ прaвду. Услыши ны боже спасителю нaшъ, уповaніе всѣмъ концемъ земли, и сущимъ въ мори далече. Готовая горы крѣпостію своею, препоясанъ силою. Смущaяи глубины морскія, шуму волнъ его кто постоитъ; Смутятся языцы, и убоятся живущіи въ концыхъ от знaменіи твоихъ. Исходы утру и вечеру украсиши. посѣтилъ еси землю и упои ея, умножилъ еси обогaтити ея. Рѣка божія наполнися водъ. уготовалъ еси пищу имъ, яко тaко есть уготованіе. Бразды ея упои, умножи жита ея, въ кaпляхъ ея возвеселится возсіяющи. Благословиши вѣнецъ лѣту благости твоея, и поля твоя насытятся тука. Разботѣютъ крaсная пустыня, и рaдостію холми препояшутся. Одѣяшася овни овчіи, и удолія умножатъ пшеницу. воззовутъ, ибо воспоютъ.
Псаломъ Давыдовъ, 65.
Воспойте господеви вся земля, пойте же имени его, дадите слaву хвалѣ его. Рцѣте богу, коль стрaшна дѣла твоя; во множествѣ силы твоея, солжутъ тебѣ врази твои. Вся земля да поклонъиттися, и поетъ тебѣ, да поетъ же имени твоему вышніи. Пріидѣте и видите дѣла божія, коль стрaшенъ въ совѣтѣхъ пaче сыновъ человеческихъ. Обращaяи море въ сушу, въ рѣцѣ пройдутъ ногaми. Ту возвеселимся о немъ, обладaющему силою своею вѣку. Очи его на языки призирaетѣ. прогнѣвающіи да не возносятся въ себѣ. Благословите языцы бога нaшего, и услышанъ сотворите глaсъ хвалы его. Положьшаго душу мою въ животъ, и недaвшаго во смятеніе ногъ моихъ. Яко искусилъ ны еси боже, разже ны, якоже разжизaется сребро. Ввелъ ны еси въ сѣть. положи скорби на хребтѣ нaшемъ. Возведе человеки на главы нaша. проидохомъ сквозѣ огнь и воду, и изведе нaсъ въ покой. Вниду въ домъ твой со всесожженіемъ, воздaмъ тебѣ молитвы моя, яже изрекостѣ устнѣ мои, и глаголаша уста моя въ печaли моей. Всесожженія тучна вознесу тебѣ съ кадиломъ и овны, воздaмъ тебѣ волы съ козлы. Пріидѣте услышите, и повѣмъ вaмъ вси боящіися бога, елика сотвори души моей. Къ нему усты моими возвaхъ, и вознесохъ под языкомъ моимъ. Не прaвду аще позрѣхъ въ сердцы моемъ, да не услышитъ мене господь. Сего рaди услыша мя богъ, внятъ глaсъ моленія моего. благословенъ богъ, иже не отстaви молитву мою, и милость свою от мене.
Псаломъ Давыдовъ, 66.
Боже ущедри ны, и благослови ны, просвѣти лице твое на ны и помилуй ны. Познaти на земли путь твой, во всѣхъ языцѣхъ спасеніе твое. Да исповѣдятся тебѣ людіе боже, да исповѣдятся тебѣ людіе вси. Да возвеселятся и возрaдуются языцы, яко судиши людемъ прaвотою, и языки на земли настaвиши. Да исповѣдятся тебѣ людіе боже, да исповѣдятся тебѣ людіе вси. Земля даде плодъ свой. благослови ны боже, боже нaшъ. Благослови ны боже, и да убоятся его вси концы земли.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 67.
Да воскрестнетъ богъ, и разыдутся врази его. и да бѣжaтъ от лица его не навидящіи его. Яко исчезaетъ дымъ, да исчезнутъ. яко тaетъ воскъ от лица огня, тaко да погибнутъ грѣшницы от лица божія. А прaведницы да возвеселятся, возрaдуются пред богомъ, насладятся въ веселіи. Воспойте богу, пойте имени его. путь сотворите возшедшему на зaпады. господь имя его, и рaдуйтеся пред нимъ. Смятутся от лица его, отца сирыхъ, и судіи вдовицъ. богъ въ мѣстѣ святѣмъ своемъ. Богъ вселяетъ единомысленыя въ домъ, возводя оковaнныя мужествомъ. тaкожде прогнѣвающія, живущія во гробѣхъ. Боже егда исхождaше пред людьми своими, егда мимо хождaше въ пустыни, земля потрясеся. ибо небеса кaнуша от лица бога синaина, от лица бога ізраилева. Дождь воленъ отлучиши боже достоянію твоему, и изнеможе, ты же соверши е. Животная твоя живутъ на ней, уготовалъ еси благостію твоею нищему боже. Господь дaстъ глаголъ благовѣствующимъ силу многу. Царь силъ возлюбленнаго, лѣпотою дому раздѣлити корысть. Аще поспите посредѣ предѣлъ, крилѣ голубинѣ посребренѣ, и междорaмія ея, въ блещaніи злaта. Егда рaзньствитъ небесныи царя на ней, оснѣжaтся въ селмонѣ. Гора божія, гора тучнaя. гора усыренная, гора тучнaя. Въскую непщуете горы усыренныя, гора юже благоволи богъ жити въ ней. Ибо господь вселится до конца, колесница божія тмaми темъ, тысяща гобзующихъ. господь въ нихъ въ синaйнѣ во святѣмъ. Возшелъ еси на высоту, плѣнилъ еси плѣнъ. пріялъ еси даянія въ человѣцѣхъ, ибо не покаряющіяся еже вселитися. Господь богъ благословенъ, благословенъ господь день дне. поспѣшитъ нaмъ богъ спасеніи нaшихъ. Богъ нaшъ богъ спасaти. и господня господня исходища смертная. Обaче богъ сокрушитъ главы врaгъ своихъ, верхъ влaсъ преходящихъ въ прегрѣшеніихъ своихъ. Рече господь, от васaна обращу, обращу въ глубинaхъ морскихъ. Яко да омочится нога твоя въ крови, языкъ песъ твоихъ от врaгъ от него. Видѣна быша шествія твоя боже, шествія бога моего царя, еже во святѣмъ. Предвариша князи близъ поющихъ, посредѣ дѣвъ тимпaнницъ. Въ церквахъ благословите бога господа, от источникъ ізраилевъ. Ту веніаминь юноша во ужасѣ. князи іудови владыки ихъ, князи заулони, князи неѳфалимли. Заповѣждь боже силу твою, укрѣпи боже се, еже содѣла въ нaсъ. От церкве твоея, во іерусалимъ. тебѣ принесутъ цaріе дaры. Запрѣти звѣремъ тростнымъ, сонмъ юнецъ въ юницахъ людскихъ, затворити искушенныя сребромъ. разруши языки хотящія брaнемъ. Пріидутъ молитвеницы от египта, еѳіопія, предваритъ рука ея к богу. Царствія земнaя пойте богу, воспойте господеви, возшедшему нa небо небесное на востоки. Се дaстъ глaсъ свой, глaсъ силы. дадите слaву богови. на ізрaили велелѣпота его, и сила его на облацѣхъ. Дивенъ богъ во святыхъ своихъ, богъ ізраилевъ. той дaстъ силу и держaву людемъ своимъ, благословенъ богъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 68.
Спаси мя боже, яко внидоша воды до души моея. Углѣбохъ въ тимѣніи глубины, и нѣсть постоянія. Пріидохъ въ глубины морскія, и буря потопи мя. Утрудихся зовы, измолче гортaнь мой. исчезостѣ очи мои, уповaющу ми нa бога моего. Умножишася пaче влaсъ главы моея, ненавидящіи мя всуе. укрѣпишася врази мои, изгонящіи мя без прaвды. яже невосхищaхъ, тогда воздаяхъ. Боже ты увѣдѣ безуміе мое, и прегрѣшенія моя от тебе не утаишася. Да не постыдятся о мнѣ терпящіи тебе господи, господи силъ. ниже посрaмятся о мнѣ ищущіи тебе боже ізраилевъ. Яко тебе рaди пріяхъ поношеніе, покры срамота лице мое. Чуждь быхъ брaтіи моей, и стрaненъ сыновомъ мaтере моея. Яко ревность дому твоего снѣсть мя, и поношеніе поносящихъ ти, нападоша на мя. И покрыхъ постомъ душу мою, и бысть въ поношеніе мнѣ. И положихъ одѣяніе мое вретище, и быхъ имъ въ притчу. О мнѣ глумляхуся сѣдящіи во вратѣхъ, и о мнѣ пояху піющіи вино. Азъ же молитвою моею к тебѣ боже, время благоволенія. боже, во множествѣ милости твоея услыши мя, воистинѣ спасенія твоего. Спаси мя от бренія да не углѣбну, избaви мя от ненавидящихъ мя, и от глубокихъ водъ. Да не потопитъ мене буря воднaя, ниже пожретъ мене глубина, ниже сведетъ о мнѣ ровеникъ устъ своихъ. Услыши мя господи, яко блага милость твоя. по множеству щедротъ твоихъ призри на мя. Не отврати лица твоего от отрока твоего, яко скорблю, скоро услыши мя. Воньми души моей и избaви ея, врaгъ моихъ рaди избaви мя. Ты бо свѣси поношеніе мое, и студъ мой, и срамоту мою. пред тобою вси стужaющіи ми. Поношеніе причaя душа моя и стрaсть. и ждaхъ иже со мною поскорбитъ, и не бѣ, и утѣшaющихъ, и не обрѣтохъ. И дaша въ снѣдь мою желчь, и въ жaжду мою напоиша мя оцта. Да будетъ трапеза ихъ пред ними въ сѣть, и въ воздаяніе, и въ соблaзнъ. Помрачитѣся очи ихъ не видѣти, и хребетъ ихъ от нюдъ преклони. Пролей на ня гнѣвъ твой, и ярость гнѣва твоего постигнетъ ихъ. Да будетъ дворъ ихъ пустъ, и въ жилищихъ ихъ да небудетъ живущаго. Зане егоже ты порази, тіи погнaша. и къ болѣзни язвъ моихъ приложиша. Приложи беззаконіе къ беззаконію ихъ, и да не внидутъ въ прaвду твою. Да потребятся от книгъ живущихъ, и съ прaведными не напишутся. Нищь и боля есмь азъ, спасеніе твое боже пріятъ мя. Восхвалю имя бога моего съ пѣснію, и возвеличу его во хваленіи. И угодно будетъ богу, пaче тельца юна, роги издающа и пaзнокти. Да узрятъ нищіи и возвеселятся. взыщите бога и жива будетъ душа вaша. Яко услыша нищія господь, и оковaнныхъ своихъ не уничижитъ. Да восхвaлятъ его небеса и земля, море, и вся живущая въ немъ. Яко богъ спасетъ сиона, и созиждутся грaди іудейстіи, и вселятся тaмо и наслѣдятъ и. И сѣмя рaбъ твоихъ удержитъ и, и любящіи имя твое, вселятся въ немъ.
Псаломъ Давыдовъ, 69.
Боже въ помощь мою воньми, господи помощи ми потщися. Да постыдятся, и посрaмятся ищущіи душу мою. Да возвратятся вспять и постыдятся, мыслящіи ми злaя. Да возвратятся абіе стыдящеся, глаголющіи ми блaгоже блaгоже. Да возрaдуются и возвеселятся о тебѣ, вси ищущіи тебе боже. И глаголютъ выну, да возвеличится господь любящіи спасеніе твое. Азъ же нищь есмь и убогъ, боже помози ми. Помощникъ мой и избaвитель мой еси ты господи не закосни.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 10.
Псаломъ Давыдовъ, 70.
На тя господи уповaхъ, да непостыжуся въ вѣкъ. прaвдою твоею изми мя и избaви мя. Приклони ко мнѣ ухо твое и спаси мя. Буди ми въ богъ защититель, и въ мѣсто крѣпко спасти мя. яко утверженіе мое, и прибѣжище мое еси ты. Боже мой изми мя из руки грѣшнаго, из руки законопреступнаго и обидящаго. Яко ты еси терпѣніе мое господи, господи уповaніе мое от юности моея. Въ тебѣ утвердихся от утробы, от чрева мaтере моея, ты еси мой покровитель. О тебѣ пѣніе мое выну. яко чудо быхъ многимъ, и ты помощникъ мой крѣпокъ. Да исполнятся уста моя похвалы, яко да воспою слaву твою, весь день великолѣпіе твое. Не отверзи мене во время стaрости, внегда исчезaти крѣпости моей не остaви мене. Яко рѣша врази мои мнѣ, и стрегущіи душу мою совѣщaша вкупѣ. Глаголюще, богъ остaвилъ есть его. поженѣте и имѣте его, яко нѣсть избавляяи. Боже мой, не удалися от мене, боже мой въ помощь мою воньми. Да постыдятся, и исчезнутъ оклеветaющіи душу мою. да облекутся въ студъ и срaмъ ищущіи злaя мнѣ. Азъ же всегда уповaю на тя, и приложу, на всяку похвалу твою. Уста моя возвѣстятъ прaвду твою, весь день спасеніе твое. Яко не познaхъ книжна вниду въ силѣ господни. господи помяну прaвду твою единого. Боже мой, яже научилъ мя еси от юности моея. и до нынѣ возвѣщу чудеса твоя. И дaже до стaрости и мaторьства. боже мой, не остaви мене. дондеже возвѣщу мышцу твою роду всему грядущему. Силу твою, и прaвду твою боже, дaже до вышнихъ, яже сотворилъ ми еси величія. боже кто подобенъ тебѣ. Елики явилъ ми еси скорби многи и злы, и обрaщь оживилъ мя еси, и от безднъ земли возведе мя. Умножилъ еси на мнѣ величествіе твое, и обрaщь утѣшилъ мя еси. и от безднъ земли пaки возведе мя. Ибо азъ исповѣмся тебѣ въ людехъ господи, въ сосудѣхъ псаломскихъ истину твою боже. пою тебѣ въ гуслѣхъ, святыи ізраилевъ. Возрaдуетася устнѣ мои егда пою тебѣ, и душа моя юже еси избaвилъ. еще же и языкъ мой весь день поучится прaвдѣ твоей. Егда постыдятся и посрaмятся ищущіи злaя мнѣ.
Псаломъ Давыдовъ, 71.
Боже судъ твой цареви дaждь, и прaвду твою сыну цареву. Судити людемъ твоимъ въ прaвду, и нищимъ твоимъ въ судъ. Да воспріимутъ горы миръ людей, и холми прaвду. Судитъ нищимъ людскимъ, и спасетъ сыны убогихъ, и смиритъ клеветника. И пребудетъ съ солнцемъ, и прежде луны рода родовъ. Снидетъ яко дождь на руно, и яко кaпля кaплющая нa землю. Возсіяетъ во днехъ его прaвда и множество мира, дондеже отимется луна. И обладaетъ от моря и до моря, и от рѣкъ до конецъ вселенныя. Пред нимъ припадутъ еѳіопляне, и врази его персть полижутъ. Цaріе ѳарсійстіи и острови, дaры принесутъ. цaріе арaвстіи и сaва, дaры приведутъ. И поклонъятся ему вси цaріе земстіи, вси языцы поработаютъ ему. Яко избaви нища от сильна и убога, емуже не бѣ помощника. Пощадитъ нища и убога, и душа убогихъ спасетъ. От лихвы и от не прaвды избaвитъ душа ихъ, и честно имя его пред ними. И живъ будетъ, и дaстся ему от злaта аравіиска, и помолятся о немъ выну, весь день благословятъ и. Будетъ утверженіе на земли на верхъ горъ. превознесется пaче ливaна плодъ его, и процвѣтутъ от града яко трава земнaя. Будетъ имя его благословено во вѣки, прежде солнца пребывaетъ имя его. И благословятся о немъ вся колѣна земнaя, вси языцы ублажaтъ и. Благословенъ господь богъ ізраилевъ, творяи чудеса единъ. И благословено имя слaвы его во вѣки, и въ вѣкъ вѣка. И исполнится слaвы его вся земля, будетъ будетъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 72.
Коль благъ богъ ізраилевъ, прaвымъ сердцемъ. Мнѣ же вмaлѣ не подвижaстѣся нозѣ, вмaлѣ не проліяшася стопы моя. Яко возревновaхъ на беззаконныя, миръ грѣшникомъ зря. Яко нѣсть восклоненія въ смерти ихъ, и утверженіе въ рaнѣ ихъ. Въ трудѣхъ человеческихъ не суть, и съ человеки не пріимутъ рaнъ. Сего рaди удержа ихъ гордыня до конца, одѣяшася не прaвдою и нечестіемъ своимъ. Изыдетъ яко исъ тука не прaвда ихъ, преидоша въ любовь сердца. Помыслиша и глаголаша въ лукaвствѣ, не прaвду въ высоту глаголаша. Положиша нa небеси уста своя, и языкъ ихъ прейде по земли. Сего рaди обратятся людіе мои сѣмо, и дніе исполнь обрящутся въ нихъ. И рѣша, кaко увѣдѣ богъ; и аще есть рaзумъ въ вышнѣмъ; Се сіи грѣшницы, и гобзующе въ вѣкъ удержaша богaтство. И рѣхъ, еда всуе оправдихъ сердце мое, и умыхъ въ неповинныхъ руцѣ мои. И быхъ язвенъ весь день, и обличникъ мой на утренихъ. Аще глаголахъ повѣмъ тaко се роду сыновъ твоихъ емуже обѣщaхся, и непщевaхъ разумѣти. Се трудъ есть предо мною, дондеже вниду въ святило божіе, и разумѣю въ послѣдняя ихъ. Обaче зальщенія ихъ, положилъ имъ еси злaя, низложилъ я еси внегда разгордѣти. Кaко быша въ запустѣніе; внезaпу исчезоша, и погибоша за беззаконіе свое яко соніе востaющаго. Господи во градѣ твоемъ образъ ихъ уничижиши. Яко раждьжеся сердце мое, и утробы моя измѣнишася. И азъ уничиженъ и неразумѣхъ, скотенъ быхъ у тебе, и азъ выну съ тобою. Удержaлъ еси руку десную мою, и съ совѣтомъ твоимъ настaвилъ мя еси, и съ слaвою пріятъ мя. Что бо ми есть нa небеси. и от тебе что восхотѣхъ на земли. Исчезе сердце мое и плоть моя, боже сердца моего, и чaсть моя боже во вѣки. Яко се удаляющіися от тебе погибнутъ, потребилъ еси всякого любы дѣющаго от тебе. Мнѣ же прилѣплятися богови блaго есть, и полагaти нa господа уповaніе мое. Возвѣстити ми вся хвалы твоя, во вратѣхъ дщере сиони.
Псаломъ Давыдовъ, 73.
Въскую боже отрину до конца, разгнѣвася ярость твоя на овца пaствы твоея; Помяни сонмъ твой, иже стяжа исперва. избaвилъ еси жезлъ достоянія твоего, гора сионъ си яже вселися въ ней. Воздвигни руцѣ твои на гордыни ихъ въ конецъ, елика лукaвнова врaгъ во святѣмъ твоемъ. И восхвалишася не навидящіи тя, посредѣ прaздника твоего. Положиша знaменія своя, знaменія и непознaша. Яко во исходѣ превыше. яко въ дубрaвѣ древянѣ, сѣкирами разсѣкоша двери его вкупѣ, сѣчивомъ и оскордомъ разрушиша и. Завжегоша огнемъ святило твое, на земли оскверниша жилище имене твоего. Рѣша въ сердцыхъ своихъ южики ихъ вкупѣ, пріидѣте и отстaвимъ вся прaздники божія от земли. Знaменія ихъ не видѣхомъ, нѣсть к тому пророка, и нaсъ не познaетъ к тому. Доколѣ боже поношaетъ врaгъ, раздражaетъ противныи имя твое до конца. Въскую отвращaеши руку твою, и десницу твою от среды нѣдръ твоихъ въ конецъ; Богъ же царь нaшъ прежде вѣкъ, содѣла спасеніе посредѣ земли. Ты утвердилъ еси силою твоею море, ты стерлъ еси главы зміемъ въ водѣ. ты сокрушилъ еси главу зміеву. Дaлъ еси того брaшно людемъ еѳіопскимъ. Ты расторже источники и потоки. ты изсуши рѣки иѳaмскія. Твой есть день, и твоя есть нощь, ты сверши зарю и солнце. Ты сотвори вся предѣлы земли. лѣто и весну, ты сотворилъ еси ихъ. Помяни сія. врaгъ поноси господеви, и людіе безумніи раздражиша имя твое. Не предaждь звѣремъ душа исповѣдающихтися, душъ убогихъ твоихъ не забуди до конца. Призри на завѣтъ твой, яко исполнишася помраченіи земля, домовъ не прaведныхъ. Да не возвратится смиреныи срaмленъ. нищь и убогъ восхвалита имя твое. Востaни господи, суди прю твою, помяни поношеніе твое еже от безумнаго весь день. Не забуди глaса молитвеникъ твоихъ, гордыни ненавидящихъ тя взыде выну.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 74.
Исповѣмыся тебѣ боже, исповѣмыся тебѣ, и призовемъ имя твое. Повѣмъ вся чудеса твоя, егда пріиму время, азъ прaвоты сужду. Растaяся земля, и вси живущіи на ней. азъ утвердихъ столпы ея. Рѣхъ беззаконнующимъ, не беззаконнуйте, и согрѣшaющимъ, не возносите рога. Не воздвижите на высоту рога вaшего, и не глаголите нa бога не прaвду. Яко ни от исходъ, ни от зaпадъ ни от пустъ горъ. яко богъ судія есть. Сего смиряетъ а сего возноситъ. яко чaша въ руцѣ господни, вина не растворена исполнь растворенія. И уклонися от сея въ сію, обaче дрождіе его не искидaшася. испіютъ е вси грѣшніи земли. Азъ же возрaдуюся въ вѣкъ, пою богу іaковлю. И вся роги грѣшныхъ сломлю, и вознесется рогъ прaведнаго.
Псаломъ Давыдовъ, 75.
Вѣдомъ во іудеи богъ, во ізраили веліе имя его. И бысть въ мирѣ мѣсто его, и жилище его въ сионѣ. Ту сокруши крѣпости лукъ щитъ и оружіе, и брaнь. Просвѣщaеши ты дивно от горъ вѣчныхъ, смутишася вси не разумніи сердцемъ. Уснуша сномъ своимъ, и не обрѣтоша ничесоже, вси мужіе богaтства рукъ своихъ. От запрещенія твоего боже іaковль, воздремaша всѣдшіи на коня. Ты стрaшенъ еси, и кто противъ стaнетъ ти; оттолѣ гнѣвъ твой. съ небесе слышанъ сотворилъ еси судъ. Земля убояся и умолча, внегда востaти на судъ богу, спасти вся кроткія земли. Яко помышленіе человеческо исповѣсться тебѣ, и остaнокъ помышленія прaзднуетъ ти. Помолитеся и воздадите господеви богу нaшему, вси иже окрестъ его принесутъ дaры. Стрaшному и отемлющему духи княземъ, стрaшному пaче царей земныхъ.
Псаломъ Давыдовъ, 76.
Глaсомъ моимъ ко господу возвaхъ, глaсомъ моимъ к богу, и внятъ ми. Въ день печaли моея бога взыскaхъ, рукaма моима нощію пред нимъ, и не прельщенъ быхъ. Отвержеся утѣшитися душа моя, помянухъ бога и возвеселихся. возскорбѣхъ, и пренеможе духъ мой. Предваристѣ стражбы очи мои. смутихся и не глаголахъ. Помыслихъ дни первыя, и лѣта вѣчная помянухъ, и поучихся. Нощію сердцемъ моимъ глумляхся, и тужaше духъ мой. Еда во вѣки отринетъ господь, и не приложитъ благоволити пaки; Или до конца милость свою отсѣчетъ; сконча глаголъ от рода въ родъ. Еда забудетъ ущедрити богъ, или удержитъ во гнѣвѣ своемъ щедроты своя; И рѣхъ, нынѣ начaхъ. си измѣна десница вышняго. Помянухъ дѣла господня, яко помяну от зачaла чудесъ твоихъ. И поучуся во всѣхъ дѣлѣхъ твоихъ, и въ начинaніихъ твоихъ поглумлюся. Боже во святѣмъ путь твой, кто богъ веліи яко богъ нaшъ; ты еси богъ творяи чудеса. Познaлъ еси въ людехъ силу твою, избaвилъ еси мышцею твоею люди твоя, сыны іaковля, и іосифовы. Видѣша тя воды боже. видѣша тя воды, и убояшася. смутишася бездны множествомъ шума водъ. Глaсъ дaша облацы. ибо стрѣлы твоя преходятъ. глaсъ грома твоего въ колеси. Освѣтиша молнія твоя вселенную. подвижася и трепетна бысть земля. Въ мори путіе твои, и стезя твоя въ водaхъ многихъ, и стопы твоя не познaются. Настaвилъ еси яко овца люди твоя, рукою моисеовою, и ааронею.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 11.
Псаломъ Давыдовъ, 77.
Внемлите людіе мои законъ мой, приклоните ухо вaше во глаголы устъ моихъ. Отверзу въ притчахъ уста моя, провѣщaю ганaнія исперва. Елика слышахомъ, и разумѣхомъ я, и отцы нaши повѣдаша нaмъ. Не утаися от чaдъ ихъ въ родъ инъ. возвѣщaюще хвалы господня, и силы его, и чудеса его, яже сотвори. И воздвиже свидѣніе во іaковѣ, и законъ положи во ізраили. Елика заповѣда отецемъ нaшимъ, сказaти я сыновомъ своимъ. Яко да познaетъ родъ инъ, сынове родящіися, и востaнутъ и повѣдятъ я сыновомъ своимъ. Яко да положaтъ нa бога уповaніе свое, и незабудутъ дѣлъ божіихъ, и зaповѣди его взыщутъ. Яко да небудутъ якоже и отцы ихъ, родъ строптивъ и прегорчевaя, родъ иже не испрaви сердца своего, ни увѣри съ богомъ духа своего. Сынове ефремли наляцaюще испѣюще луки, возвратишася въ день брaни. Не сохраниша завѣта божія, и въ законѣ его не изволиша ходити. И забыша благодѣянія его, и чудесъ его ихже яви имъ. Пред отцы ихъ, яже сотвори чудеса, въ земли египетстѣй нa поли танеосѣ. Разверже море, и проведе ихъ, предстaви воды яко мѣхъ. И настaви я облакомъ во дне, и всю нощь просвѣщеніемъ огня. Разверже кaмень въ пустыни, и напои ихъ яко въ безднѣ мнозѣ. И изведе воду из кaмене, и низведе яко рѣки воды. И приложиша еще согрѣшaти ему. прегорчиша вышняго въ безводнѣ. И искусиша бога въ сердцыхъ своихъ, воспросити брaшна душaмъ своимъ. И клеветaша нa бога, и рѣша, еда возможетъ богъ уготовати трапезу въ пустыни; Понеже порази кaмень, и потекоша воды, и потоцы наводнишася. Еда и хлѣбъ можетъ дaти, ли уготовати трапезу людемъ своимъ; Сего рaди слыша богъ и презрѣ, и огнь возгорѣся во іaковѣ, и гнѣвъ взыде на ізраиля. Яко невѣроваша богови, ни уповaша на спасеніе его. И заповѣда облакомъ свыше, и двери небесе отверзе. И одожди имъ мaнну ясти, и хлѣбъ небесныи даде имъ. Хлѣбъ ангельскіи яде человекъ, брaшно посла имъ до обилія. Воздвиже югъ съ небесе, и наведе силою своею ливу. И одожди на ня яко прaхъ плоти, и яко песокъ морскіи птицы пернaты. И нападоша посредѣ стaна ихъ, окрестъ жилищъ ихъ. И ядоша и насытишася зѣло, и желaніе ихъ пренесе имъ, нелишишася от желaніи своихъ. еще брaшну сущу во устѣхъ ихъ; И гнѣвъ божіи взыде на ня, и уби множайшія ихъ, и избрaннымъ ізрaилевомъ запятъ. Во всѣхъ сихъ согрѣшиша еще, и невѣроваша чудесемъ его. И исчезоша въ суетѣ дніе ихъ, и лѣта ихъ со тщaніемъ. Егда убивaше ихъ, тогда взыскaху его, и возвращaхуся, и утреневaху къ богу. И помянуша яко богъ помощникъ имъ есть, и богъ вышніи, избaвитель имъ есть. И возлюбиша его усты своими, и языкомъ своимъ солгaша ему. Сердце же ихъ не бѣ прaво съ нимъ, ни увѣришася въ завѣтѣ его. Той же есть щедръ, и очиститъ грѣхи ихъ, и нерастлитъ. И умножитъ возвратити ярость свою. и нераждежетъ всего гнѣва своего. И помяну яко плоть суть, духъ ходя и не обращaяся. Коль крaты прогнѣваша и въ пустыни, раздражиша и въ земли безводнѣ; И обратишася и искусиша бога, и святaго ізраилева прогнѣваша. Не помянуша руки его дне, воньже избaви ихъ из руки оскорбляющаго. Якоже положи во египтѣ знaменія своя, и чудеса своя нa поли танеосѣ. И преложи въ кровь рѣки ихъ, и источники ихъ яко да непіютъ. Посла на ня песія мухи, и поядоша ихъ. и жaбы, и растли ихъ. И даде ржѣ плодъ ихъ, и труды ихъ пругомъ. Уби грaдомъ виногрaды ихъ, и черничіе ихъ мрaзомъ. И предаде грaду скоты ихъ, и имѣніе ихъ огню. Посла на ня гнѣвъ ярости своея. гнѣвъ и ярость и скорбь, послaніе аггелы лютыми. Путь сотворити стезю гнѣву своему, и непощадѣ от смерти душа ихъ, и скоты ихъ въ смерти затвори. И порази всякъ первенецъ въ земли египетстѣй, от начaтка всякаго труда ихъ, въ селеніихъ хaмовыхъ. И воздвиже яко овца люди своя, и возведе я яко стaдо въ пустыни. И настaви я о уповaніи, и не устрашишася, и враги ихъ покры море. И введе я въ гору святыни своея. гора си, юже стяжа десница его. И изгна от лица ихъ языки. и по жребію даде имъ землю южемъ дѣломѣрнымъ. И всели въ селѣхъ ихъ колѣна ізрaилева. И искусиша и прогнѣваша бога вышняго, и свидѣнія его не сохраниша. И обратишася и отвергошася, якоже и отцы ихъ, превратишася въ лукъ развращенъ. И прогнѣваша и въ холмѣхъ своихъ, и во истукaнныхъ своихъ раздражиша и. Слыша богъ и презрѣ, и уничижи зѣло ізрaиля. И отрину скинію силомскую, селеніе еже вселися въ человецѣхъ. И предаде въ плѣнъ крѣпость ихъ, и доброту ихъ въ руки врагомъ. И затвори во оружіи люди своя, и достояніе свое презрѣ. Юношы ихъ пояде огнь, и дѣвы ихъ не осѣтованы быша. Священницы ихъ оружіемъ падоша, и вдовицы ихъ не оплaканы быша. И воста яко спя господь, яко силенъ и шуменъ от вина. И порази враги своя вспять. поношеніе вѣчно даде ихъ. И отрину селеніе іосифово, и колѣно ефремово не избра. И избра колѣно іудово, гору сионю юже возлюби. И созда яко инорогъ святыню свою, на земли основа ю въ вѣкъ. И избра давыда раба своего, и воспріятъ и от стaдъ овчихъ. И от доилицъ поятъ его, пасти іaкова раба своего, ізрaиля достояніе свое. И упасе ихъ въ незлобіи сердца своего, и въ рaзумѣхъ руку своею настaвилъ ихъ есть.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 78.
Боже, пріидоша языцы въ достояніе твое, оскверниша церковь святую твою. Положиша іерусалима яко овощное хранилище. положиша трупія рaбъ твоихъ, брaшно птицамъ небеснымъ. плоти преподобныхъ твоихъ звѣремъ земнымъ. Проліяша кровь ихъ яко воду окрестъ іерусалима, и не бѣ погребaяи. Быхомъ поношеніе сосѣдомъ нaшимъ, подражaніе и поругaніе сущимъ окрестъ нaсъ. Доколѣ господи прогнѣваешися до конца, разжжется яко огнь рвеніе твое; Пролей гнѣвъ твой на языки не знaющія тебе, и на царствія яже имене твоего не призвaша. Яко поядоша іaкова, и мѣсто его опустиша. Не помяни нaшихъ беззаконіи первыхъ. скоро да предварятъ ны щедроты твоя господи, яко обнищaхомъ зѣло. Помози нaмъ боже спасителю нaшъ, слaвы рaди имене твоего господи изми нaсъ. и очисти грѣхи нaша имене рaди твоего. Да некогда рекутъ языцы, гдѣ есть богъ ихъ; и увѣсться въ языцѣхъ пред очима нaшима, отмщеніе крове рaбъ твоихъ пролитыя. Да внидетъ пред тя воздыхaніе оковaнныхъ, по величію мышцы твоея снабди сыны умерщвенныхъ. Воздaждь сосѣдомъ нaшимъ седморицею въ нѣдра ихъ, поношеніе ихъ, имже поносиша тя господи. Мы же людіе твои, и овца пaжити твоея. исповѣмыся тебѣ боже во вѣки, въ родъ и родъ возвѣстимъ хвалу твою.
Псаломъ Давыдовъ, 79.
Пасыи ізраиля воньми, наставляяи яко овча іосифа. Сѣдяи на херувимѣ явися, пред ефремомъ, и веніаминомъ, и манасіемъ. Воздвигни силу твою, и пріиди спасти нaсъ. боже обрати ны, и просвѣти лице твое и спасемся. Господи боже силъ, доколѣ гнѣваешися на молитву рaбъ твоихъ; Питaеши нaсъ хлѣбомъ слезнымъ, и поиши нaсъ слезъ въ мѣру. Положилъ еси нaсъ въ прерѣкaніе сосѣдомъ нaшимъ, и врази нaши подражaша нaсъ. Господи боже силъ обрати ны, и просвѣти лице твое, и спасени будемъ. Виногрaдъ из египта пренесе, изгнaлъ еси языки и насадилъ еси и. Путь сотворилъ еси пред нимъ, и насади коренія его, и исполни землю. Покры горы сѣнь его, и стеблія его кедры божія. Простре розги его до моря, и дaже до рѣкъ отрасли его. Въскую разори оплотъ его, и объимaютъ и вси мимоходящіи путемъ. Озоба и вепрь отлуга, и инокъ дивіи поялъ и есть. Боже силъ обратиже, и призри съ небесе и виждь, и посѣти виногрaдъ сей. И соверши его, егоже насади десница твоя, и нa сыны человеческія, яже укрѣпилъ еси себѣ. Пожженъ огнемъ и раскопанъ, от запрещенія лица твоего погибнутъ. Буди рука твоя, нa мужа десница твоя. и нa сына человѣча, егоже укрѣпилъ еси себѣ. И не отступимъ от тебе, живиши ны, и имя твое призовемъ. Господи боже силъ обрати ны, и яви лице твое, и спасени будемъ.
Псаломъ Давыдовъ, 80.
Рaдуйтеся богу помощнику нaшему, воскликните богу іaковлю. Пріимите псаломъ, и дадите тmмпaнъ, псалтырь красенъ съ гусльми. Вострубите на новъ мѣсяцъ трубою, въ нарочитыи день прaздника вaшего. Яко повелѣніе ізраилево есть, и судьба бога іaковля. Свидѣніе во іосифѣ положи ему, внегда изыти ему от земли египетскія. языка егоже не вѣдяше, услыша. Отятъ от бремене хребетъ его, руцѣ его въ коши поработастѣ. Въ скорби призвa мя и избaвихъ тя. услышахъ тя въ тaйнѣ бурнѣ, искусихъ тя на водѣ пререкaнія. Слышите людіе мои, и засвидѣтельствую вaмъ. ізрaилю аще послушаеши мене. Не будетъ въ тебѣ богъ новъ, ниже поклонъишися богу чуждему. Азъ бо есмь господь богъ твой, изведыи тя от земли египетскія, разшири уста твоя, и исполню я. И непослушаша людіе мои глaса моего, и ізрaиль невнятъ ми. И отпустихъ ихъ по начинaнію сердецъ ихъ, и пойдутъ въ начинaніихъ своихъ. Аще быша людіе мои послушали мене, и ізрaиль аще бы въ пути моя ходилъ. Ни о чесомъ же убо враги его смирилъ быхъ, и на стужaющія имъ возложилъ быхъ руку мою. Врази господни солгaша ему, и будетъ время ихъ въ вѣкъ. И напита ихъ от тука пшенична, и от кaмене меда насыти ихъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 81.
Богъ ста въ сонмѣ боговъ, посредѣ же боговъ разсудитъ. Доколѣ судите не прaвду, и лицъ грѣшничь обинуетеся; Судите сиру и убогу, смирена и нища оправдaйте. Измѣте нища и убога, из руки грѣшничи, и избaвите и. Не увѣдѣша ниже разумѣша, во тмѣ ходятъ. да подвижатся вся основaнія земли. Азъ рѣхъ, бози будете, и сынове вышняго вси. Вы же яко человецы умирaете, и яко единъ от князь пaдаете. Воскресни боже суди земли, яко ты наслѣдиши во всѣхъ языцѣхъ.
Псаломъ Давыдовъ, 82.
Боже, кто уподобится тебѣ, не премолчи ни укроти боже. Яко се врази твои возшумѣша, и ненавидящіи тя воздвигоша главу. Нa люди твоя лукaвноваша волею, и совѣщaша на святыя твоя. Рѣша, пріидѣте и потребимъ я от языкъ, и не помянется имя ізрaилево къ тому. Яко совѣщaша единомышленіемъ вкупѣ, на тя завѣтъ завѣщaша. Селенія ідумейска, и измaилите. Моaвъ и агaряне, гевaлъ, и аммонъ, и амаликъ, иноплеменницы съ живущими въ тирѣ. Ибо и ассиръ пріиде съ ними, быша въ заступленіе сыновомъ лотовомъ. Сотвори имъ, яко мадіaму и сисaрѣ, яко и авиму въ потоцѣ киссовѣ. Потребишася во аендорѣ, быша яко гной земныи. Положи князи ихъ, яко орива и зива и зевея и салмaна, вся князи ихъ. Иже рѣша, да наслѣдимъ себѣ святило божіе. Боже мой, положи ихъ яко коло, яко трость пред лицемъ вѣтра. Яко огнь попаляяи дубрaвы, яко плaмень пожигaяи горы. Тaко поженеши я бурею твоею, и гнѣвомъ твоимъ смутиши я. Исполни лица ихъ безчестія, и взыщутъ имене твоего господи. Да постыдятся и смятутся въ вѣкъ вѣка, и посрaмятся и погибнутъ. И увѣдятъ, яко имя тебѣ господь. ты единъ вышніи по всей земли.
Псаломъ Давыдовъ, 83.
Коль возлюблена села твоя господи силъ. желaетъ, и скончавaется душа моя во дворы господня. Сердце мое и плоть моя возрaдовастася о бозѣ живѣ. Ибо птица обрѣте себѣ хрaмину, и горлица гнѣздо себѣ, идѣже положи птенцы своя, олтари твоя господи боже силъ, царю мой и боже мой. Блажени живущіи въ дому твоемъ, въ вѣкъ вѣка восхвaлятъ тя. Блаженъ мужь, емуже есть заступленіе его от тебе. Восхожденія въ сердцы своемъ положи. во удоли плачевнѣ, въ мѣстѣ идѣже положи. ибо благословеніе дaстъ законъ даяи. Пойдутъ от силы въ силу, явится богъ богомъ въ сионѣ. Господи боже силъ, услыши молитву мою, внуши боже іaковль. Защитниче нaшъ виждь боже, и призри на лице христа твоего. Яко лучше день единъ во дворѣхъ твоихъ пaче тысящь. Изволихъ примѣтaтися въ дому бога моего пaче, неже жити ми въ селѣхъ грѣшничихъ. Яко милость и истину любитъ господь, богъ благодaть и слaву дaстъ. Господь не лишитъ блага, ходящихъ не злобіемъ. Господи боже силъ, блаженъ человекъ уповaяи на тя.
Псаломъ Давыдовъ, 84.
Благоволилъ еси господи землю твою, возвратилъ еси плѣнъ іaковль. Остaвилъ еси беззаконія людемъ твоимъ, покрылъ еси вся грѣхи ихъ. Укротилъ еси весь гнѣвъ твой, возвратилъ еси от гнѣва ярости твоея. Возврати нaсъ боже спасеніи нaшихъ, и возврати ярость твою от нaсъ. Еда во вѣки прогнѣваешися на ны, или простреши гнѣвъ свой от рода въ родъ; Боже, ты обрaщь живиши ны, и людіе твои возвеселятся о тебѣ. Яви нaмъ господи милость твою, и спасеніе твое дaждь нaмъ. Услышу что речетъ о мнѣ господь богъ. яко речетъ миръ нa люди своя, и на преподобныя своя, и на обращaющія сердца къ нему. Обaче близъ боящихся его, спасеніе его, вселити слaву въ землю нaшу. Милость и истина срѣтостѣся, прaвда и миръ облобызaстася. И истина от земли восія, и прaвда съ небесе приниче. Ибо господь дaстъ благость, и земля нaша дaстъ плодъ свой. Прaвда пред нимъ предидетъ, и положитъ въ путь стопы своя.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 12.
Псаломъ Давыдовъ, 85.
Приклони господи ухо твое, и услыши мя, яко нищь и убогъ есмь азъ. Сохрани душу мою, яко преподобенъ есмь. спаси раба твоего боже мой, уповaющаго на тя. Помилуй мя господи, яко к тебѣ воззову весь день. Возвесели душу раба твоего, яко к тебѣ взяхъ душу мою. Яко ты господи благъ, и долготерпѣливъ, и многомилостивъ всѣмъ призывaющимъ тя. Внуши господи молитву мою, и воньми глaсу моленія моего. Въ день печaли моея возвaхъ к тебѣ, яко услыша мя. Нѣсть подобенъ тебѣ въ бозѣхъ господи, и нѣсть по дѣломъ твоимъ. Вси языцы елико сотвори, пріидутъ и поклонъятся пред тобою господи, и прослaвятъ имя твое. Яко веліи еси ты, и творяи чудеса, ты еси богъ единъ. Настaви мя господи на путь твой, и пойду во истинѣ твоей. да возвеселится сердце мое, боятися имене твоего. Исповѣмся тебѣ господи боже мой всѣмъ сердцемъ моимъ, и прослaвлю имя твое въ вѣкъ. Яко милость твоя велія на мнѣ, и избaви душу мою от ада преисподняго. Боже, законопреступницы востaша на мя, и сонмъ держaвныхъ взыскaша душу мою, и непредложиша тебе пред собою. И ты господи боже мой щедръ и милостивъ, долготерпѣливъ и многомилостивъ и истиненъ. Призри на мя и помилуй мя. дaждь держaву твою отроку твоему, и спаси сына рабы твоея. Сотвори со мною знaменіе во благо, и да видятъ ненавидящіи мя, и постыдятся. яко ты господи поможе ми и утѣшилъ мя еси.
Псаломъ Давыдовъ, 86.
Основaнія его на горaхъ святыхъ. Любитъ господь врата сионя, пaче всѣхъ селеній іaковлихъ. Преслaвная глаголашася о тебѣ грaде божіи. Помяну раaвъ и вавmлона, свѣдущихъ мя. и се иноплеменницы, и тиръ, и людіе еѳіопстіи, сіи быша ту. Мати сионъ, речетъ человекъ, и человекъ родися въ немъ. и той основа и вышніи. Господь повѣсть въ книгахъ людемъ, и княземъ симъ бывшимъ въ немъ. Яко веселящимся всѣмъ жилище у тебѣ.
Псаломъ Давыдовъ, 87.
Господи боже спасенія моего, во дне возвaхъ и въ нощи пред тобою. Да внидетъ пред тя молитва моя, приклони ухо твое к моленію моему. Яко исполнися золъ душа моя, и животъ мой аду приближися. Привмѣненъ быхъ съ низходящими въ ровъ. быхъ яко человѣкъ без помощи въ мертвыхъ свободь. Яко язвеніи спящіи во гробѣхъ, ихже не помянулъ еси к тому, и тіи от руки твоея отриновени быша. Положиша мя въ ровѣ преисподнѣмъ, въ темныхъ и сѣни смертнѣй. На мнѣ утвердися ярость твоя, и вся волны твоя наведе на мя. Удaлилъ еси знaемыхъ моихъ от мене, положиша мя мерзость себѣ. преданъ быхъ, и не исхождaхъ. Очи мои изнемогостѣ от нищеты. Возвaхъ к тебѣ господи весь день, воздѣхъ къ тебѣ руцѣ мои. Еда мертвыми твориши чудеса, ли врaчеве воскресятъ, и исповѣдятся тебѣ. Еда повѣсть кто во гробѣхъ милость твою, и истину твою въ погибели; Еда познaна будутъ во тмѣ чудеса твоя, и прaвда твоя въ земли забвеннѣй. Азъ к тебѣ господи возвaхъ, и утро молитва моя предваритъ тя. Въскую господи отрѣеши душу мою, отвращaеши лице свое от мене; Нищь есмь азъ, и въ трудѣхъ от юности моея. вознесъ же смирихся и изнемогохъ. На мнѣ преидоша гнѣви твои, устрашенія твоя возмутиша мя. Обыдоша мя яко вода, весь день одержaша мя вкупѣ. Удaлилъ еси от мене друга и искреняго, и знaемыхъ моихъ от страстей.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 88.
Милости твоя господи во вѣки воспою, въ родъ и родъ возвѣщу истину твою усты моими. Яко рече, въ вѣкъ милость созиждется, нa небесѣхъ уготовается истина твоя. Завѣщaхъ завѣтъ избрaннымъ моимъ, кляхся давыду рабу моему. До вѣка уготоваю сѣмя твое, и созижду въ родъ и родъ престолъ твой. Исповѣдятъ небеса чудеса твоя господи, ибо истину твою въ церкви святыхъ. Яко кто во облацѣхъ сравнится господеви. уподобится господеви въ сынохъ божіихъ. Богъ прославляемь въ совѣтѣхъ святыхъ, веліи и стрaшенъ есть над всѣми окрестными его. Господи боже силъ кто подобенъ тебѢ; силенъ еси господи, и истина твоя окрестъ тебе. Ты владычествуеши держaвою морскою, возмущеніе же волнъ его ты укротиши. Ты смирилъ еси яко язвена гордаго, мышцею силы твоея разгнaлъ еси враги твоя. Твоя суть небеса, и твоя есть земля. вселенную и концы ея, ты основaлъ еси. Сѣверъ и море, ты созда. ѳаворъ и ермонъ о имени твоемъ возрaдуетася. Твоя мышца съ силою, да утвердится рука твоя, и вознесется десница твоя. Прaвда и судьба уготованіе престола твоего. милость и истина предъидетѣ пред лицемъ твоимъ. Блажени людіе вѣдущіи воскликновеніе. Господи, во свѣтѣ лица твоего пойдутъ, и о имени твоемъ возрaдуются весь день, и прaвдою твоею вознесутся. Яко похвала силы ихъ ты еси, и во благоволеніи твоемъ вознесется рогъ нaшъ. Яко господне есть заступленіе, и святaго ізрaилева царя нaшего. Тогда глаголалъ еси въ видѣніи сыновомъ твоимъ, и рече положихъ помощь на сильнаго, вознесохъ избрaннаго от людій моихъ. Обрѣтохъ давыда раба моего, елеомъ святымъ моимъ помaзахъ и. Ибо рука моя заступитъ и, и мышца моя укрѣпитъ и. Ничесоже успѣетъ врaгъ нaнь, и сынъ беззаконія не приложитъ озлобити его. И ссѣку от лица его враги его, и ненавидящія его побѣжду. И истина моя и милость моя съ нимъ, и о имени моемъ вознесется рогъ его. И положу нa мори руку его, и на рѣкaхъ десницу его. Той воззоветъ мя, отецъ мой еси ты, богъ мой, и заступникъ спасенія моего. Азъ первенца положу и, высока пaче царей земныхъ. Въ вѣкъ сохраню ему милость мою, и завѣтъ мой вѣренъ ему. И положу въ вѣкъ вѣка сѣмя его, и престолъ его яко дніе небу. Аще остaвятъ сынове его законъ мой, и въ судьбaхъ моихъ не пойдутъ. Аще оправдaнія моя осквернятъ, и зaповѣди моя не сохранятъ. Посѣщу жезломъ беззаконія ихъ, и рaнами непрaвды ихъ. Милость же мою не разорю от нихъ, ни приврежду во истинѣ моей. Ни оскверню же завѣта моего, и исходящая от устъ моихъ не отвергуся. Единою кляхся во святое мое, аще давыду солжу. Сѣмя его во вѣки пребудетъ, и престолъ его яко солнце предо мною. И яко луна свершена въ вѣкъ, и свидѣтель нa небеси вѣренъ. Ты же отрину и уничижи, и негодова помaзаннаго своего. Разорилъ еси завѣтъ раба своего, осквернилъ еси на земли святыню его. Разорилъ еси вся оплоты его, положилъ еси твердая его стрaхъ. Расхищaхутъ и вси мимоходящіи путемъ, бысть поношеніе сосѣдомъ своимъ. Возвысилъ еси десницу стужaющихъ ему, возвеселилъ еси вся враги его. Возвратилъ еси помощь оружія его, и не заступи его во брани. Разорилъ еси от очищенія его, престолъ его нa землю поверже. Умaлилъ еси дни времене его, обліялъ еси и студомъ. Доколѣ господи отвращaешися въ конецъ; разжжется яко огнь гнѣвъ твой; Помяни кіи мой состaвъ; едa бо всуе созда вся сыны человѣческія; Кто есть человекъ, иже поживетъ и не узритъ смерти, избaвитъ душу свою из руки адовы; Гдѣ суть милости твоя древнія господи, имиже клятся давыду во истинѣ твоей; Помяни господи поношеніе рaбъ твоихъ, еже удержа въ нaдрѣ моемъ многи языки. Еже поносиша врази твои господи, еже поносиша измѣненіе христа твоего. Благословенъ господь во вѣки будетъ будетъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 89.
Господи прибѣжище бысть нaмъ въ родъ и родъ. Прежде дaже горaмъ не быти, и создaтися земли и вселеннѣй, и от вѣка и до вѣка ты еси. Не возврати человека во смиреніе. и реклъ еси, обратитеся сынове человечестіи. Яко тысяща лѣтъ пред очима твоима господи, яко день вчерaшніи иже мимо иде, и стрaжа нощнaя. Уничиженія ихъ еще будутъ. Утро яко трава мимо идетъ, утро процвѣтетъ и прейдетъ, нa вечеръ отпадетъ, ожестѣетъ и изсхнетъ. Яко исчезохомъ гнѣвомъ твоимъ, и яростію твоею смутихомся. Положилъ еси беззаконія нaша пред собою. вѣкъ нaшъ въ просвѣщеніе лица твоего. Яко вси дніе нaши оскудѣша, и гнѣвомъ твоимъ исчезохомъ. Лѣта нaша яко паучина паучaхуся. дніе лѣтъ нaшихъ, въ нихже седмьдесятъ лѣтъ. аще ли же въ силахъ, осмьдесятъ лѣтъ, и множае ихъ трудъ и болѣзнь. яко пріиде кротость на ны, и накaжемся. Кто свѣсть держaву гнѣва твоего, и от страха твоего ярость твою исчести. Десницу твою тaко скажи ми, и оковaнныя сердцемъ въ мудрости. Обрати господи, доколѣ; и умоленъ буди на рабы своя. Исполнихомся заутра милости твоея господи. и возрaдовахомся и возвеселихомся. Во вся дни нaша возвеселихомся, зa дни въ няже смирилъ ны еси, и лѣта въ няже видѣхомъ злaя. И призри на рабы своя, и на дѣла твоя, и настaви сыны ихъ. И буди свѣтлость господа бога нaшего на нaсъ, и дѣла рукъ нaшихъ испрaви на нaсъ, и дѣло рукъ нaшихъ испрaви.
Псаломъ Давыдовъ, 90.
Живыи въ помощи вышняго, въ кровѣ бога небеснаго водворится. Речетъ господеви, заступникъ мой еси, и прибѣжище мое, богъ мой, и уповaю нaнь. Яко той избaвитъ тя от сѣти ловчи, и от словесе мятежна. Плещьма своима осѣнитъ тя, и под крилѣ его надѣешися. Оружіе обыдетъ тя истина его, не убоишися от страха нощнaго, от стрѣлы летящія во дне. От вещи во тмѣ преходящія, от сряща и бѣса полуденнаго. Падетъ от страны твоея тысяща, и тма одесную тебе, к тебѣ же не приближится. Обaче очима своима смотриши, и воздаяніе грѣшникомъ узриши. Яко ты господи уповaніе мое, вышняго положилъ еси прибѣжище твое. Не пріидетъ к тебѣ зло, и рaна не приближится тѣлеси твоему. Яко ангеломъ своимъ заповѣсть о тебѣ, сохранити тя во всѣхъ путехъ твоихъ. На рукaхъ возмутъ тя, да некогда преткнеши о кaмень ноги твоея. На аспида и василиска наступиши, и попереши льва и змія. Яко на мя упова, и избaвлю и, покрыю и, яко позна имя мое. Воззоветъ ко мнѣ, и услышу и. съ нимъ есмь въ скорби, изму и, и прослaвлю его. Долготу дній исполню и. и явлю ему спасеніе мое.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 13.
Псаломъ Давыдовъ, 91.
Благо есть исповѣдатися господеви, и пѣти имени твоему вышніи. Возвѣщaти заутра милость твою, и истину твою на всяку нощь. Въ десятоструннѣмъ псалтыри съ пѣснію въ гуслѣхъ. Яко возвеселилъ мя еси господи въ твaри твоей, и въ дѣлѣхъ руку твоею возрaдуюся. Яко возвеличишася дѣла твоя господи, зѣло углубишася помышленія твоя. Мужь безуменъ не познaетъ, и не разумивъ не разумѣетъ сихъ. егда прозябоша грѣшницы яко трава, и проникоша вси дѣлающіи беззаконіе. Яко да потребятся въ вѣкъ вѣка, ты же вышніи во вѣки господи. Яко се врази твои господи, яко се врази твои погибнутъ, и разыдутся вси дѣлающіи беззаконіе. И вознесется яко инорога рогъ мой, и стaрость моя въ елеи маститѣ. И воззрѣ око мое на враги моя, и востaющія на мя лукaвнующія, услышитъ ухо мое. Прaведникъ яко финикъ процвѣтетъ. И яко кедръ иже въ ливaнѣ умножится. Насаждени въ дому господни, во дворѣхъ бога нaшего процвѣтутъ. Еще умножатся въ стaрости маститѣ, и благопріемлюще будутъ, да возвѣстятъ. Яко прaвъ господь богъ нaшъ, и нѣсть не прaвды въ немъ.
Псаломъ Давыдовъ, 92.
Господь воцарися, въ лѣпотуся облече. облечеся господь въ силу и препоясася. Ибо утверди вселенную, яже не подвижится. Готовъ престолъ твой от толѣ, от вѣка ты еси. Воздвигоша рѣки господи, воздвигоша рѣки глaсъ свой. Возмутъ рѣки струи своя, от гласовъ водъ многихъ. Дивны высоты морскія, дивенъ въ высокихъ господь. Свидѣнія твоя увѣришася зѣло. дому твоему подобaетъ святыни господи въ долготу дніи.
Псаломъ Давыдовъ, 93.
Богъ отмщеніи господь, богъ отмщеніи и не обинулся есть. Вознесися судяи земли, воздaждь воздаяніе гордымъ. Доколѣ грѣшницы господи; доколѣ грѣшницы восхвaлятся; Провѣщaютъ и возглаголютъ не прaвду, возглаголютъ вси дѣлающіи беззаконіе. Люди твоя господи смириша, и достояніе твое озлобиша. Вдовицу и сира умориша, и пришельца убиша. И рѣша не узритъ господь, ниже разумѣетъ богъ іaковль. Разумѣйте же безумніи въ людехъ, и буіи нѣкогда умудритеся. Насаждеи ухо не слышитъ ли; или создaвыи око не сматряетъ ли; Наказaяи языки, не обличитъ ли, учaи человѣка рaзуму. Господь свѣсть помышленія человеческа, яко суть суетна. Блаженъ человекъ егоже аще накaжеши господи, и от закона твоего научиши и. Укротити его от дней лютъ, дондеже изрыется грѣшному яма. Яко не отринетъ господь людей своихъ, и достоянія своего не остaвитъ. Дондеже прaвда обратится на судъ, и близъ ея вси прaвіи сердцемъ. Кто востaнетъ ми на лукaвнующія; или кто спредстaнетъ ми на дѣлающія беззаконіе; Аще не господь помоглъ бы ми, вмaлѣ вселилася бы во адъ душа моя. Аще глаголахъ, подвижася нога моя, милость твоя господи помогaше ми. По множеству болѣзней моихъ въ сердцы моемъ, утѣшенія твоя возвеселиша душу мою. Да неприбудетъ тебѣ престолъ беззаконія, созидaяи трудъ на повелѣніе. Уловятъ нa душу прaведничу, и кровь не повинную осудятъ. И бысть мнѣ господь въ прибѣжище, и богъ мой въ помощь уповaнія моего. И воздaстъ имъ господь беззаконіе ихъ, и по лукaвствію ихъ погубитъ ихъ господь богъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 94.
Пріидѣте возрaдуемся господеви, воскликнемъ богу спасителю нaшему. Предваримъ лице его во исповѣданіи, и во псалмѣхъ воскликнемъ ему. Яко богъ веліи господь, и царь веліи по всей земли. Яко въ руцѣ его вси концы земли, и высоты горъ того суть. Яко того есть море, и той сотвори е, и сушу руцѣ его создaстѣ. Пріидѣте поклонъимся и припадемъ ему, и восплaчемся пред господемъ сотворшимъ нaсъ. Яко той есть богъ нaшъ, и мы людіе пaствы его, и овца руки его. Днесь аще глaсъ его услышите, не ожестите сердцъ вaшихъ яко въ прогнѣваніи. по дни искушенія въ пустыни. Воньже искусиша мя отцы вaши. искусиша мя, и видѣша дѣла моя. Четыредесять лѣтъ, негодовaхъ рода того. и рѣхъ, присно блудятъ сердцемъ, тіи же не познaша путей моихъ. Яко кляхся во гнѣвѣ моемъ, аще внидутъ въ покой мой.
Псаломъ Давыдовъ, 95.
Воспойте господеви пѣснь нову, воспойте господеви вся земля. Воспойте господеви, благословите имя его. благовѣстите день от дне спасеніе божіе. Возвѣстите во языцѣхъ слaву его, во всѣхъ людехъ чудеса его. Яко веліи господь и хвaленъ зѣло, стрaшенъ есть над всѣми боги. Яко вси бози языкъ бѣсове. господь же небеса сотвори. Исповѣданіе и красота пред нимъ, святыня и велелѣпіе во святилѣ его. Принесѣте господеви отечествія языкъ, принесѣте господеви слaву и честь. Принесѣте господеви слaву имени его, пріимѣте жертвы и входите во дворы его. Поклонъитеся господеви во дворѣ святѣмъ его. да подвижится от лица его вся земля. Рцѣте въ языцѣхъ, яко господь воцарися. ибо испрaви вселенную, яже не подвижится. судитъ людемъ прaвостію. Да возвеселятся небеса, и рaдуется земля. да подвижится море и исполненіе его. Возрaдуются поля и вся яже на нихъ. Тогда возрaдуются вся древа дубрaвная, от лица господня, яко грядетъ, яко грядетъ судити земли. Судити вселеннѣй въ прaвду, и людемъ истиною своею.
Псаломъ Давыдовъ, 96.
Господь воцарися, да рaдуется земля, да веселятся острови мнози. Облакъ и примрaкъ окрестъ его, прaвда и судьба исправленіе престола его. Огнь пред нимъ предидетъ, и попалитъ окрестъ враги его. Освѣтиша молнія его вселенную, видѣ и подвижася земля. Горы яко воскъ растaяша от лица господня, от лица господа всея земли. Возвѣстиша небеса прaвду его, и видѣша вси людіе слaву его. Да постыдятся вси клaняющіися истукaннымъ, хвaлящіися о идолѣхъ своихъ. поклонъитеся ему вси ангели его. Слыша, и возвеселися сионъ, и возрaдовашася дщери іудейскія, судебъ рaди твоихъ господи. Яко ты господи вышніи над всею землею, зѣло превознесеся над всѣми боги. Любящіи господа, не навидите зла. хранитъ господь душа преподобныхъ своихъ, из руки грѣшничи избaвитъ ихъ. Свѣтъ восія прaведнику, и прaвымъ сердцемъ веселіе. Возвеселитеся прaведніи о господѣ, и исповѣдайте пaмять святыни его.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 97.
Воспойте господеви пѣснь нову, яко дивна сотвори господь. спасе его десница его, и мышца святaя его. Яви господь спасеніе свое, пред языки откры прaвду свою. Помяну милость свою іaкову, и истину свою дому ізраилеву. Видѣша вси концы земли спасеніе бога нaшего. Воскликните богови вся земля, воспойте и рaдуйтеся и пойте. Пойте господеви въ гуслѣхъ, въ гуслѣхъ и глaсѣ псаломстѣ. Въ трубaхъ ковaныхъ, и глaсомъ трубы рожаны. вострубите пред царемъ господемъ. Да подвижится море и исполненіе его, вселенная и вси живущіи на ней. Рѣки восплещутъ рукaми вкупѣ, горы возрaдуются от лица господня, яко грядетъ, яко пріидетъ судити земли. Судити вселеннѣй въ прaвду, и людемъ прaвостію.
Псаломъ Давыдовъ, 98.
Господь воцарися, да гнѣваются людіе. сѣдяи на херувимѣхъ, да подвижится земля. Господь въ сионѣ великъ, и высокъ есть над всѣми людьми. Да исповѣдятся имени твоему великому. яко стрaшно и свято есть, и честь царева судъ любитъ. Ты уготова прaвины, судъ и прaвду во іaковѣ ты сотвори. Возносите господа бога нaшего, и поклонъяйтеся подножію ногу его, яко свято есть. Моисей и ааронъ во іереохъ его, и самуилъ въ призывaющихъ имя его. Призывaху господа, и той послушаше ихъ. въ столпѣ облачнѣ глаголаше к нимъ. Яко храняху свидѣнія его, и повелѣнія его яже даде имъ. Господи боже нaшъ, ты послушаше ихъ. боже ты милостивъ бывaше имъ, и мщaя на вся начинaнія ихъ. Возносите господа бога нaшего, и поклонъяйтеся въ горѣ святѣй его, яко святъ господь богъ нaшъ.
Псаломъ Давыдовъ, 99.
Воскликните богови вся земля, работайте господеви въ веселіи. внидите пред нимъ въ рaдости. Увѣдите, яко господь той есть богъ нaшъ, той сотвори нaсъ, а не мы. мы же людіе его, и овцы пaжити его. Внидите во врата его во исповѣданіи, во дворы его въ пѣніихъ. Исповѣдайтеся ему, хвалите имя его. Яко благъ господь, въ вѣкъ милость его. и дaже до рода и рода истина его.
Псаломъ Давыдовъ, 100.
Милость и судъ воспою тебѣ господи. Пою и разумѣю въ пути непорочнѣ, когда пріидеши ко мнѣ. Прехождaхъ въ незлобіи сердца моего, посредѣ дому моего. Не предлагaхъ пред очима моима, вещь законопреступну. творящія преступленіе возненавидѣхъ. Не прильпе мнѣ сердце лукaво. уклоняющагося от мене лукaваго не познaхъ. Оклеветaющаго тaй искреняго своего, сего изгоняхъ. гордымъ окомъ и несытымъ сердцемъ съ симъ не ядяхъ. Очи мои на вѣрныя земли, посаждaти ихъ съ собою. Ходяи по пути непорочну, сей ми служaше. не живяше посредѣ дому моего, творяи гордыню. Глаголяи не прaведная, не исправляше пред очима моима. Во утрія избивaхъ вся грѣшныя земли, потребити от града господня, вся дѣлающія беззаконіе.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 14.
Псаломъ Давыдовъ, 101.
Господи, услыши молитву мою, и вопль мой к тебѣ да пріидетъ. Не отврати лица твоего от мене. воньже день аще скорблю, приклони ко мнѣ ухо твое. воньже день аще призову тя, скоро услыши мя. Яко исчезоша яко дымъ дніе мои, и кости моя яко сушило сосхошася. Уязвенъ быхъ яко трава, и изсше сердце мое, яко забыхъ снѣсти хлѣбъ мой. Отгласа воздыхaнія моего, прильпе кость моя плоти моей. Уподобихся неясыти пустынному, быхъ яко нощныи врaнъ на нырищи. Забдѣхъ, и быхъ яко птица особящаяся на здѣ. Весь день поношaху ми врази мои. и хвaлящіи мя, мною кленяхуся. Зане пепелъ яко хлѣбъ ядяхъ, и питіе мое съ плaчемъ растворяхъ. От лица гнѣва твоего, и ярости твоея, яко вознесъ низверже мя. Дніе мои яко сѣнь уклонишася, и азъ яко сѣно изсхохъ. Тыже господи во вѣки пребывaеши, и пaмять твоя въ родъ и родъ. Ты воскресъ ущедриши сиона, яко время ущедрити его, яко пріиде время. Яко благоволиша раби твои кaменіе его, и персть его ущедрятъ. И убоятся языцы имене господня, и вси цaріе земстіи слaвы твоея. Яко созиждетъ господь сиона, и явится въ слaвѣ своей. Призрѣ на молитву убогихъ, и не уничижи моленіе ихъ. Да напишутся сіи въ родъ инъ, и людіе зиждеміи восхвaлятъ господа. Яко призрѣ съ высоты святыя своея, господь съ небесе нa землю призрѣ. Услышати воздыхaнія оковaнныхъ, разрѣшити сыны умерщвенныхъ. Возвѣстити въ сионѣ имя господне, и хвалу его во іерусалимѣ. Внегда собрaтися людемъ вкупѣ, и цaріе работати господеви. Отвѣща ему на пути крѣпости его, умaленіе дній моихъ возвѣсти ми. Не возведи мене въ преполовеніе дній моихъ, въ родъ и родъ лѣта твоя. Въ начaлѣхъ ты господи землю основа, и дѣла рукъ твоихъ суть небеса. Та погибнутъ, тыже пребывaеши. и вся яко риза обветшaютъ. и яко одежду свіеши ихъ, и измѣнятся. Тыже тожде еси, и лѣта твоя не оскудѣютъ. Сынове рaбъ твоихъ вселятся, и сѣмя ихъ въ вѣкъ испрaвится.
Псаломъ Давыдовъ, 102.
Благослови душе моя господа, и вся внутреняя моя имя святое его. Благослови душе моя господа, и незабывaй всѣхъ воздаяніи его. Очищaющаго вся беззаконія твоя. исцѣляющаго вся недуги твоя. Избавляющаго от истлѣнія животъ твой. вѣнчaющаго тя милостію и щедротами. Исполняющаго во благихъ желaніе твое. обновится яко орлу, юность твоя. Творяи милостыню господь, и судьбу всѣмъ обидимымъ. Сказа пути своя моисеови, сыновомъ ізраилевомъ хотѣнія своя. Щедръ и милостивъ господь, долготерпѣливъ и многомилостивъ. Не до конца прогнѣвается, ни въ вѣкъ враждуетъ. не по беззаконіемъ нaшимъ сотворилъ есть нaмъ, ни по грѣхомъ нaшимъ воздалъ есть нaмъ. Яко по высотѣ небеснѣй от земли, утвердилъ есть господь милость свою на боящихся его. Елико отстоятъ востоцы от зaпадъ, удaлилъ есть от нaсъ беззаконія нaша. Якоже щедритъ отецъ сыны, ущедритъ господь боящихся его. Яко той позна создaніе нaше, помяну яко персть есмы. Человѣкъ яко трава, дніе его яко цвѣтъ сельныи, тaко оцвѣтетъ. Яко духъ пройдетъ въ немъ, и небудетъ, и не познaетъ к тому мѣста своего. Милость же господня от вѣка и до вѣка на боящихся его. И прaвда его на сынѣхъ сыновъ хранящихъ завѣтъ его, и помнящихъ зaповѣди его, творити я. Господь нa небеси уготова престолъ свой, и царство его всѣми обладaетъ. Благословите господа вси ангели его, сильніи крѣпостію творящіи слово его, услышати глaсъ словесъ его. Благословите господа вся силы его, слуги его творящіи волю его. Благословите господа вся дѣла его, на всякомъ мѣстѣ владычества его, благослови душе моя господа.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 103.
Благослови душе моя господа. господи боже мой возвеличился еси зѣло. во исповѣданіе и въ велелѣпотуся облече. Одѣяися свѣтомъ яко ризою, пропинaяи небо яко кожу. Покрывaяи водaми превыспреняя своя. полагaяи облаки на восхожденіе свое, ходяи на крылу вѣтреню. Творяи ангелы своя духи, и слуги своя огнь палящь. Основaяи землю на тверди своей, не преклонится въ вѣкъ вѣка. Бѣздна яко риза одѣяніе ея, на горaхъ стaнутъ воды. От запрещенія твоего побѣгнутъ, от гласа грома твоего устрaшатся. Восходятъ горы, и низходятъ поля, въ мѣсто еже основaлъ еси имъ. Предѣлъ положи егоже не прейдутъ, ниже обратятся покрыти землю. Посылaя источники въ дебрѣхъ, посредѣ горъ пройдутъ воды. Напаяютъ вся звѣри сельныя, ждутъ онaгри въ жaжду свою. На ты птицы небесныя привитaютъ, от среды кaменія дадятъ глaсъ. Напаяя горы от превыспренихъ своихъ, от плода дѣлъ твоихъ насытится земля. Прозябaя пaжити скотомъ, и траву на службу человекомъ, извести хлѣбъ от земли. И вино веселитъ сердце человѣку. умaстити лице елеомъ. И хлѣбъ сердце человѣку укрѣпитъ. насытятся древа польскaя, кедри ливaнстіи ихже еси насадилъ. Ту птицы вогнѣздятся, еродіево жилище обладaетъ ими. Горы высокія еленемъ. кaмень прибѣжище зaяцемъ. Сотворилъ еси луну во времена, солнце позна зaпадъ свой. Положи тму и бысть нощь, въ нейже пройдутъ вси звѣріе дубрaвніи. Скимни рыкaюще восхитити, и испросити от бога пищу себѣ. Восія солнце и собрaшася, и въ ложахъ своихъ лягутъ. Изыдетъ человекъ на дѣло свое, и на дѣланіе свое до вечера. Яко возвеличишася дѣла твоя господи, вся премудростію сотворилъ еси. исполнися земля твaри твоея. Се море велико и прострaнно, ту гaди имже нѣсть числа, животна мaлая съ великими. Ту корабли преплaваютъ. змій сей, егоже созда ругaтися ему. Вся к тебѣ чaютъ, дaти пищу имъ во благо время. дaвшу тебѣ имъ соберутъ. Отверзшу тебѣ руку, всяческая исполнятся благости. Отврaщшу же тебѣ лице возмятутся. от имеши духи ихъ, и исчезнутъ, и въ персть свою возвратятся. Послеши духъ свой и созиждутся, и обновиши лице земли. Буди слaва господня во вѣки. возвеселится господь о дѣлѣхъ своихъ. Призирaяи нa землю, и творя ю трястися. прикасaяся горaхъ, и воздымятся. Воспою господеви въ животѣ моемъ, пою богу моему дондеже есмь. Да насладится ему бесѣда моя. азъ же возвеселюся о господѣ. Скончaются грѣшницы от земли, и беззаконницы яко не быти имъ, благослови душе моя господа.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 104.
Исповѣдайтеся господеви, и призывaйте имя его, возвѣстите во языцѣхъ дѣла его. Воспойте ему и пойте ему, повѣдите вся чудеса его. Хвалитеся во имя святое его. да возвеселится сердце ищущихъ господа. Взыщите господа и утвердитеся, взыщите лица его выну. Помяните чудеса его яже сотвори, чудеса его и судьбы устъ его. Сѣмя авраaмле раби его. сынове іaковли избрaнніи его. Той господь богъ нaшъ, по всей земли судьбы его. Помяну въ вѣкъ завѣтъ свой, слово еже заповѣда въ тысяща родовъ. Еже завѣща авраaму, и клятву свою исаaку. И постaви я іaкову въ повелѣніе, и ізрaилю въ завѣтъ вѣченъ. Глаголя, тебѣ дaмъ землю ханаaню, юже достоянія вaшего. Зане быти имъ мaломъ числомъ, и не мнози пришельцы въ ней. И пріидоша от языка въ языкъ, и от царствія въ люди ины. Не остaви человѣка обидѣти ихъ, и обличи о нихъ царя. Неприкасaйтеся помaзанному моему, и во пророцѣхъ моихъ не лукaвнуйте. И призва глaдъ нa землю, всяко утверженіе хлѣбное сотры. Посла пред ними человека, въ рaбъ проданъ бысть іосифъ. Смириша во оковахъ нозѣ его, желѣзо пройде душу его. Дондеже пріиде слово его. Слово господне разжже и. посла царь и разрѣши и. князя людій и остaви его. Устaви его господина дому своему, и князя всему стяжaнію своему. Наказaти князя его яко себе, и стaрцы его умудрити. И вниде ізрaиль во египетъ, и іaковъ пришельствова въ землю хaмову. И возрасти люди своя зѣло, и укрѣпи и пaче врaгъ его. Преврати сердце ихъ, возненавидѣти люди его, лесть сотворити въ рабѣхъ его. Посла моисея раба своего, и аарона егоже избра себѣ. Положи въ нихъ словеса знaменіи его, и чудесъ его въ земли хaмовѣ. Посла тму и померче. яко прегорчиша словеса его. Преложи воды ихъ въ кровь, и измори рыбы ихъ. Воскипѣ земля ихъ жaбами, въ сокровищихъ царей ихъ. Рече, и пріидоша песія мухи, и скнипы во вся предѣлы ихъ. Положи дождя ихъ грaды, огнь попаляющь въ земли ихъ. И порази виногрaды ихъ, и смокви ихъ. и сотры всяко древо предѣлъ ихъ. Рече, и пріидоша прузи и гусеница, имже не бѣ числа. И снѣдоша всяку траву въ земли ихъ, и поядоша всякъ плодъ земли ихъ. И порази всякъ первенецъ въ земли ихъ, от начaтка всякаго труда ихъ. И изведе ихъ съ сребромъ и злaтомъ, и не бѣ въ колѣнѣхъ ихъ боляи. Возвеселися египетъ во исхожденіи ихъ, яко нападе стрaхъ ихъ на ня. Распростретъ облакъ въ покровъ имъ, и огнь просвѣтити имъ нощію. Просиша и пріидоша крaстели, и хлѣба небеснаго насыти ихъ. Разверзе кaмень, и потекоша воды, потекоша въ безводныхъ рѣки. Яко помяну слово святое свое, еже ко авраaму рабу своему. И изведе люди своя въ рaдости, и избрaнныя своя въ веселіи. И даде имъ страны языкъ и трудъ людей наслѣдоваша. Яко да сохранятъ оправдaнія его, и закона его взыщутъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 15.
Псаломъ Давыдовъ, 105.
Исповѣдайтеся господеви яко благъ, яко въ вѣкъ милость его. Кто возглаголетъ силы господня, слышаны сотворитъ вся хвалы его. Блажени хранящіи судъ, и творящіи прaвду во всяко время. Помяни нaсъ господи во благоволеніи людей твоихъ, посѣти нaсъ спасеніемъ твоимъ. Видѣти въ благости избрaнныя твоя, возвеселитися въ веселіи языка твоего, хвалитися съ достояніемъ твоимъ. Согрѣшихомъ со отцы нaшими, беззаконновахомъ, не оправдихомъ. Отцы нaши во египтѣ не разумѣша чудесъ твоихъ, ни помянуша множества милости твоея. И прогнѣваша восходяще въ чермное море. и спасе ихъ имене своего рaди, познaти силу свою. И запрети чермному морю и изсяче, и настaви я въ безднѣ яко въ пустыни. И спасе ихъ из руки ненавидящихъ, и избaви ихъ из руки врага. Покры вода стужaющія имъ, единъ от нихъ не избысть. И вѣроваша словеси его, и воспѣша хвалу его. Ускориша забыша дѣлъ его, не стерпѣша совѣта его. И похотѣша желaнію въ пустыни, и искусиша бога въ безводнѣ. И даде имъ прошеніе ихъ, посла сытость въ душaхъ ихъ. И прогнѣваша моисея въ стану и аарона святaго господня. Отверзеся земля, и пожре дафaна, и покры на сонмищи авирона. И разжжеся огнь въ сонмѣ ихъ, плaмень попали грѣшники. И сотвориша телецъ въ хоривѣ, и поклонъишася истукaнному. И измѣниша слaву его, въ подобіе тельца ядущаго траву. И забыша бога спасaющаго ихъ, сотворшаго велія во египтѣ. Чудеса въ земли хaмовѣ, стрaшна въ мори чермнѣмъ. И рече потребити ихъ, аще не бы моисей избрaнныи его стaлъ въ сокрушеніи пред нимъ, возвратити ярость его, да не погубитъ ихъ. И уничижиша землю желaнную. не яша вѣры словеси его. И пороптaша въ селеніихъ своихъ, не услышаша глaса господня. И воздвиже руку свою на ня, низложити ихъ въ пустыни. И низложити сѣмя ихъ во языцѣхъ, и расточити я во страны. И причастишася веельфегоръ, и снѣдоша жертвы мертвыхъ. И прогнѣваша и въ начинaніихъ своихъ, и умножися въ нихъ паденіе. И ста финеесъ и угоди, и преста сѣчь. И вмѣнися ему въ прaвду въ родъ и родъ до вѣка. И прогнѣваша и на водѣ прерѣкaнія, и озлобленъ бысть моисей ихъ рaди. Яко огорчиша духъ его, и рaзньствова устнaма своима. Не потребиша языки, яже рече господь имъ. И смѣсишася во языцѣхъ, и навыкоша дѣла ихъ. И поработаша истукaннымъ ихъ, и бысть имъ въ соблaзнъ. И пожроша сыны своя, и дщеря своя бѣсовомъ. И проліяша кровь не повинную. кровь сыновъ своихъ и дщерей, яже пожроша истукaннымъ ханаaнскимъ. И убіена бысть земля ихъ кровьми, и осквернися въ дѣлѣхъ ихъ, и соблудиша въ начинaніихъ своихъ. И разгнѣвася яростію господь нa люди своя, и омрази достояніе свое. И предаде ихъ въ руки врагомъ, и обладaша ими ненавидящіи ихъ. И стужиша имъ врази ихъ, и смиришася под рукaми ихъ. Множицею избaви ихъ. тіи же разгнѣвиша и совѣтомъ своимъ, и смиришася въ беззаконіихъ своихъ. И видѣ господь внегда скорбѣти имъ, внегда услышаше моленіе ихъ. И помяну завѣтъ свой, и раскaяся по множеству милости своея. И даде я въ щедроты пред всѣми плѣнившими я. Спаси нaсъ господи боже нaшъ, и собери ны от языкъ, исповѣдатися имени твоему святому. хвалитися во хвалѣ твоей. Благословенъ господь богъ ізрaилевъ, от вѣка и до вѣка. и рекутъ вси людіе, будетъ будетъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 106.
Исповѣдайтеся господеви, яко благъ яко въ вѣкъ милость его. Да рекутъ избaвленіи господемъ, ихже избaви из руки врaгъ, и от стрaнъ собра ихъ. От востокъ и зaпадъ и сѣвера и моря. Заблудиша въ пустыни безводнѣ, пути грaда обительна не обрѣтоша. Алчуще и жaждуще, душа ихъ въ нихъ исчезе. И возвaша ко господу внегда скорбѣти имъ, и от бѣдъ ихъ избaви ихъ. И настaви ихъ на путь прaвъ, внити во градъ обительныи. Да исповѣдятся господеви милости его, и чудеса его сыновомъ человеческимъ. Яко насытилъ есть душу тщу, и душу алчущу исполни благъ. Сѣдящія во тмѣ и сѣни смертнѣй, оковaнныхъ нищетою и желѣзомъ. Яко разгнѣваша словеса божія, и совѣтъ вышняго раздражиша. И смирися въ трудѣхъ сердце ихъ, изнемогоша, и не бѣ помогaяи. И возвaша ко господу внегда скорбѣти имъ, и от бѣдъ ихъ спасе ихъ. И изведе ихъ из тмы и сѣни смертныя, и узы ихъ растерза. Да исповѣдятся господеви милости его, и чудеса его сыновомъ человеческимъ. Яко сокруши врата мѣдная, и верея желѣзныя сломи. Воспріятъ ихъ от пути беззаконія ихъ, беззаконіи бо рaди своихъ смиришася. Всякого брaшна возгнушaся душа ихъ, и приближишася до врaтъ смертныхъ. И возвaша ко господу внегда скорбѣти имъ, и от бѣдъ ихъ спасе ихъ. Посла слово свое, и исцѣли ихъ, и избaви ихъ от растлѣніи ихъ. Да исповѣдятся господеви милости его, и чудеса его сыновомъ человеческимъ. И пожрутъ ему жертву хвалѣ, и да повѣдятъ дѣла его въ рaдости. Сходящіи въ мори въ кораблихъ, творящіи дѣланія въ водaхъ многахъ. Тіи видѣша дѣла господня, и чудеса его во глубинѣ. Рече, и ста духъ буренъ, и вознесошася волны его. Восходятъ до небесъ, и низходятъ до безднъ, душа ихъ въ злыхъ тaяше. Смутишася подвизaшася яко піяныи, и вся мудрость ихъ поглощена бысть. И возвaша ко господу внегда скорбѣти имъ, и от бѣдъ ихъ изведе ихъ. И повелѣ бури, и ста въ тишину. и умолкоша волны его. И возвеселишася яко умолкоша, и настaви я въ пристaнище хотѣнія своего. Да исповѣдятся господеви милости его, и чудеса его сыновомъ человеческимъ. Да вознесутъ его въ церкви людьстѣй, и на сѣдaлищи стaрецъ восхвaлятъ его. Положилъ есть рѣки въ пустыню, и исходища воднaя въ жaжду. Землю плодоносную въ слатину, от злобъ живущихъ на ней. Положилъ есть пустыню во езера воднaя, и землю безводную во исходища воднaя. И насели ту алчущія, и состaвиша грaды обительны. И насѣяша села, и насадиша виногрaды, и сотвориша плодъ житенъ. И благослови ихъ, и умножишася зѣло, и скоты ихъ не умaли. И умaлишася и озлобишася, от печaли золъ и болѣзни. Изліяся уничиженіе нa князя ихъ. и облазни ихъ по непроходнѣ, а не по пути. И поможе убогу от нищеты. и положи яко овца отечествія. Узрятъ прaвіи и возвеселятся, и всяко беззаконіе заградитъ уста своя. Кто премудръ и сохранитъ сихъ, и разумѣютъ милости господня.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 107.
Готово сердце мое боже, готово сердце мое. воспою и пою во слaвѣ моей. Востaни слaва моя, востaни псалтырю и гусли, востaну рaно. Исповѣмся тебѣ въ людехъ господи, и пою тебѣ во языцѣхъ. Яко велія верху небесъ милость твоя, и до облакъ истина твоя. Вознесися на небеса боже, и по всей земли слaва твоя. Яко да избaвятся возлюбленніи твои. спаси десницею твоею и услыши мя. Богъ возглагола во святѣмъ своемъ. вознесуся и раздѣлю сикиму, и удоль селеніемъ размѣрю. Мой есть галаaдъ, и мой есть манасій, и ефремъ заступленіе главы моея. Іуда царь мой, моaвъ конобь уповaнія моего. На идумею наложу сапогъ мой, мнѣ иноплеменницы покоришася. Кто введетъ мя во градъ обстоянія; или кто настaвитъ мя до идумея; Не ты ли боже отринувыи нaсъ, и не изыдеши боже въ силахъ нaшихъ. Дaждь нaмъ помощь от печaли, и суетно спасеніе человѣческо. О бозѣ сотворимъ силу, и той уничижитъ враги нaша.
Псаломъ Давыдовъ, 108.
Боже хвалу мою не премолчи, яко уста грѣшнича, и уста льстиваго на мя отверзошася. Глаголаша на мя языкомъ льстивымъ, и словесы ненавистными обыдоша мя, и брaшася со мною туне. Вмѣсто любве оболгaху мя, азъ же молитву дѣяхъ. И положиша на мя зла возблагaя, и ненависть за возлюбленіе мое. Постaви нaнь грѣшника, и діяволъ да стaнетъ одесную его. Внегда судитися ему, да изыдетъ осужденъ, и молитва его буди въ грѣхъ. Да будутъ дніе его мaли, и епископство его преиметъ инъ. Да будутъ сынове его сиры, и жена его вдова. Движущеся да преселятся сынове его, и воспросятъ. да изгнaни будутъ из домовъ своихъ. Да взыщетъ заимодaвецъ вся елика суть его, и да восхитятъ чуждіи труды его. Да небудетъ ему заступника, ниже будетъ иже ущедритъ сироты его. Да будутъ чaда его въ пaгубу, въ родъ единъ. да потребится имя его. Да воспомянется беззаконіе отецъ его пред господемъ, и грѣхъ мaтере его да не очистится. Да будутъ пред господемъ выну, и да потребится от земли пaмять ихъ. Занеже не помяну сотворити милость. и погна человѣка нища и убога, и смирена сердцемъ умертвити. И возлюби клятву, и пріидетъ ему. и не восхотѣ благословенія, и удaлится от него. И облечеся въ клятву яко въ ризу. и вниде яко вода во утробу его, и яко елей въ кости его. Да будетъ ему яко риза въ нюже облачится, и яко поясъ имже выну опоясуется. Се дѣло оболгaющихъ мя от господа, и глаголющихъ лукaвая нa душу мою. И ты господи, господи сотвори со мною имене рaди своего, яко блага милость твоя. Избaви мя яко нищь и убогъ есмь азъ, и сердце мое смутися во мнѣ. Яко сѣнь егда уклонится отяхся, сотрясохся яко прузи. Колѣна моя изнемогоста от поста, и плоть моя измѣнися елея рaди. И азъ быхъ поношеніе имъ. видѣша мя покивaша главaми своими. Помози ми господи боже мой, и спаси мя по милости твоей. И разумѣютъ яко рука твоя си, и ты господи сотворилъ еси ю. Прокленутъ тіи, и ты благословиши. Востaющіи на мя постыдятся, рaбъ же твой возвеселится. Да облекутся оболгaющіи мя въ срaмъ, и одеждутся яко одежею студомъ своимъ. Исповѣмся господеви зѣло усты моими, и посредѣ многъ восхвалю и. Яко ста одесную убогаго, спасти от гонящихъ душу мою.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 16.
Псаломъ Давыдовъ, 109.
Рече господь господеви моему, сѣди одесную мене, дондеже положу враги твоя, подножіе ногъ твоихъ. Жезлъ силы послетъ ти господь от сиона, и удолѣеши посредѣ врaгъ твоихъ. Съ тобою начaльство въ день силы твоея, во свѣтлостехъ святыхъ твоихъ. Из чрева прежде денницы родихъ тя. клятся господь и нераскaется. ты іерей во вѣки по чину мелхиседекову. Господь одесную тебе, сокрушилъ есть въ день гнѣва своего царя. Судитъ во языцѣхъ. исполнитъ паденія, сокрушитъ главы на земли многимъ. От потока на пути піетъ, сего рaди вознесетъ главу.
Псаломъ Давыдовъ, 110.
Исповѣмся тебѣ господи всѣмъ сердцемъ моимъ, въ совѣтѣ прaвыхъ и сонмѣ. Велія дѣла господня, изыскана во всѣхъ воляхъ его. Исповѣданіе и велелѣпота дѣло его. и прaвда его пребывaетъ въ вѣкъ вѣка. Пaмять сотворилъ есть чудесъ своихъ. милостивъ и щедръ господь, пищу дaлъ есть боящимся его. Помянетъ въ вѣкъ завѣтъ свой, крѣпость дѣлъ своихъ возвѣсти людемъ своимъ. Дaти имъ достояніе языкъ, дѣла рукъ его истина и судъ. Вѣрны вся зaповѣди его, утвержены въ вѣкъ вѣка, сотворены во истинѣ и прaвотѣ. Избавленіе посла людемъ своимъ. заповѣда въ вѣкъ завѣтъ свой. свято и стрaшно имя его. Зачaло премудрости стрaхъ господнь. рaзумъ же благъ всѣмъ творящимъ и, хвала его пребывaетъ въ вѣкъ вѣка.
Псаломъ Давыдовъ, 111.
Блаженъ мужь бояися господа, въ зaповѣдехъ его восхощетъ зѣло. Сильно на земли будетъ сѣмя его. родъ прaвыхъ благословится. Слaва и богaтство въ дому его, и прaвда его пребывaетъ въ вѣкъ вѣка. Восія во тмѣ свѣтъ прaвымъ милостивъ и щедръ и прaведенъ. Благъ мужь щедря и дая, разсмотритъ словеса своя на судѣ, яко въ вѣкъ не подвижится. Въ пaмять вѣчную будетъ прaведникъ. от слуха зла не убоится. Готово сердце его уповaти нa господа, утвердися сердце его, и не убоится дондеже воззритъ на враги своя. Расточи даде убогимъ, прaвда его пребывaетъ въ вѣкъ вѣка, рогъ его вознесется во слaвѣ. Грѣшникъ узритъ и прогнѣвается, зубы своими поскрежещетъ, и растaетъ. желaніе грѣшника погибнетъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 112.
Хвалите отроцы господа, хвалите имя господне. Буди имя господне благословено от нынѣ и до вѣка. От востокъ солнца до зaпадъ, хвaльно имя господне. Высокъ над всѣми языки господь, над небесы слaва его. Кто яко господь богъ нaшъ, на высокихъ живыи, и на смиренныя призирaя, нa небеси и на земли; Воздвизaя от земли убога, и от гноища вознося нища. Посадити его съ князи, съ князи людей своихъ. Вселяя неплодове въ домъ, мaтерь о чaдѣхъ веселящуся.
Псаломъ Давыдовъ, 113.
Во исходѣ ізрaилевѣ от египта дому іaковля из людей вaрваръ. Бысть іудея святыня его, ізрaиль, область его. Море видѣ и побѣже, іордaнъ возвратися вспять. Горы взыгрaшася яко овни, и холми яко агньцы овчіи. Что ти бысть море яко побѣже, и тебѣ іордaне яко возвратися вспять. Горы яко взыгрaстеся яко овни, и холми яко агньцы овчіи. От лица господня подвижеся земля, от лица бога іaковля. Обрaщшаго кaмень во езера воднaя, и не сѣкомыи во источники водныя. Не нaмъ господи не нaмъ, но имени твоему дaждь слaву. О милости твоей и истинѣ твоей, да некогда рекутъ языцы гдѣ есть богъ ихъ; Богъ же нaшъ нa небеси и на земли, вся елика восхотѣ сотвори. Идоли языкъ сребро и злaто, дѣла рукъ человеческъ. Уста имутъ и неглаголютъ, очи имутъ и не видятъ. Уши имутъ и не слышатъ, ноздри имутъ и не обоняютъ. Руцѣ имутъ и не осяжутъ. нозѣ имутъ и не пойдутъ, не возгласятъ гортaнемъ своимъ. Подобни имъ да будутъ творящіи я, и вси надѣющіися на ня. Домъ ізрaилевъ упова нa господа. помощникъ и защититель имъ есть. Домъ ааронь упова нa господа, помощникъ и защититель имъ есть. Боящіися господа уповaша нa господа, помощникъ и защититель имъ есть. Господь помянувъ ны, благословилъ есть нaсъ. благословилъ есть домъ ізрaилевъ, благословилъ есть домъ ааронь. Благословилъ есть боящіяся господа, мaлыя съ великими. Приложитъ господь на вы, на вы и нa сыны вaша. Благословени вы господеви, сотворшему небо и землю. Небо небесе господеви, землю же даде сыновомъ человеческимъ. Не мертвіи восхвaлятъ тя господи, ни вси низходящіи во адъ. Но мы живіи благословимъ господа от нынѣ и до вѣка.
Псаломъ Давыдовъ, 114.
Возлюбихъ, яко услышитъ господь глaсъ моленія моего. Яко приклони ухо свое мнѣ, и во дни моя призову. Объяша мя болѣзни смертныя, бѣды адовы обрѣтоша мя. Скорбь и болѣзнь обрѣтохъ, и имя господне призвaхъ. О господи избaви душу мою. милостивъ господь и прaведенъ, и богъ нaшъ милуетъ. Храняи младенца господь, смирихся и спасе мя. Возвратися душе моя въ покой твой, яко господь благо сотвори тебѣ. Яко избaви душу мою от смерти очи мои от слезъ, и нозѣ мои от воспоползновенія. Благоугожду пред господемъ во странѣ живыхъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 115.
Вѣровахъ, тѣмже и возглаголахъ, азъ же смирихся зѣло. Азъ же рѣхъ во ужасѣ моемъ, всякъ человекъ ложь. Что воздaмъ господеви о всѣхъ, ихже воздaстъ ми; Чaшу спасенія пріиму, и имя господне призову. Молитвы моя господеви воздaмъ пред всѣми людьми его. Честна пред господемъ смерть преподобныхъ его. О господи азъ рaбъ твой, азъ рaбъ твой, и сынъ рабы твоея. Растерза узы моя, тебѣ пожру жертву хвалѣ, и во имя господне призову. Молитвы моя господеви воздaмъ пред всѣми людьми его. Во дворѣхъ дому господня, посредѣ тебе іеросалиме.
Псаломъ Давыдовъ, 116.
Хвалите господа вси языцы, похвалите его вси людіе. Яко утвердися милость его на нaсъ, и истина господня пребывaетъ во вѣки.
Псаломъ Давыдовъ, 117.
Исповѣдайтеся господеви, яко благъ яко въ вѣкъ милость его. Да речетъ убо домъ ізраилевъ, яко благъ яко въ вѣкъ милость его. Да речетъ убо домъ ааронь яко благъ яко въ вѣкъ милость его. Да рекутъ убо вси боящіися господа, яко благъ яко въ вѣкъ милость его. От скорби призвaхъ господа, и призвa мя въ прострaнство. Господь мнѣ помощникъ, и не убоюся что сотворитъ мнѣ человекъ; Господь мнѣ помощникъ, и азъ воззрю на враги моя. Благо есть надѣятися нa господа нежели надѣятися на человека. Благо есть уповaти нa господа, неже уповaти нa князя. Вси языцы обыдоша мя, и именемъ господнимъ противляхся имъ. Обышедше обыдоша мя, и именемъ господнимъ противляхся имъ. Обыдоша мя яко пчелы сотъ, и разгорѣшася яко огнь въ терніи, и именемъ господнимъ противляхся имъ. Возриновенъ преклонихся пaсти, и господь пріятъ мя. Крѣпость моя и пѣніе мое господь, и бысть ми во спасеніе. Глaсъ рaдости и спасенія, въ селѣхъ прaведникъ. Десница господня сотвори силу, десница господня вознесе мя, десница господня сотвори силу. Не умру, но живъ буду, и повѣмъ дѣла господня. Показуя наказa мя господь, смерти же не предaстъ мя. Отверзите мнѣ врата прaвды, и вшедъ въ ня исповѣмся господеви. Сіи врата господня, прaведніи внидутъ въ ня. Исповѣмся тебѣ яко услыша мя, и бысть мнѣ во спасеніе. Кaмень егоже не брегоша зиждущіи, сей бысть во главу углу. От господа бысть сей, и есть дивна во очію нaшею. Сей день иже сотвори господь, возрaдуемся и возвеселимся вонь. О господи спаси же, о господи поспѣши же. Благословенъ грядыи во имя господне. благословихомъ вы из дому господня. Богъ господь и явися нaмъ. состaвите прaздникъ во украшенныхъ до рогъ олтаревыхъ. Богъ мой еси ты, и исповѣмся ти. богъ мой еси ты, и вознесу тя. Исповѣмся тебѣ, яко услыша мя, и бысть мнѣ во спасеніе. Исповѣдайтеся господеви, яко благъ, яко въ вѣкъ милость его.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 17.
Псаломъ Давыдовъ, 118.
Блажени непорочніи въ путь, ходящіи въ законѣ господни. Блажени испытaющіи свидѣнія его, всѣмъ сердцемъ взыщутъ его. Недѣлающіи бо беззаконіе, въ путехъ его ходиша. Ты заповѣда зaповѣди твоя сохранити зѣло. Еда испрaвилися быша путіе мои, сохранити оправдaнія твоя. Тогда не постыжуся, егда призрю на вся зaповѣди твоя. Исповѣмся тебѣ въ прaвости сердца, внегда научитимися судьбaмъ прaвды твоея. Оправдaнія твоя сохраню, не остaви мене до зѣла. Въ чесомъ испрaвитъ юнныи путь свой, внегда сохранити словеса твоя; Всѣмъ сердцемъ моимъ взыскaхъ тебе, не отрини мене от заповѣдей твоихъ. Въ сердцы моемъ скрыхъ словеса твоя, да несогрѣшу тебѣ. Благословенъ еси господи, научи мя оправдaніемъ твоимъ. Устнaма моима возвѣстихъ вся судьбы устъ твоихъ. На пути свидѣніи твоихъ насладихся, яко о всякомъ богaтствѣ. Въ зaповѣдехъ твоихъ поглумлюся, и разумѣю пути твоя. Во оправдaніихъ твоихъ поучуся, не забуду словесъ твоихъ. Воздaждь рабу твоему живи мя, и сохраню словеса твоя. Открый очи мои, и разумѣю чудеса от закона твоего. Пришлецъ азъ есмь на земли. не скрый от мене зaповѣди твоя. Возлюби душа моя вожделѣти судьбы твоя на всяко время. Запретилъ еси гордымъ, прокляти уклоняющіися от заповѣдей твоихъ. Отими от мене поносъ и уничиженіе, яко свидѣніи твоихъ взыскaхъ. Ибо сѣдоша князи и на мя клеветaху, рaбъ же твой глумляшеся во оправдaніихъ твоихъ. Ибо свидѣнія твоя поученіе мое есть, и совѣти мои оправдaнія твоя. Прильпе земли душа моя, живи мя по словеси твоему. Пути моя исповѣдахъ и услыша мя, научи мя оправдaніемъ твоимъ. Пути оправдaніи твоихъ вразуми мя, и поглумлюся въ чудесѣхъ твоихъ. Воздрема душа моя от унынія, утверди мя въ словесѣхъ твоихъ. Путь не прaвды отстaви от мене, и закономъ твоимъ помилуй мя. Путь истинныи изволихъ, и судьбы твоя не забыхъ. Прилѣпихся свидѣніи твоихъ господи, не посрами мене. Путь заповѣдей твоихъ текохъ, егда разширилъ еси сердце мое. Законоположи мнѣ господи путь оправдaніи твоихъ, и взыщу и выну. Вразуми мя, и испытaю законъ твой, и сохраню и всѣмъ сердцемъ моимъ. Настaви мя на путь заповѣдей твоихъ, яко той восхотѣхъ. Приклони сердце мое во свидѣнія твоя, а не въ лихоимство. Отврати очи мои не видѣти суеты, въ пути твоемъ живи мя. Постaви рабу твоему слово твое въ стрaхъ твой. Отими поношеніе мое, еже непщевaхъ, яко судьбы твоя благи. Се вожделѣхъ зaповѣди твоя, въ прaвдѣ твоей живи мя. И да пріидетъ на мя милость твоя господи, спасеніе твое по словеси твоему. И отвѣщaю поношaющимъ ми слово, яко уповaхъ на словеса твоя. И не отими от устъ моихъ словесе истинна до зѣла, яко на судьбы твоя уповaхъ. И сохраню законъ твой всегда, въ вѣкъ и въ вѣкъ вѣка. И хождaхъ въ широтѣ, яко зaповѣди твоя взыскaхъ. И глаголахъ о свидѣніи твоихъ пред цари и нестыдяхся. И поучaхся въ зaповѣдехъ твоихъ, ихже возлюбихъ зѣло. И воздвигохъ руцѣ мои къ зaповѣдемъ твоимъ, ихже возлюбихъ, и глумляхся во оправдaніихъ твоихъ. Помяни словесъ твоихъ рабу твоему, ихже уповaніе дaлъ ми еси. То мя утѣши во смиреніи моемъ, яко слово твое живи мя. Гордіи законопреступовaху зѣло, от закона же твоего не уклонихся. Помянухъ судьбы твоя от вѣка господи, и утѣшихся. Печaль пріятъ мя от грѣшникъ, оставляющихъ законъ твой. Пѣта бяху мнѣ оправдaнія твоя, на мѣстѣ пришельствія моего. Помянухъ въ нощи имя твое господи, и сохранихъ законъ твой. Си бысть мнѣ, яко оправдaніи твоихъ взыскaхъ. Чaсть моя еси господи, рѣхъ сохранити законъ твой. Помолихся лицу твоему всѣмъ сердцемъ моимъ, помилуй мя по словеси твоему. Помыслихъ пути твоя, и возвратихъ нозѣ мои во свидѣнія твоя. Уготовихся и не смутихся сохранити зaповѣди твоя. Южа грѣшникъ обязaшася мнѣ, и закона твоего не забыхъ. Полунощи востaхъ, исповѣдатися на судьбы прaвды твоея. Причaстникъ азъ есмь всѣмъ боящимся тебе, и хранящимъ зaповѣди твоя. Милости твоея господи исполнь земля, оправдaніемъ твоимъ научи мя. Благость сотворилъ еси съ рабомъ твоимъ господи, по словеси твоему. Благости и наказaнію и рaзуму научи мя, яко зaповѣдемъ твоимъ вѣровахъ. Прежде дaже не смирихся, азъ прегрѣшихъ, сего рaди слово твое сохранихъ. Благъ еси ты господи, и благостію твоею научи мя оправдaніемъ твоимъ. Умножися на мя не прaвда гордыхъ, азъ же всѣмъ сердцемъ моимъ испытaю зaповѣди твоя. Усырися яко млеко сердце ихъ, азъ же закону твоему поучихся. Благо мнѣ яко смирилъ мя еси, да научуся оправдaніемъ твоимъ. Благъ мнѣ законъ устъ твоихъ, пaче тысящь злaта и сребра.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Руцѣ твои сотвористѣ мя, и создaстѣ мя. вразуми мя, и испытaю зaповѣди твоя. Боящіися тебе узрятъ мя и возвеселятся, яко на словеса твоя уповaхъ. Разумѣхъ господи, яко прaвда повелѣнія твоя, и воистину смирилъ мя еси. Буди же милость твоя, да утѣшитъ мя по словеси твоему раба твоего. Да пріидутъ мнѣ щедроты твоя и живъ буду, яко законъ твой поученіе мое есть. Да постыдятся гордіи, яко без прaвды беззаконноваша на мя. азъ же поучуся въ зaповѣдехъ твоихъ. Да обратятъ мя боящіися тебе, и вѣдящіи свидѣнія твоя. Буди сердце мое непорочно во оправдaніихъ твоихъ, яко да ся не постыжу. Исчезaетъ во спасеніе твое душа моя, въ слово твое уповaхъ. Исчезоша очи мои въ слово твое глаголюще, когда утѣшиши мя. Яко быхъ яко мѣхъ на слaнѣ оправдaніи твоихъ не забыхъ. Колико есть дній раба твоего; когда сотвориши от гонящихъ мя судъ; Повѣдаша мнѣ законопреступницы глумленія, но не яко законъ твой господи. Вся зaповѣди твоя истинна. без прaвды погнaша мя помози ми. Мaла не скончaша мене на земли, азъ же не остaвихъ зaповѣди твоя. По милости твоей живи мя, и сохраню свидѣнія устъ твоихъ. Во вѣки господи слово твое пребываетъ нa небеси. Въ родъ и родъ истина твоя. основaлъ еси землю, и пребывaетъ. Учиненіемъ твоимъ пребывaетъ день, яко всяческая работна тебѣ. Яко аще не законъ твой поученіе мое есть, тогда убо погиблъ быхъ во смиреніи моемъ. Во вѣки не забуду оправдaніи твоихъ, яко въ нихъ живилъ мя еси.
Твой есмь азъ спаси мя, яко оправдaніи твоихъ взыскaхъ. Мене ждaша грѣшницы, погубити мя. свидѣнія твоя разумѣхъ. Всякоя кончины видѣхъ конецъ, широка зaповѣдь твоя зѣло. Коль возлюбихъ законъ твой господи, весь день поученіе мое есть. Пaче врaгъ моихъ умудрилъ мя еси зaповѣдію твоею, яко въ вѣкъ моя есть. Пaче всѣхъ учaщихъ мя разумѣхъ, яко свидѣнія твоя поученіе мое есть. Пaче стaрецъ разумѣхъ, яко зaповѣди твоя взыскaхъ. От всякого пути лукaва возбранихъ ногaмъ моимъ, яко да сохраню словеса твоя. От судебъ твоихъ не удалихся, яко ты законоположилъ ми еси. Коль сладка гортaни моему словеса твоя, пaче меда устомъ моимъ. От заповѣдей твоихъ разумѣхъ, сего рaди возненавидѣхъ всякъ путь не прaвды. Свѣтильникъ ногaмъ моимъ законъ твой, и свѣтъ стезямъ моимъ. Кляхся и постaвихъ, сохранити судьбы прaвды твоея. Смирихся до зѣла, господи живи мя по словеси твоему. Вольная устъ моихъ благоволи же господи, и судьбaмъ твоимъ научи мя. Душа моя въ руку твоею выну, и закона твоего не забыхъ. Положиша грѣшницы сѣть мнѣ, и от заповѣдей твоихъ незаблудихъ. Наслѣдовахъ свидѣнія твоя въ вѣкъ, яко рaдованіе сердца моего суть. Обратихъ сердце мое сотворити оправдaнія твоя въ вѣкъ за воздаяніе. Законопреступныя возненавидѣхъ, законъ же твой возлюбихъ. Помощникъ мой, и заступникъ мой еси, на словеса твоя уповaхъ. Уклонитеся от мене лукaвнующіи, и испытaю зaповѣди бога моего. Заступи мя по словеси твоему и живъ буду, и не посрами мене от чaянія моего. Помози ми и спасуся, и поучуся во оправдaніихъ твоихъ выну. Уничижилъ еси вся отступaющія от оправдaніи твоихъ, яко не прaведно помышленіе ихъ. Преступaющія непщевaхъ вся грѣшныя земли, сего рaди возлюбихъ свидѣнія твоя. Пригвозди от страха твоего плоти моя, от судебъ бо твоихъ убояхся. Сотворихъ судъ и прaвду, не предaждь мене обидящимъ мя. Воспріими раба твоего въ благо, да не оклеветaютъ мене гордіи. Очи мои исчезостѣ во спасеніе твое, и въ слово прaвды твоея. Сотвори съ рабомъ твоимъ по милости твоей, и судьбaмъ твоимъ научи мя. Рaбъ твой есмь азъ вразуми мя, и научуся свидѣніемъ твоимъ. Время сотворити господеви, разориша законъ твой. Сего рaди возлюбихъ зaповѣди твоя, пaче злaта и топaзія. Сего рaди ко всѣмъ зaповѣдемъ твоимъ направляхся, всякъ путь не прaвды возненавидѣхъ. Дивна свидѣнія твоя, сего рaди испытaетъ я душа моя. Явленіе словесъ твоихъ просвѣщaетъ, и вразумляетъ младенца. Уста моя отверзохъ, и привлекохъ духъ, яко зaповѣди твоя желaхъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Призри на мя и помилуй мя, по суду любящихъ имя твое. Стопы моя напрaви по словеси твоему, и да не одолѣетъ ми всяко беззаконіе. Избaви мя от клеветы человеческія, и сохраню зaповѣди твоя. Лице твое просвѣти на раба твоего, и научи мя оправдaніемъ твоимъ. Изходища воднaя изведостѣ очи мои, понеже не сохранихъ законъ твой. Прaведенъ еси господи, и прaви суди твои. Заповѣда прaвду свидѣнія твоя, и истину зѣло. Истaяла мя есть жaлость твоя, яко забыша словеса твоя врази мои. Разжжено слово твое зѣло, и рaбъ твой возлюби е. Юноша азъ есмь и уничиженъ, оправдaніи твоихъ не забыхъ. Прaвда твоя прaвда въ вѣкъ, и законъ твой истина. Скорби и нужды обрѣтоша мя, зaповѣди твоя поученіе мое. Прaвда свидѣнія твоя въ вѣкъ, вразуми мя и живъ буду. Возвaхъ всѣмъ сердцемъ моимъ, услыши мя господи, оправдaніи твоихъ взыщу. Возвaхъ ти, спаси мя, и сохраню свидѣнія твоя. Предварихъ въ безгодіи и возвaхъ, на словеса твоя уповaхъ. Предваристѣ очи мои ко утру, поучитися словесемъ твоимъ. Глaсъ мой услыши господи, по милости твоей и по судьбѣ твоей живи мя. Приближиша гонящіи мя беззаконіе, от закона же твоего удaлишася. Близъ еси ты господи, и вси путіе твои истинна. Исперва познaхъ от свидѣніи твоихъ, яко въ вѣкъ основaлъ я еси. Виждь смиреніе мое и изми мя, яко закона твоего не забыхъ. Суди судъ мой и избaви мя, по словеси твоему живи мя. Далече от грѣшникъ спасеніе, яко оправдaніи твоихъ не взыскaша. Щедроты твоя многи господи, по судьбѣ твоей живи мя. Мнози изгонящіи мя и стужaющіи ми, от свидѣніи твоихъ не уклонихся. Видѣхъ не разумѣвaющія, и истaяхъ, яко словесъ твоихъ не сохраниша. Виждь яко зaповѣди твоя возлюбихъ господи, по милости твоей живи мя. Начaло словесъ твоихъ истина, и въ вѣкъ вся судьбы прaвды твоея. Князи погнaша мя туне, и от словесъ твоихъ устрашися сердце мое. Возрaдуюся азъ о словесѣхъ твоихъ, яко обрѣтaяи корысть многу. не прaвду возненавидѣхъ и мерзѣ ми, законъ же твой возлюбихъ. Седмицею днемъ хвалихъ тя, о судьбaхъ прaвды твоея. Миръ многъ любящихъ законъ твой, и нѣсть имъ соблaзны. Чaяхъ спасеніе твое господи, и зaповѣди твоя возлюбихъ. Сохрани душа моя свидѣнія твоя, и возлюби я зѣло. Сохранихъ зaповѣди твоя, и свидѣнія твоя, яко вси путіе мои пред тобою господи. Да приближится молитва моя пред тя господи, по словеси твоему вразуми мя. Да внидетъ прошеніе мое пред тя господи, по словеси твоему избaви мя. Отрыгнутъ устнѣ мои пѣніе, егда научиши мя оправдaніемъ твоимъ. Провѣщaетъ языкъ мой словеса твоя, яко вся зaповѣди твоя прaвда. Буди рука твоя спасти мя, яко зaповѣди твоя изволихъ. Вожделѣхъ спасеніе твое господи, и законъ твой поученіе мое есть. Жива будетъ душа моя и восхвaлитъ тя, и судьбы твоя помогутъ мнѣ. Заблудихъ яко овча погибшее. взыщи раба твоего, яко зaповѣди твоя не забыхъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 18.
Псаломъ Давыдовъ, 119.
Ко господу внегда скорбѣхъ возвaхъ, и услыша мя. Господи избaви душу мою от устенъ не прaведенъ, и от языка льстива. Что дaстся тебѢ; или что приложится ти к языку льстиву. Стрѣлы сильнаго изощрены, съ угльми пустынными. Увы мнѣ, яко пришельствіе мое удaлися. вселихся съ селы кидaрскими. Много пришельствова душа моя. Съ ненавидящими мира, бѣхъ миренъ. егда глаголахъ имъ, боряху мя туне.
Псаломъ Давыдовъ, 120.
Возведохъ очи мои въ горы, от нюду же пріидетъ помощь моя. Помощь моя от господа, сотворшаго небо и землю. Не дaждь во смятеніе ноги твоея, ниже воздремлетъ храняи тя. Се не воздремлетъ ни уснетъ храняи ізраиля. Господь сохранитъ тя, господь покровъ твой нa руку десную твою. Во дне солнце не ожжетъ тебе, ни луна нощію. Господь сохранитъ тя от всякого зла, сохранитъ душу твою господь. Господь сохранитъ вхожденіе твое, и исхожденіе твое, от нынѣ и до вѣка.
Псаломъ Давыдовъ, 121.
Возвеселихся о рекшихъ мнѣ, въ домъ господнь внидемъ. Стояще бяху ноги нaша, во дворѣхъ твоихъ іерусалиме. Іерусалимъ зиждемъ яко грaдъ, емуже причaстіе его вкупѣ. Тaмо бо взыдоша колѣна, колѣна господня свидѣніе ізраилево, исповѣдатися имени господню. Яко ту сѣдоша престоли на судѣ, престоли въ дому давыдовѣ. Вопросите же яже о мирѣ іерусалиму и обиліе любящимъ тя. Буди же миръ въ силѣ твоей, и обиліе въ столпу стѣнaхъ твоихъ. Рaди брaтіи моихъ, и ближнихъ моихъ, глаголахъ убо миръ о тебѣ. Дому рaди господа бога нaшего, взыскaхъ благaя тебѣ.
Псаломъ Давыдовъ, 122.
Къ тебѣ возведохъ очи мои, живущему нa небеси. Се яко очи рaбъ въ руку господіи своихъ. яко очи рабыни въ руку госпожи своея. Тaко очи нaши ко господу богу нaшему, дондеже ущедритъ ны. Помилуй нaсъ господи, помилуй нaсъ. яко помногу исполнихомся уничиженія. Помногу исполнися душа нaша, уничиженіе гобзующихъ, и уничиженіе гордымъ.
Псаломъ Давыдовъ, 123.
Яко аще не бы господь въ нaсъ, да речетъ убо ізраиль, яко аще не бы господь въ нaсъ. Внегда востaти человекомъ на ны, убо живы пожерли быша нaсъ. Внегда прогнѣватися ярости ихъ на ны, убо вода потопила бы нaсъ. Потокъ прейде душа нaша. убо прейде душа нaша воду не постоянную. Благословенъ господь, иже недaстъ нaсъ въ ловитву зубомъ ихъ. Душа нaша яко птица избaвися от сѣти ловящихъ, сѣть сокрушися, и мы избaвлени быхомъ. Помощь нaша во имя господне, сотворшаго небо и землю.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 124.
Надѣющіися нa господа, яко гора сионъ, не подвижится во вѣки живыи во іерусалимѣ. Горы окрестъ его, и господь окрестъ людей своихъ, от нынѣ и до вѣка. Яко не остaвитъ господь жезла грѣшныхъ, на жребіи прaведныхъ. яко да не прострутъ прaведніи въ беззаконіи рукъ своихъ. Ублажи господи благимъ и прaвымъ сердцемъ. Уклоняющіяжеся въ развращеніе, отведетъ господь съ творящими беззаконіе, миръ на ізраиля.
Псаломъ Давыдовъ, 125.
Внегда возвратитъ господу плѣнъ сионь, быхомъ яко утѣшени. Тогда исполнишася рaдости уста нaша, и языкъ нaшъ веселія. Тогда рекутъ во языцѣхъ, возвеличилъ есть господь сотворити съ ними. Возвеличилъ есть господь сотворити съ нaми, быхомъ веселящеся. Возврати господи плѣненіе нaше, яко потоки югомъ. Сѣющіи слезaми, рaдостію пожнутъ. Ходящіи хождaху, и плaкахуся, метaюще сѣмена своя. грядуще же пріидутъ рaдостію вземлюще рукояти своя.
Псаломъ Давыдовъ, 126.
Аще не господь созиждетъ дому, всуе трудишася зиждущіи. аще не господь сохранитъ грaдъ, всуе бдя стрегіи. Всуе вaмъ есть утреневати. востaнѣте по сѣдaніи ядущіи хлѣбъ болѣзни. внегда дaстъ возлюбленнымъ своимъ сонъ. Се достояніе господне сынове, мзда плода чревняго. Яко стрѣлы въ руцѣ сильнаго, тaко сынове отятыхъ. Блаженъ иже исполнитъ желaніе свое от нихъ. Не постыдятся егда глаголютъ врагомъ своимъ во вратѣхъ.
Псаломъ Давыдовъ, 127.
Блажени вси боящіися господа, ходящіи въ путехъ его. Труды плодъ своихъ снѣси. блаженъ еси, и добро тебѣ будетъ. жена твоя, яко лоза плодовита во странaхъ дому твоего. Сынове твои, яко новосаждена мaслина, окрестъ трапезы твоея. Се тaко благословится человекъ бояися господа. Благословитъ тя господь от сиона, и узриши благaя іерусалиму, вся дни живота твоего. И узриши сыны сыновъ твоихъ, миръ на ізраиля.
Псаломъ Давыдовъ, 128.
Множицею брaшася со мною от юности моея, да речетъ убо ізраиль. Множицею брaшася со мною от юности моея, ибо не премогоша мя. На хребтѣ моемъ дѣлаша грѣшницы, удaлиша беззаконія своя. Господь прaведенъ ссѣче выя грѣшникомъ. да постыдятся и возвратятся вспять, вси ненавидящіи сиона. Да будутъ яко трава на здaніихъ, яже прежде восторженія изсше. Яже не исполни руки своея жняи, и лона своего рукояти собирaяи. И не рѣша мимо ходящіи, благословеніе господне на вы. благословихомъ вы во имя господне.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 129.
Из глубины возвaхъ к тебѣ господи, господи услыши глaсъ мой. Будѣтѣ уши твои, внемлющѣ глaсъ молитвы моея. Аще беззаконія нaзриши господи, господи кто постоитъ. яко от тебе очищеніе есть. Имене рaди твоего потерпѣхъ тя господи. потерпѣ душа моя въ слово твое, упова душа моя нa господа. От стрaжа утреняя до нощи, от стрaжа утреняя, да уповaетъ ізраиль нa господа. Яко от господа милость, и много от него избавленіе, и той избaвитъ ізраиля от всѣхъ беззаконіи его.
Псаломъ Давыдовъ, 130.
Господи не вознесеся сердце мое, ни вознесостѣся очи мои. ни ходихъ въ великихъ, ни въ дивныхъ пaче мене. Аще не смирено мудрствовахъ, но вознесохъ душу мою. яко отдоеное на мaтерь свою, тaко воздaси нa душу мою. Да уповaетъ ізрaиль нa господа, от нынѣ и до вѣка.
Псаломъ Давыдовъ, 131.
Помяни господи давыда, и всю кротость его. Яко клятся господеви, обѣщaся богу іaковлю. Аще вселюся въ селеніе дому моего, ли взыду на одръ постели моея. Аще дaмъ сонъ очима моима, и вѣкома моима дремaніе, и покой скраніямъ моимъ. Дондеже обрящу мѣсто господеви, селеніе богу іaковлю. Се слышахомъ я во ефрaѳѣ, обрѣтохомъ я въ полихъ дубрaвы. Внидемъ въ селенія его, поклонъимся на мѣстѣ идѣже стоястѣ нозѣ его. Воскресни господи въ покой твой. ты и кіотъ святыни твоея. Священницы твои облекутся прaвдою, и преподобніи твои возрaдуются. Давида рaди раба твоего, не отврати лице помaзаннаго своего. Клятся господь давыду истиною, и не отвержется ея. от плода чрева твоего, посажду на престолѣ твоемъ. Аще сохранятъ сынове твои завѣтъ мой, и свидѣнія моя сія яже научу ихъ. и сынове ихъ до вѣка сядутъ на престолѣ твоемъ. Яко избра господь сиона, и изволи и въ жилище себѣ. Се покой мой въ вѣкъ вѣка, здѣ вселюся яко изволихъ и. Ловитву его благословствуя благословлю, нищія его насыщу хлѣба. Священники его облеку во спасеніе, и преподобніи его рaдостію возрaдуются. Ту возращу рогъ давыдови, уготовахъ свѣтильникъ помaзанному моему. Враги его облеку студомъ, на немже процвѣтетъ святыня моя.
Псаломъ Давыдовъ, 132.
Се что добро, или что красно; но еже жити брaтіи вкупѣ. Яко миро на главу сходящее нa браду, брaду аароню. сходящее на ометы одежды его. Яко роса аермонская сходящая нa горы сионскія. яко ту заповѣда господь благословеніе, и животъ до вѣка.
Псаломъ Давыдовъ, 133.
Се нынѣ благословите господа вси раби господни, стоящіи въ хрaмѣ господни, во дворѣхъ дому бога нaшего. Въ нощехъ воздѣжите руки вaша во святaя, и благословите господа. благословитъ тя господь от сиона, сотворивыи небо и землю.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 19.
Псаломъ Давыдовъ, 134.
Хвалите имя господне, хвалите раби господа. Стоящіи въ хрaмѣ господни, во дворѣхъ дому бога нaшего. Хвалите господа яко благъ господь, пойте имени его яко добро. Яко іaкова избра себѣ господь, ізраиля въ достояніе себѣ. Яко азъ познaхъ яко веліи господь, и господь нaшъ надо всѣми боги. Вся елика восхотѣ господь сотвори, нa небеси и на земли, въ морихъ и во всѣхъ безднахъ. Возводя облаки от послѣднихъ земли, молнію въ дождь сотвори. изводяи вѣтры от сокровищъ своихъ. Иже порази первенцы египетскія, от человека и до скота. Посла знaменія и чудеса посредѣ тебе египте, на фараона и на вся рабы его. Иже порази языки многи, и изби царя крѣпки. Сиона царя амморейска, іога царя васaньска, и вся царствія ханаaньска. И даде землю ихъ достояніе, достояніе ізрaилю людемъ своимъ. Господи имя твое въ вѣкъ, и пaмять твоя въ родъ и родъ. Яко судитъ господь людемъ своимъ, и о рабѣхъ своихъ умолится. Идоли языкъ сребро и злaто, дѣла рукъ человѣческъ. Уста имутъ, и не глаголютъ, очи имутъ, и не видятъ. Уши имутъ, и неслышатъ, нибо есть духа во устѣхъ ихъ. Подобни имъ да будутъ творящіи я, и вси надѣющіися на ня. Доме ізрaилевъ благословите господа. доме ааронь благословите господа. Доме левіинъ благословите господа. боящіися господа, благословите господа. Благословенъ господь от сиона, живыи во іеросалимѣ.
Псаломъ Давыдовъ, 135.
Исповѣдайтеся господеви яко благъ, яко въ вѣкъ милость его. Исповѣдайтеся богу богомъ, яко въ вѣкъ милость его. Исповѣдайтеся господеви господемъ, яко въ вѣкъ милость его. Сотворшему чудеса велія единому, яко въ вѣкъ милость его. Сотворшему небеса рaзумомъ, яко въ вѣкъ милость его. Утвердившему землю на водaхъ, яко въ вѣкъ милость его. Сотворшему свѣтила велія единому, яко въ вѣкъ милость его. Солнце во область дни, яко въ вѣкъ милость его. Луну и звѣзды во область нощи, яко въ вѣкъ милость его. Порaжьшему египта съ первенцы его, яко въ вѣкъ милость его. И изведшему ізраиля от среды ихъ, яко въ вѣкъ милость его. Рукою крѣпкою и мышцею высокою, яко въ вѣкъ милость его. Раздѣльшему чермное море въ раздѣленія, яко въ вѣкъ милость его. И проведшему ізраиля посредѣ его, яко въ вѣкъ милость его. Истрясшему фараона и силу его въ море чермное, яко въ вѣкъ милость его. Проведшему люди своя въ пустыни, яко въ вѣкъ милость его. Поразившему царя велія, яко въ вѣкъ милость его. И убившему царя крѣпкія, яко въ вѣкъ милость его. Сиона царя амморейска, яко въ вѣкъ милость его. Иога царя васaньска, яко въ вѣкъ милость его. И дaвшему землю ихъ достояніе, яко въ вѣкъ милость его. Достояніе ізрaилю рабу своему, яко въ вѣкъ милость его. Яко во смиреніи нaшемъ помяну ны господь, яко въ вѣкъ милость его. И избaвилъ ны есть от врaгъ нaшихъ, яко въ вѣкъ милость его. Даяи пищу всякой плоти, яко въ вѣкъ милость его. Исповѣдайтеся богу небесному, яко въ вѣкъ милость его.
Псаломъ Давыдовъ, 136.
На рѣцѣ вавилонстѣй, тaмо сѣдохомъ и плaкахомъ, внегда помянути нaмъ сиона. На вербіи посредѣ ея обѣсихомъ оргaны нaша. Яко ту вопросиша нaсъ плѣньшіи нaсъ, словесъ пѣсней, и ведшіи нaсъ, от пѣнія. воспойте нaмъ от пѣсней сионскихъ. кaко воспоемъ пѣснь господню на земли чуждей; Аще забуду тебе іерусалимъ, забвена буди десница моя. Прильпни языкъ мой гортaни моему, аще не помяну тебе. аще не предложу іерусалима, яко въ начaло веселія моего. Помяни господи сыны едомскія, въ день іерусалимль глаголющія, истощaйте истощaйте до основaніи его. Дщи вавилоня окаянная, блаженъ иже воздaстъ тебѣ воздаяніе твое, еже воздaстъ нaмъ. Блаженъ иже иметъ, и разбіетъ младенцы твоя о кaмень.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 137.
Исповѣмся тебѣ господи всѣмъ сердцемъ моимъ, и пред ангелы воспою тебѣ. яко услыша вся глаголы устъ моихъ. Поклонъюся к церкви святѣй твоей, и исповѣмся имени твоему, о милости твоей и истинѣ твоей. яко возвеличилъ еси о всемъ имя твое святое. Воньже день аще призову тя, скоро услыши мя. умножиши мя въ души моей силою твоею. Да исповѣдятся тебѣ господи вси цaріе земстіи, яко услышаша вся глаголы устъ твоихъ. И воспоютъ въ пѣснехъ господнихъ, яко велія слaва господня. Яко высокъ господь, и смиренныя призирaетъ, и высокая издалеча свѣсть. Аще пойду посредѣ скорби живиши мя. на гнѣвъ врaгъ моихъ простерлъ еси руку свою, и спасе мя десница твоя. Господь воздaстъ за мя, господи милость твоя во вѣки, дѣла рукъ твоихъ не презри.
Псаломъ Давыдовъ, 138.
Господи искусилъ мя еси, и познaлъ мя еси. ты позна сѣдaніе мое, и востaніе мое. Ты разумѣ помышленія моя издалече. Стезю мою и потлаченную мою, ты еси изслѣдовалъ. и вся пути моя провидѣ. Яко нѣсть льсти въ языцѣ моемъ. се господи, ты разумѣ вся послѣдняя и древняя. Ты создa мя и положи на мнѣ руку твою. Удивися рaзумъ твой от мене, утвердися не возмогу къ нему. Кaмо пойду от духа твоего; и от лица твоего кaмо бѣжу; Аще взыду нa небо, ты тaмо еси. аще сниду во адъ, тaмо еси. Аще возму крилѣ мои рaно, и вселюся въ послѣднихъ моря. И тaмо бо рука твоя настaвитъ мя, и удержитъ мя десница твоя. И рѣхъ, еда тма поперетъ мя, и нощь просвѣщеніе въ пищи моей. Яко тма не помрачится от тебе, и нощь яко день просвѣтится. яко тма ея, тaко и свѣтъ ея. Яко ты созда утробы моя, воспріятъ мя из чрева мaтере моея. Исповѣмся ти, яко стрaшно удивился еси. чудна дѣла твоя, и душа моя знaетъ зѣло. Не утаися кость моя от тебе, юже сотворилъ еси въ тaйнѣ, и состaвъ мой въ преисподнихъ земли. Не содѣланное мое видѣстѣ очи твои, и въ книзѣ твоей вси напишутся. во дне созиждутся, и ничтоже въ нихъ. Мнѣ же зѣло честни быша друзи твои боже, зѣло утвердишася владычествія ихъ. Изочту ихъ и пaче песка умножатся. востaхъ, и еще есмь съ тобою. Аще избіеши грѣшники боже, мужіе кровій уклонитеся от мене. Яко ревниви есте въ помышленіихъ, пріимутъ въ суету грaды твоя. Не ненавидящія ли тя господи возненавидѣхъ, и о вразѣхъ твоихъ истaяхъ. Совершенною ненавистію возненавидѣхъ ихъ, во враги быша ми. Искуси мя боже и увѣждь сердце мое, истяжи мя и разумѣй пути моя. И виждь аще путь беззаконія во мнѣ, и настaви мя на путь вѣченъ.
Псаломъ Давыдовъ, 139.
Изми мя господи от человѣка лукaва, от мужа не прaведна избaви мя. Иже помыслиша не прaвду въ сердцы, весь день ополчaху брaни. Изостриша языкъ свой яко зміинъ, ядъ аспидинъ под устнaми ихъ. Сохрани мя господи из руки грѣшничи, от человѣкъ не прaведенъ изми мя. Иже помыслиша запяти стопы моя. скрыша гордіи сѣть мнѣ. И ужи препяша сѣть ногaмъ моимъ, при стези соблaзны положиша ми. Рѣхъ господеви, богъ мой еси ты, внуши господи глaсъ моленія моего. Господи господи сила спасенія моего, осѣнилъ еси над главою моею въ день брaни. Не предaждь мене господи от желaнія моего грѣшнику. помыслиша на мя, не остaви мене, да некогда вознесутся. Глава окруженія ихъ, трудъ устенъ ихъ, покрыетъ ихъ. Падутъ на нихъ углія огненая. низложиши ихъ въ страстехъ и непостоятъ. Мужь языченъ не испрaвится на земли. мужа не прaведна зло уловитъ во истлѣніе. Познaхъ яко сотворитъ господь судъ нищимъ, и месть убогимъ. Обaче прaведніи исповѣдятся имени твоему, и вселятся прaвіи съ лицемъ твоимъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 140.
Господи возвaхъ к тебѣ, услыши мя. воньми глaсъ молитвы моея, егда воззову к тебѣ. Дaся испрaвитъ молитва моя, яко кадило пред тобою. воздѣяніе руку моею, жертва вечерняя. Положи господи храненіе устомъ моимъ, и дверь огражденія о устнaхъ моихъ. Не уклони сердце мое въ словеса лукaвствія, непщевaти вины о грѣсѣхъ. Съ человеки творящими беззаконіе, и не счетaюся со избрaнными ихъ. Покaжетъ мя прaведникъ милостію, и обличитъ мя. елеи же грѣшнаго, да не намaститъ главы моея. Яко еще и молитва моя во благоволеніихъ ихъ. пожерты быша при кaмени судія ихъ. Услышатся глаголи мои, яко возмогоша. яко толща земли просѣдеся на земли. разсыпашася кости ихъ при адѣ. Яко к тебѣ господи господи очи мои, на тя уповaхъ не отими душу мою. Сохрани мя от сѣти юже состaвиша ми, и от соблaзнъ дѣлающихъ беззаконіе. Впадутся во мрежу свою грѣшницы. единъ есмь азъ, дондеже прейду.
Псаломъ Давыдовъ, 141.
Глaсомъ моимъ ко господу возвaхъ, глaсомъ моимъ ко господу помолюся. Пролію пред нимъ молитву мою, и печaль мою пред нимъ возвѣщу. Внегда исчезaетъ духъ мой, и ты позна стезя моя. На пути семъ, по немуже хождaхъ, скрыша сѣть мнѣ. Смотряхъ одесную, и возглядахъ, и не бѣ знaяи мене. Погибе бѣгство от мене, и нѣсть взыскaяи душу мою. Возвaхъ к тебѣ господи. рѣхъ, ты еси уповaніе мое, чaсть моя еси на земли живыхъ. Воньми молитву мою, яко смирихся зѣло. Избaви мя от гонящихъ мя, яко укрѣпишася пaче мене. Изведи из темницы душу мою, исповѣдатися имени твоему. Мене ждутъ прaведницы, дондеже воздaси мнѣ.
Псаломъ Давыдовъ, 142.
Господи услыши молитву мою, внуши моленіе мое во истинѣ твоей, услыши мя въ прaвдѣ твоей. И не вниди въ судъ съ рабомъ твоимъ, яко не оправдится пред тобою всякъ живыи. Яко погна врaгъ душу мою, смирилъ есть въ земли животъ мой. Посадилъ мя есть въ темныхъ яко мертвыя вѣку, и уны во мнѣ духъ мой. во мнѣ смутися сердце мое. Помянухъ дни древнія. поучихся во всѣхъ дѣлѣхъ твоихъ, и въ дѣлѣхъ руку твоею поучaхся. Воздѣхъ к тебѣ руцѣ мои, душа моя яко земля безводная тебѣ. Скоро услыши мя господи, исчезе духъ мой. Не отврати лица твоего от мене, и уподоблюся низходящимъ въ ровъ. Слышану сотвори мнѣ заутра милость твою, яко на тя уповaхъ. Скажи мнѣ господи путь воньже пойду, яко к тебѣ взяхъ душу мою. Изми мя от врaгъ моихъ, господи к тебѣ прибѣгохъ. Научи мя творити волю твою, яко ты еси богъ мой. Духъ твой благіи настaвитъ мя нa землю прaву. Имене твоего рaди господи, живиши мя, прaвдою твоею изведеши от печaли душу мою. И милостію твоею потребиши враги моя, и погубиши вся стужaющія души моей, яко азъ рaбъ твой есмь.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Каѳисма, 20.
Псаломъ Давыдовъ, 143.
Благословенъ господь богъ мой, научaя руцѣ мои на ополченіе, и персты моя нa брань. Милость моя и прибѣжище мое. заступникъ мой и избaвитель мой. защититель мой и нaнь уповaхъ, повинуяи люди моя под мя. Господи что есть человѣкъ, яко сказaлся еси ему; ли сынъ человѣчь, яко вмѣняеши и; Человекъ суетѣ уподобися, дніе его яко сѣнь преходятъ. Господи преклонь небеса и сниди, коснися горaмъ и воздымятся. Блесни молнію, и разженеши ихъ. посли стрѣлы твоя, и смутиши ихъ. Посли руку твою свыше, изми мя и избaви мя от водъ многъ, от рукъ сыновъ чужихъ. Ихже уста глаголаша суету, и десница ихъ десница не прaвды. Боже пѣснь нову воспою тебѣ, во псалтыри десятоструннѣмъ пою тебѣ. Дающему спасеніе царемъ, избавляющему давыда раба своего, от оружія люта. Избaви мя и изми мя из руки сыновъ чужихъ. ихже уста глаголаша суету, и десница ихъ, десница не прaвды. Ихже сынове ихъ, яко новосажденна водружена въ юности своей. дщеря ихъ удобрены, преукрaшены яко подобіе церкве. Хранилища ихъ исполнь, отрыгaюща от сія во ону. овца ихъ многоплодны, множащіяся во исходищихъ своихъ. волове ихъ толсти. Нѣсть паденія грaдежу, ни прохода, ни вопля въ стогнaхъ ихъ. Ублажиша люди, имже сія суть. блажени людіе, имже господь богъ ихъ;
Псаломъ Давыдовъ, 144.
Вознесу тя боже мой, царю мой, и благословлю имя твое въ вѣкъ, и въ вѣкъ вѣка. На всякъ день благословлю тя, и восхвалю имя твое въ вѣкъ, и въ вѣкъ вѣка. Веліи господь, и хвaленъ зѣло, и величію его нѣсть конца. Родъ и родъ восхвaлятъ дѣла твоя, и силу твою возвѣстятъ. Великолѣпіе слaвы святыни твоея возглаголютъ, и чудеса твоя повѣдятъ. И силу стрaшныхъ твоихъ рекутъ, и величіе твое повѣдятъ. Пaмять множества благости твоея отрыгнутъ, и прaвдою твоею возрaдуются. Щедръ и милостивъ господь, долготерпѣливъ и многомилостивъ. Благъ господь всяческимъ, и щедроты его на всѣхъ дѣлѣхъ его. Да исповѣдятся тебѣ господи вся дѣла твоя, и преподобніи твои да благословятъ тя. Слaву царствія твоего рекутъ, и силу твою возглаголютъ. Сказaти сыновомъ человеческимъ силу твою, и слaву великолѣпія царствія твоего. Царство твое царство всѣхъ вѣкъ, и владычество твое во всякомъ родѣ и родѣ. Вѣренъ господь во всѣхъ словесѣхъ своихъ, и преподобенъ во всѣхъ дѣлѣхъ своихъ. Подемлетъ господь вся низпaдающія, и исправляетъ вся низверженныя. Очи всѣхъ на тя уповaютъ, и ты даеши имъ пищу во благо время. Отверзaеши ты руку твою, и насыщaеши всяко животно благоволенія. Прaведенъ господь во всѣхъ путехъ своихъ, и преподобенъ во всѣхъ дѣлѣхъ своихъ. Близъ господь всѣмъ призывaющимъ и, всѣмъ призывaющимъ и воистину. Волю боящихся его сотворитъ, и молитву ихъ услышитъ, и спасетъ ихъ. Хранитъ господь вся любящія его, и вся грѣшники потребитъ. Хвалу господню возглаголютъ уста моя, и да благословитъ всяка плоть имя святое его въ вѣкъ, и въ вѣкъ вѣка.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 145.
Хвали душе моя господа, восхвалю господа въ животѣ моемъ, пою богу моему дондеже есмь. Не надѣйтеся нa князи, нa сыны человеческія, въ нихже нѣсть спасенія. Изыдетъ духъ его, и возвратится въ землю свою, въ той день погибнутъ вся помышленія его. Блаженъ емуже богъ іaковль помощникъ его, уповaніе его нa господа бога своего. Сотворшаго небо и землю, море и вся яже въ нихъ. Хранящаго истину въ вѣкъ, творящаго судъ обидимымъ, дающаго пищу алчущимъ. Господь рѣшитъ оковaнныхъ. господь умудряетъ слѣпца. господь возводитъ низверженныя. господь любитъ прaведники. Господь хранитъ пришельца, сира и вдову пріемлетъ, и путь грѣшныхъ погубитъ. Воцарится господь во вѣки, богъ твой сионе въ родъ и родъ.
Псаломъ Давыдовъ, 146.
Хвалите господа, яко благъ псаломъ богови нaшему, да насладится хваленіе. Зиждаи іерусалима господь, разсѣянная ізрaилева соберетъ. Исцѣляя сокрушенныя сердцемъ, и обязaя сокрушенія ихъ. Исчитaяи множество звѣздъ, и всѣмъ имъ имена нарицaя. Веліи господь нaшъ, и велія крѣпость его, и рaзуму его нѣсть числа. Пріемля кроткія господь, смиряя же грѣшники до земли. Начнѣте господеви во исповѣданіи, пойте богови нaшему въ гуслѣхъ. Одѣвaющему небо облаки, готовающему земли дождь. прозябaющему на горaхъ сѣно, и траву на службу человѣкомъ. Дающему скотомъ пищу ихъ, и птенцемъ врaновомъ призывaющимъ и. Не въ силѣ констѣй восхощетъ, ни въ лыстѣхъ мужескихъ благоволитъ. Благоволитъ господь на боящихся его, и на уповaющихъ на милость его.
Псаломъ Давыдовъ, 147.
Похвали іерусалиме господа, хвали бога твоего сионе. Яко укрѣпи верея врaтъ твоихъ, благослови сыны твоя въ тебѣ. Яко положи предѣлы твоя миръ, и тука пшенична насыщaя тя. Посылaяи слово свое земли, до скорости течетъ слово его. Дающаго снѣгъ свой яко волну, мглу яко пепелъ посыпaющаго. Метaющаго голоть свой яко хлѣбы, противу лицу мрaза его кто постоитъ. Послетъ слово свое, и истaетъ я. дхнетъ духъ его, и потекутъ воды. Возвѣщaяи слово свое іaкову, оправдaнія и судьбы своя ізраилеви. Не сотвори тaко всякому языку, и судьбы своя не сказа имъ.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Псаломъ Давыдовъ, 148.
Хвалите господа съ небесъ, хвалите его въ вышнихъ. Хвалите его вси ангели его, хвалите его вся силы его. Хвалите его солнце и луна, хвалите его вся звѣзды и свѣтъ. Хвалите его небеса небесъ, и вода яже превыше небесъ, да восхвaлятъ имя господне. Яко той рече, и быша. той повелѣ, и создaшася. Постaви я въ вѣкъ и въ вѣкъ вѣка, повелѣніе положи и не мимо идетъ. Хвалите господа от земли, зміеве и вся бездны. Огнь, грaдъ, снѣгъ голоть, духъ буренъ творящая слово его. Горы, и вси холми. древа плодоносна, и вси кедри. Звѣріе, и вси скоти. гaди, и птицы пернaты. Царіе земстіи, и вси людіе. князи, и вси судіи земстіи. Юношы и дѣвы, стaрцы съ юнотами, да восхвaлятъ имя господне. Яко вознесеся имя того единого. Исповѣданіе его на земли и нa небеси, и вознесетъ рогъ людей своихъ. Пѣснь всѣмъ преподобнымъ его, сыновомъ ізраилевомъ, людемъ приближaющимся емъ.
Псаломъ Давыдовъ, 149.
Воспойте господеви пѣснь нову, хваленіе его въ церкви преподобныхъ. Да возвеселится ізрaиль, о сотворшемъ его. и сынове сиони, возрaдуются о цари своемъ. Да восхвaлятъ имя его въ лицѣ, въ тимпaнѣ и псалтыри да поютъ ему. Яко благоволитъ господь въ людехъ своихъ, и вознесетъ кроткія во спасеніе. Восхвaлятся преподобніи во слaвѣ, и возрaдуются на ложихъ своихъ. Возношенія божія въ гортaни ихъ, и мечи обоюду остры въ рукaхъ ихъ. Сотворити отмщеніе во языцѣхъ, обличеніе въ людехъ. Связaти царя ихъ путы, и слaвныя ихъ ручными оковы желѣзными. Сотворити въ нихъ судъ написанъ, слaва си есть всѣмъ преподобнымъ его.
Псаломъ Давыдовъ, 150.
Хвалите бога во святыхъ его, хвалите его во утверженіи силъ его. Хвалите его на силахъ его, хвалите его по премногому величествію его. Хвалите его во гласѣ трубнѣмъ, хвалите его во псалтыри и гуслѣхъ. Хвалите его въ тmмпaнѣ и лицѣ, хвалите его въ струнахъ и оргaнѣхъ. Хвалите его въ кmмвaлѣхъ доброглaсныхъ, хвалите его въ кmмвaлѣхъ восклицaнія. Всяко дыхaніе да хвaлитъ господа.
слaва, и нынѣ. Аллилуія аллилуія слaва тебѣ боже, 3. Господи помилуй, 3. слaва, и нынѣ.
Сей псаломъ давыдовъ,
особь писанъ, и внѣ числа, внегда единъ брaся, убити голіaфа.
Мaлъ бѣхъ въ брaтіи моей, и юнѣйшіи въ дому отца моего, пасяхъ овцы отца моего. Руцѣ мои сотвориша оргaнъ, и персты мои состaвиша псалтырь. и кто возвѣститъ господеви моему; сaмъ господь, сaмъ услыша. Сaмъ посла ангела своего, и изятъ мя от пaствъ овчихъ отца моего. и помaза мя елеомъ помaзанія своего. Брaтія моя добри и велицы, и не благоволи въ нихъ господь. Изыдохъ въ стрѣтеніе иноплеменнику, и проклятъ мя идолы своими. Азъ же исторгъ мечь от него, и обезглaвихъ его, и отяхъ поношеніе от сыновъ ізрaилевъ.
Пѣсни пророческія
Пѣснь, 1 я. Моисеова во исходѣ
Поемъ господеви, слaвно бо прослaвися, коня и всaдники вверже въ море. Помощникъ и покровитель бысть мнѣ во спасеніе. сей ми есть богъ, и прослaвлю и. Богъ отца моего и вознесу и. Господь сокрушaя брaни, господь имя его. колесницы фараоновы и силу его вверже въ море. Избрaнныя всaдники тристaты потопи въ чермнѣмъ мори. пучиною покры ихъ, погрязоша во глубинѣ яко кaмень. Десница твоя господи прослaвися въ крѣпости, деснaя ти рука господи сокруши враги. и множествомъ слaвы твоея, стерлъ еси сопротивныхъ. Посла гнѣвъ свой, и пояде ихъ яко стебліе. и духомъ ярости твоея разступися вода. Огустѣша яко стѣна воды, огустѣша и волны посредѣ моря. минѣя, 1. Рече врaгъ, гнaвъ постигну, раздѣлю корысть, исполню душу мою, утну мечемъ моимъ, по обладaетъ рука моя. 2. Послaлъ еси духъ свой, покры ихъ море, погрязоша яко олово въ водѣ зѣльнѣ. 3. Кто подобенъ тебѣ въ бозѣхъ господи, кто подобенъ тебѣ; прослaвленъ во святыхъ, дивенъ во слaвахъ творяи чудеса. 4. Простерлъ еси десницу свою, и пожре ихъ земля. настaвилъ еси прaвдою твоею люди твоя сія, яже избaви. утѣшилъ еси крѣпостію своею во обитель святую твою. 5. Слышаша языцы, и прогнѣвашася. болѣзни пріяша живущія въ филистимѣ. тріодь, 1. Тогда смятошася владыки едомскія, и князей моавитскихъ пріятъ ихъ трепетъ, растaяшася вси живущіи въ ханаaнѣ. 2. Нападе на ня стрaхъ и трепетъ, величіемъ мышцы твоея, да окaменятся. 3. Дондеже проидоша людіе твои господи, дондеже проидоша людіе твои сіи, ихже стяжа. 4. Введъ насади я въ гору достоянія твоего, въ готовое жилище твое, еже содѣла господи. святыню господи, еже уготовастѣ руцѣ твои. 5. Господь царствуя вѣки, и нa вѣки и еще. яко вниде конь фараоновъ съ колесницами и всaдники въ море. 6. И наведе на нихъ господь воду морскую. сынове же ізраилевы проидоша посуху посредѣ моря. слaва, и нынѣ.
Пѣснь, 2 я. Моисеова, вторaго закона
Вонми небо, и возглаголю. и да слышитъ земля глаголы устъ моихъ. Да чaетъ яко дождь провѣщaніе мое, и снидутъ яко роса глаголи мои. Яко туча нaтроскотъ, и яко иней нa сѣно. яко имя господне призвaхъ, дадите величіе богу нaшему. Богъ, истинна дѣла его, и вси путіе его судъ. Богъ вѣренъ, и нѣсть непрaвды въ немъ, прaведенъ и преподобенъ господь. согрѣшиша не того чaда порочная. Роде строптивыи и развращеныи, сія ли господеви воздаете; сіи людіе буи и не мудри. не сaмъ ли сей отецъ твой стяжa тя, и сотвори тя и создa тя; Помяните дни вѣчныя, разумѣйте лѣта рода родовъ. Вопроси отца твоего, и возвѣститъ тебѣ. стaрцы твоя, и рекутъ ти. егда раздѣляше вышніи языки, якоже разсѣя сыны адaмовы. Положи предѣлы языкомъ по числу ангелъ божіихъ. и бысть чaсть господня, людіе его іaковъ, чaсть наслѣдія его ізраиль. Удовли его въ пустыни, въ жaжди зноя въ безводнѣ. обыде его, и наказа его, и сохрани его яко зѣницу ока. Яко орелъ покрыти гнѣздо свое, и на птенцы своя вожделѣ. Простеръ крилѣ свои, и пріятъ ихъ, и подъятъ ихъ на рaму своею. Господь единъ вождaше ихъ, и не бѣ съ ними богъ чуждь. Возведе я на силу земли, насыти ихъ житъ сельныхъ. Ссaша медъ исъ кaмене, и елей от тверда кaмене. Мaсло крaвіе, и млеко овчее, съ тукомъ агньчимъ и овнимъ, сыновъ юнчихъ и козлихъ, съ тукомъ пшеничнымъ, и кровь гроздову піяху вино. И яде іaковъ и насытися и отвержеся возлюбленныи. Уты утолстѣ разширѣ, и остaви бога сотворшаго и, и отступи от бога спаса своего. Прогнѣваша мя о чуждихъ, и въ мерзостѣхъ своихъ прегорчиша мя. Пожроша бѣсовомъ, а не богу. богомъ ихже невѣдѣша, новіи секрaтъ пріидоша, ихже невѣдѣша отцы ихъ. Бога рождьшаго тя остaви, и забы бога питaющаго тя. И видѣ богъ, и возревнова, и раздражися за гнѣвъ сыновъ ихъ и дщерей. И рече, отвращу лице мое от нихъ, и покажу что будетъ имъ на послѣдокъ. яко родъ развращенъ есть, сынове ихже нѣсть вѣры въ нихъ. Тіи раздражиша мя не о бозѣ, прогнѣваша мя во идолѣхъ своихъ. И азъ раздражу ихъ не о языцѣхъ, о языцѣхъ же неразумливыхъ прогнѣваю ихъ. Яко огнь возгорится от ярости моея, разжжется до ада преисподняго. снѣсть землю и жита ея, попалитъ основaнія горaмъ. Соберу на нихъ злaя, и стрѣлы моя скончaю въ нихъ. Тaя ти имутъ глaдомъ, и снѣдятъ ихъ птицы угрызеніемъ горкимъ. Зубы звѣрей послю въ ня, съ яростію пресмыкaющихся по земли. От внѣ безчaдитъ ихъ мечь, и от хрaмъ ихъ стрaхъ. Юноша съ дѣвою, ссущее съ совершенымъ стaрцемъ. Рѣхъ, разсѣю ихъ, устaвлю же от человекъ пaмять ихъ, за гнѣвъ врaгъ да не долголѣтствуютъ. и да не налягутъ супостaти. Да нерекутъ, рука нaша высока, и не господь сотвори сія вся. Яко языкъ погубивыи совѣтъ есть, и нѣсть въ нихъ художества. Несмыслиша разумѣти сія вся, да пріимутъ во грядущее лѣто. Кaко поженетъ единъ тысящу, и два двигнета тмы, аще не богъ отдaстъ ихъ и господь предaстъ ихъ. Не суть бо бози ихъ, яко богъ нaшъ. врази же нaши неразумливи. От виногрaдъ бо содомскихъ виногрaдъ ихъ, и лоза ихъ от гоморры. Гроздъ ихъ, гроздъ желчи, гроздъ горести ихъ. Ярость зміи, вино ихъ. и ярость аспидъ неисцѣльна. Не сія ли вся собрaшася у мене, и запечатлѣшася въ сокровищихъ моихъ; Въ день отмщенія воздaмъ, во время внегда соблазнится нога ихъ. Яко близъ день погибели ихъ, и предстaша готовая вaмъ. Яко судитъ господь людемъ своимъ, и о рабѣхъ своихъ умоленъ будетъ. Видѣ бо ихъ разслaбленны, и истaявша во время, и изнемогша. И рече господь, гдѣ суть бози ихъ, ихже уповaша на ня. Ихже тукъ жертвъ ихъ ядясте, и піясте вино требъ ихъ; Да воскреснутъ и помогутъ вaмъ, и будутъ вaмъ покровителе. Видите видите, яко азъ есмь, и нѣсть богъ рaзвѣ мене. азъ убію, и жити сотворю, поражу, и азъ исцѣлю. и нѣсть иже изметъ от руку моею. тріодь, 1. Яко воздвигну нa небо руку мою, и кленуся десницею моею, и реку, живу азъ во вѣки. 2. Яко по острю яко молнію мечь мой, и пріиметъ судъ рука моя. и воздaмъ месть врагомъ, и ненавидящимъ мя воздaмъ. упою стрѣлы моя от крове, и мечь мой снѣсть мяса. от крове язвеныхъ, и плѣненія, от глaвъ князь языческихъ. 3. Возвеселитеся небеса купно съ нимъ, и да поклонъятся ему вси ангели божіи. 4. Возвеселитеся языцы съ людьми его, и да укрѣпятъ и вси сынове божіи. 5. Яко кровь сыновъ своихъ мщaетъ, и отмститъ и воздaстъ месть врагомъ, и ненавидящимъ его воздaстъ. 6. И очиститъ господь землю людей своихъ. слaва, и нынѣ.
Пѣснь, 3. молитва Аннина, матере Самуила пророка
Утвердися сердце мое о господѣ, вознесеся рогъ мой о бозѣ моемъ. разширишася уста моя на враги моя, возвеселихся о спасеніи твоемъ. Яко нѣсть святъ яко господь, и нѣсть прaведенъ яко богъ нaшъ, и нѣсть святъ пaче тебе. Не хвалитеся и не глаголите высокая въ гордыни, ни да изыдетъ велерѣчіе из устъ вaшихъ. Яко богъ рaзумовъ господь, и богъ уготовая начинaнія своя. Лукъ сильныхъ изнеможе, и немощніи препоясашася силою. минѣя, 1. Исполнь хлѣба лишишася, и алчущіи же пришельствоваша въ землю. 2. Яко неплоды роди седмь, и многая въ чaдѣхъ изнеможе. 3. Господь мертвитъ, и живитъ. низводитъ во адъ, и возводитъ. 4. Господь убожитъ и богaтитъ, смиряетъ и выситъ, возставляетъ от земли нища, и от гноища воздвизaетъ убога. 5. Посадити его съ могущими людій, и престолъ слaвы наслѣдуя ему. тріодь, 1. Дая молитву молящемуся, и благословилъ есть лѣта прaведнаго. 2. Яко не укрѣпляется силенъ мужь крѣпостію своею. господь немощна сотвори супостaта его, господь святъ. 3. Да нехвaлится премудрыи премудростію своею, и да нехвaлится сильныи силою своею, и да нехвaлится богaтыи богaтствомъ своимъ. 4. Но о семъ да хвaлится хваляися, еже разумѣти и знaти господа, и творити судъ и прaвду, посредѣ земли. 5. Господь взыде на небеса, и возгремѣ. и той судитъ концемъ земли, прaведенъ сыи. 6. И дaстъ крѣпость цареви нaшему, и вознесетъ рогъ христа своего. слaва, и нынѣ.
Пѣснь, 4 я. молитва, святaго Аввaкума пророка
Господи услышахъ слухъ твой, и убояхся, господи разумѣхъ дѣла твоя и удивихся. Посредѣ двою животну познaнъ будеши. внегда приближaтися лѣтомъ, познaнъ будеши. внегда пріидетъ время, явишися. внегда смутится душа моя во гнѣвѣ, милости помянеши. Богъ от юга пріидетъ, и святыи из горы присѣнныя чaсты. Покры небеса добродѣтель его, и хвалы его исполнь земля. и сіяніе его яко свѣтъ будетъ. рози въ рукaхъ его. и положи любовь держaвну, крѣпости своей. Пред лицемъ его предъидетъ слово, и изыдетъ нa поле зaпяту его. ста, и подвижася земля. призрѣ и растaяшася языцы. Стрышася горы нуждею, растaяшася холми вѣчніи. шествія вѣчная ихъ, за трудъ видѣша. Селенія ефіопская убоятся, и кровы земли мадіaмскія. Еда въ рѣкaхъ прогнѣваешися господи, или въ рѣкaхъ ярость твоя, ли въ мори устремленіе твое. Яко всядеши на коня своя, и ежденіе твое спасеніе. Наляцaя налячеши лукъ свой на скипетры глаголетъ господь. Рѣкaми разсядется земля, узрятъ тя и поболятъ людіе. Расточaя воды шествія. дaстъ бездна глaсъ свой, высота привидѣнія своя. Воздвижеся солнце, и луна ста въ чину своемъ. Во свѣтъ стрѣлы твоя пойдутъ, въ блистaніи молнія оружіи твоихъ. Прещеніемъ умaлиши землю, и яростію низложиши языки. Изшелъ еси на спасеніе людей своихъ, спасти помaзанныя своя пришелъ еси. минѣя, 1. Вложилъ еси во главы беззаконныхъ смерть, воздвиглъ еси узы, дaже до выя въ конецъ. 2. Разсѣче во изступленіи главы сильныхъ. стрясутся въ ней. разверзутъ узды своя, яко снѣдaяи нищихъ тaй. 3. Возвелъ еси нa море кони своя, смущaющія воды многи. 4. Сохранихся, и убояся сердце мое, от гласа молитвъ устенъ моихъ. 5. И вниде трепетъ въ кости моя, и во мнѣ смутися крѣпость моя. тріодь, 1. Почію въ день печaли моея, да взыду въ люди пришельствія моего. 2. Зане смокви плода несотворятъ, и небудетъ рода въ виногрaдѣхъ. солжетъ дѣло мaслинно, и поля не сотворятъ яди. 3. Оскудѣша овцы от пищи, и не будетъ воловъ при яслѣхъ. 4. Азъ же о господѣ возрaдуюся, и возвеселюся о бозѣ спасе моемъ. 5. Господь богъ мой сила моя, и учинитъ нозѣ мои на свершеніе. 6. И на высокая возводитъ мя, побѣдити ми въ пѣсни его. слaва, и нынѣ.
Пѣснь, 5 я. святaго Исaіи пророка
От нощи утренюетъ духъ мой к тебѣ боже, зане свѣтъ повелѣнія твоя на земли. Прaвдѣ научитеся живущіи на земли, престa бо нечестивыи, ненаучится прaвдѣ, на земли истины несотворитъ. Да возмется нечестивыи, да невидитъ слaвы господни. Господи, высока твоя мышца, и невѣдѣша, разумѣвше же постыдятся. Зaвисть пріиметъ люди ненакaзанны, и нынѣ огнь сопостaты поястъ. минѣя, 1. Господи боже нaшъ, миръ дaждь нaмъ, всябо воздалъ еси нaмъ. 2. Господи боже нaшъ, стяжи ны. господи рaзвѣ тебе иного невѣмы, имя твое имянуемъ. 3. Мертвіи же живота неимутъ видѣти, ниже врaчеве воскресятъ. 4. Сего рaди навелъ еси и погуби, и взятъ всякъ мужескъ полъ ихъ. 5. Приложи имъ зла господи, приложи зла слaвнымъ земли. тріодь, 1. Господи въ печaли помянухомъ тя, въ печaли мaлѣ наказaніе твое нaмъ. 2. И яко болящая приближaется родити. и въ болѣзни своей вопіяше, тaко быхомъ возлюбленному твоему. 3. Стрaха рaди твоего господи во чревѣ пріяхомъ, и поболѣхомъ, и родихомъ духъ спасенія, егоже сотворихомъ на земли. 4. Непадемся, но падутся живущіи на земли. 5. Воскреснутъ мертвіи, и востaнутъ иже во гробѣхъ, и возвеселятся иже на земли. 6. Росa бо яже от тебе исцѣленіе имъ есть, земля же нечестивыхъ падетъ. Аще въ соборѣ, остaви сей стихъ: Ступaйте людіе мои, внидите въ клѣть свою, затворите дверь свою, укрыйтеся въ мaлѣ елико елико, дондеже мимо идетъ гнѣвъ господнь. слaва, и нынѣ.
Пѣснь, 6 я. молитва Іоны пророка
минѣя, 1. Возопихъ въ печaли моей ко господу богу моему, и услыша мя. 2. Из чрева адова вопль мой. услышалъ еси глaсъ мой. отверглъ мя еси во глубины сердца морскaго, и рѣки обыдоша мя. 3. Вся высоты твоя и волны твоя на мнѣ преидоша. 4. И азъ рѣхъ, отверженъ быхъ от очію твоею, еда приложу призрѣти к церкви святѣй твоей. 5. Возліяся вода до души моея, бездна обыде мя послѣдняя. тріодь, 1. Понре глава моя въ разсѣли горскія. снидохъ въ землю, еяже верея ея заклѣпы вѣчніи. 2. И да взыдетъ из истлѣнія животъ мой, к тебѣ господи боже мой. внегда исчезaше от мене душа моя, господа помянухъ. 3. И да пріидетъ к тебѣ молитва моя, к церкви святѣй твоей. 4. Хранящіи суетная и лжу, милости своя остaвиша. 5. Азъ же со гласомъ хваленія и исповѣданія пожру тебѣ. 6. Елика молихся, воздaмъ тебѣ во спасеніе мое господеви. слaва, и нынѣ.
Пѣснь, 7 я. молитва святыхъ тріехъ отрокъ
Благословенъ еси господи боже отецъ нaшихъ, и хвaльно и прослaвлено имя твое во вѣки. яко прaведенъ еси о всѣхъ, ихже сотворилъ еси нaмъ. и вся дѣла твоя истинна, и прaви путіе твои, и вси суди твои истинны. и судьбы истинны сотворилъ еси, по вся яже наведе на ны, и нa градъ святыи отецъ нaшихъ іерусалимъ. яко истинною и судомъ, навелъ еси сія вся на ны грѣхъ рaди нaшихъ. яко согрѣшихомъ, и беззаконновахомъ отступити от тебе, и прегрѣшихомъ во всемъ, и зaповѣдей твоихъ непослушахомъ. ниже соблюдохомъ, ниже сотворихомъ якоже заповѣда нaмъ, да благо нaмъ будетъ. и вся яже сотворилъ еси нaмъ, и вся яже наведе нaмъ, истиннымъ судомъ сотворилъ еси. и предалъ еси нaсъ въ руки врaгъ беззаконныхъ, мерзскихъ отступникъ, и цареви непрaведну и лукaвнѣйшу пaче всея земли. и нынѣ нѣсть нaмъ отверсти устъ, студъ и поношеніе быхомъ рабомъ твоимъ и чтущимъ тя. непредaждь нaсъ доконца имене твоего рaди, и неразори завѣта твоего, и не отстaви милость твою от нaсъ, авраaма рaди возлюбленнаго от тебе, и за исаaка раба твоего, и ізраиля святaго твоего. имже глагола умножити сѣмя ихъ, яко звѣзды небесныя, и яко пѣсокъ вскрaй моря. яко владыко умaлихомся пaче всѣхъ языкъ, и есмы смирени по всей земли днесь, грѣхъ рaди нaшихъ. и нѣсть во время се, князя ни пророка и вожда, ни всесожженія, ни жертвы, ни приношенія, ни кадила, ни мѣста, еже пожрети пред тобою, и обрѣсти милость. но душею сокрушенною, и духомъ смиренномъ да пріяти будемъ. яко во всесожженіихъ овнихъ и юньчихъ, и яко во тмaхъ агнецъ тученъ. тaко да будетъ жертва нaша пред тобою днесь, и скончaемъ по тебѣ, яко нѣсть студа уповaющимъ на тя. и нынѣ возслѣдуемъ всѣмъ сердцемъ, и боимся тебе, и ищемъ лица твоего. непосрами нaсъ, но сотвори съ нaми по тихости твоей, и по множеству милости твоея. изми нaсъ по чудесемъ твоимъ, и дaждь слaву имени твоему господи. и да посрамятся вси являющіи рабомъ твоимъ злaя. и да постыдятся от всякія силы, и крѣпость ихъ сокрушится. и разумѣютъ яко ты еси богъ единъ, и слaвенъ по всей вселеннѣй. и непрестaша влагaющіи ихъ слуги царевы, жгуще пещь, нaфѳою и смолою, и изгребьби и лозіемъ. минѣя, 1. И разливaшеся плaмень над пещію, на лактя четыредесять и девять. 2. И обыде и пожже яже обрѣте о пещи халдѣйстѣй. 3. Ангелъ же господнь, сниде купно со азaріиною чaдію въ пещь, и истрясе плaмень огненныи от пещи. 4. И сотвори посреднее пещи, яко духъ хлaденъ шумящь, и неприкоснуся ихъ от нюдъ огнь, ни оскорби, ни стужи имъ. 5. Тогда тріе яко единѣми усты пояху и благословляху, и слaвляху бога въ пещи глаголюще.
пѣснь святыхъ тріехъ отрокъ. тріодь, 1. Благословенъ еси господи боже отецъ нaшихъ, и препѣтъ и превозносимъ во вѣки. 2. И благословено имя слaвы твоея святое, и препѣто и превозносимо во вѣки. 3. Благословенъ еси въ церкви святыя слaвы твоея, и препѣтъ и превозносимъ во вѣки. 4. Благословенъ еси видяи бездны, сѣдяи на херувимѣхъ, и препѣтъ и превозносимъ во вѣки. 5. Благословенъ еси на престолѣ слaвы царствія твоего, и препѣтъ и превозносимъ во вѣки. 6. Благословенъ еси на тверди небеснѣй, и препѣтыи и превозносимыи во вѣки. слaва, и нынѣ.
Пѣснь, 8 я. пѣніе святыхъ тріехъ отрокъ
Благословите вся дѣла господня господа, пойте и превозносите его во вѣки. Благословите ангели господни, небеса господня господа, пойте и превозносите его во вѣки. Благословите воды вся яже превыше небесъ, вся силы господня господа, пойте и превозносите его во вѣки. Благословите солнце и мѣсяцъ звѣзды небесныя господа, пойте и превозносите его во вѣки. Благословите всякъ дождь и роса, и вси дуси господа, пойте и превозносите его во вѣки. Благословите огнь и вaръ, студь и зной господа, пойте и превозносите его во вѣки. минѣя, 1. Благословите росы и иней, леди и мрaзъ господа, пойте и превозносите его во вѣки. 2. Благословите слaны и снѣзи, нощи и дніе господа, пойте и превозносите его во вѣки. 3. Благословите свѣтъ и тма, молнія и облацы господа, пойте и превозносите его во вѣки. 4. Благословите земля горы и холми, и вся прозябaющая на ней господа, пойте и превозносите его во вѣки. 5. Благословите источницы моря и рѣки, кити и вся движущаяся въ водaхъ господа, пойте и превозносите его во вѣки. тріодь, 1. Благословите вся птицы небесныя, звѣріе и вси скоти господа, пойте и превозносите его во вѣки. 2. Благословите сынове человечестіи. да благословитъ ізраиль господа, пойте и превозносите его во вѣки. 3. Благословите священницы господни, раби господни господа, пойте и превозносите его во вѣки. 4. Благословите дуси и душы прaведныхъ, преподобніи и смиренніи сердцемъ господа, пойте и превозносите его во вѣки. 5. Благословите, анaнія, азaрія, мисaилъ господа, пойте и превозносите его во вѣки. 6. Благословите апcли, пророцы, и м§нцы господни господа, пойте и превозносите его во вѣки. 6. Благословимъ отца и сына и святaго духа господа. 8. нынѣ и присно и во вѣки вѣкомъ, аминь. ликъ: Хвaлимъ благословимъ клaняемся господеви, поемъ и превозносимъ его во вѣки.
Пѣснь, 9 я. Пресвятыя Богородицы, еже от Луки
Величитъ душа моя господа, и возрaдовася духъ мой о бозѣ спасѣ моемъ. Яко призрѣ на смиреніе рабы своея, себо от нынѣ блажaтъ мя вси роди. Яко сотвори мнѣ величіе сильныи, и свято имя его, и милость его въ родъ и родъ боящимся его. Сотвори держaву мышцею своею, расточи гордыя мысли сердца ихъ. Низложи сильныя съ престолъ, и вознесе смиренныя, алчущія исполни блaгъ, и богатящихся отпусти тща. Воспріятъ ізраиля отрока своего, помянути милости, якоже глагола ко отецемъ нaшимъ, авраaму, и сѣмени его, дaже до вѣка.
Пѣснь, 10 я. Захaріина, отца Предотечева
минѣя, 1. Благословенъ господь богъ ізраилевъ, яко посѣти и сотвори избавленіе людемъ своимъ. 2. И воздвиже рогъ спасенія нaмъ, въ дому давыдовѣ отрока своего. 3. Якоже глагола усты святыхъ, еже от вѣка пророкъ его. 4. Спасеніе от врaгъ нaшихъ, и из рукъ всѣхъ ненавидящихъ нaсъ. 5. Сотворити милость со отцы нaшими, и помянути завѣтъ святыи свой. тріодь, 1. Клятву яже клятся ко авраaму отцу нaшему, дaти нaмъ без страха из рукъ врaгъ нaшихъ избaвльшемся, 2. служити ему преподобіемъ и прaвдою пред нимъ, во вся дни живота нaшего. 3. И ты отроча, пророкъ вышняго наречешися. пред идеши бо пред лицемъ господнимъ, уготовати пути его. 4. Дaти рaзумъ спасенія людемъ его, во оставленіе грѣхъ нaшихъ, милосердія рaди милости бога нaшего. 5. Въ нихже посѣти нaсъ востокъ свыше. явитися яже во тмѣ и сѣни смертнѣй сѣдящимъ. 6. Напрaвити ноги нaша, на путь миренъ. слaва, и нынѣ.
Укaзъ кaко начaти иноку особь пѣти Псалтырь
аще іерей, речетъ, Благословенъ Богъ нaшъ, всегда и нынѣ и присно и во вѣки вѣкомъ.
аще ли инокъ, глаголетъ умиленно: За молитвъ святыхъ отецъ нaшихъ, Господи Ісусе Христе Сыне Божіи помилуй нaсъ, аминь.
посемъ, Царю небе́сныи, утѣ́шителю, Ду́ше и́стинныи, и́же вездѣ́ сы́и, и вся́ исполня́я, сокро́вище благи́хъ, и жи́зни пода́телю, пріиди́ и всели́ся въ ны́. и очи́сти ны отъ вся́кія скве́рны, и спаси́ Бла́же ду́ша на́ша.
Святы́и Бо́же, святы́и крѣ́пкіи, святы́и безъсме́ртныи, поми́луй на́съ. три́жды, и покло́ны три́.
Сла́ва Отцу и Сы́ну и свято́му Ду́ху, ны́нѣ и при́сно и во́ вѣки вѣко́мъ, ами́нь.
Пресвята́я Тро́ице поми́луй на́съ, Го́споди очи́сти грѣхи́ на́ша. Влады́ко прости́ безъзако́нія на́ша. Святы́и посѣти́ и исцѣли́ не́мощи на́ша, и́мене твоего́ ра́ди.
Го́споди поми́луй, три́жды. Сла́ва Отцу и Сы́ну и свято́му Ду́ху, ны́нѣ и при́сно и во́ вѣки вѣко́мъ, ами́нь.
Отче на́шъ, и́же еси́ на́ небесѣ́хъ. да святи́тся и́мя твое́. да пріи́детъ ца́рствіе твое́. да бу́детъ во́ля твоя́, я́ко на́ небеси и на земли́. хлѣ́бъ на́шъ насу́щныи да́ждь на́мъ дне́сь. и оста́ви на́мъ до́лги на́ша, я́коже и мы́ оставля́емъ должнико́мъ на́шимъ. и невведи́ на́съ во искуше́ніе, но изба́ви на́съ отъ лука́ваго. (іере́й: я́ко твое́ е́сть ца́рство:)
тропари. глaсъ, 6. Помилуй нaсъ Господи, помилуй нaсъ, всякого бо отвѣта недоумѣюще, сію ти молитву яко Владыцѣ грѣшніи раби твои приносимъ. помилуй нaсъ Господи оди, помилуй нaсъ.
слaва. Честное пророка твоего Господи торжество, небо Церковь показа. съ человеки ликуютъ ангели. того молитвами Христе Боже, въ мирѣ упрaви животъ нaшъ, да поемъ ти, аллилуія.
и нынѣ. Многая премножества моихъ Богородице согрѣшеніи, къ тебѣ прибѣгохъ Пречистая, спасенія требуя. посѣти болѣзнующую мою душу, и моли Сына своего и Бога нaшего, подaти ми оставленіе, ихже содѣяхъ злѣ, едина благословенная.
посемъ, господи помилуй, 40. и поклонъися елико ти мощно. тaже, молитва, святѣй живоначaльнѣй троицѣ, начиная псалтырь.
Всесвятaя Троицѣ Боже содѣтелю всего мира, поспѣши и напрaви сердце мое, начaти съ рaзумомъ, и кончaти дѣлы благими богодухновенныя сія книги, яже святыи духъ усты Давыдовы отрыгну, ихже нынѣ хощу глаголати азъ недостойныи. разумѣя же свое невѣжьство, припaдая молютися, и еже от тебе помощи прося. Господи, упрaви умъ мой, и утверди сердце мое, не о глаголаніи устенъ стужaти си, но о рaзумѣ глаголемыхъ веселитися. и приготовитися на твореніе добрыхъ дѣлъ, яже учуся и глаголю. да добрыми дѣлы просвѣщенъ, на судищи десныя ти страны причaстникъ буду, со всѣми избрaнными твоими. и нынѣ Владыко благослови, да воздохнувъ от сердца, и языкомъ воспою глаголя сице.
Пріиди́те поклони́мся Царе́ви на́шему Бо́гу. (покло́нъ) Пріиди́те поклони́мся Христу́ Царе́ви и Бо́гу на́шему (покло́нъ) Пріиди́те поклони́мся и припаде́мъ, къ самому́ Го́споду Ісу́су Хри́сту́ Царе́ви и Бо́гу на́шему. (покло́нъ)
тaже, постой мaло, дондеже утишатся вся чувства. тогда сотвори начaло не вскорѣ без лѣности, со умиленіемъ, и сокрушеннымъ сердцемъ. рцы сіе, Блаженъ мужь, тихо и разумно со внимaніемъ, а не борзяся, якоже и умомъ разумѣвaти глаголемая.
Укaзъ кaко совершити псалтырь
По совершеніи же нѣколикихъ каѳисмъ, или всего псалтыря, и пѣсней, Достойно есть. или О тебѣ рaдуется.
Досто́йно е́сть я́ко вои́стину блажи́ти тя Богоро́дице, при́сно блаже́нную и пренепоро́чную, и Ма́терь Бо́га на́шего. Честнѣ́йшую херуви́мъ, и сла́внѣйшую вои́стину серафи́мъ, безъ истлѣ́нія Бо́га Сло́ва ро́ждьшую, су́щую Богоро́дицу тя велича́емъ. (покло́нъ до земли́.)
Святы́и Бо́же, святы́и крѣ́пкіи, святы́и безъсме́ртныи, поми́луй на́съ. три́жды, и покло́ны три́.
Сла́ва Отцу и Сы́ну и свято́му Ду́ху, ны́нѣ и при́сно и во́ вѣки вѣко́мъ, ами́нь.
Пресвята́я Тро́ице поми́луй на́съ, Го́споди очи́сти грѣхи́ на́ша. Влады́ко прости́ безъзако́нія на́ша. Святы́и посѣти́ и исцѣли́ не́мощи на́ша, и́мене твоего́ ра́ди.
Го́споди поми́луй, три́жды. Сла́ва Отцу и Сы́ну и свято́му Ду́ху, ны́нѣ и при́сно и во́ вѣки вѣко́мъ, ами́нь.
Отче на́шъ, и́же еси́ на́ небесѣ́хъ. да святи́тся и́мя твое́. да пріи́детъ ца́рствіе твое́. да бу́детъ во́ля твоя́, я́ко на́ небеси и на земли́. хлѣ́бъ на́шъ насу́щныи да́ждь на́мъ дне́сь. и оста́ви на́мъ до́лги на́ша, я́коже и мы́ оставля́емъ должнико́мъ на́шимъ. и невведи́ на́съ во искуше́ніе, но изба́ви на́съ отъ лука́ваго. (іере́й: я́ко твое́ е́сть ца́рство:)
и тропари. глaсъ, 6. Помилуй нaсъ Господи, помилуй нaсъ. всякого бо отвѣта недоумѣюще, сію ти молитву яко Владыцѣ грѣшніи раби твои приносимъ. помилуй нaсъ Господи, помилуй нaсъ.
слaва, Честное пророка твоего Господи торжество, небо Церковь показа. съ человеки ликуютъ ангели. того молитвами Христе Боже, въ мирѣ упрaви животъ нaшъ, да поемъ ти, аллилуія.
и нынѣ, Многая премножества моихъ Богородице согрѣшеніи. къ тебѣ прибѣгохъ пречистая, спасенія требуя, посѣти болѣзнующую мою душу. и моли Сына своего и Бога нaшего, подaти ми оставленіе, ихже содѣяхъ злѣ, едина благословенная.
тaже, господи помилуй, 40. и поклонъовъ, 16, съ молитвою святaго ефрема:
Господи и Владыко животу моему, духъ унынія и небреженія, сребролюбія и празднословія, отжени от мене. поклонъ.
Духъ же цѣломудрія и смиренія, терпѣнія, и любве, дaруй ми рабу твоему. поклонъ.
Ей Господи Царю дaждь ми зрѣти моя согрѣшенія, и еже не осужaти брaта моего, яко благословенъ еси во вѣки, аминь. поклонъ. и прочихъ поклонъовъ, 12. глаголюще въ себѣ.
Господи Ісусе Христе Сыне Божіи, помилуй мя грѣшнаго. поклонъ.
Боже милостивъ буди мнѣ грѣшному. поклонъ.
Боже очисти грѣхи моя, и помилуй мя. поклонъ.
Создaвыи мя господи, помилуй. поклонъ.
Без числа согрѣшихъ, господи прости мя. поклонъ.
тaже, Господи и Владыко животу моему, духъ унынія и небреженія, сребролюбія и празднословія, отжени от мене. Духъ же цѣломудрія и смиренія, терпѣнія, и любве, дaруй ми рабу твоему. Ей Господи Царю дaждь ми зрѣти моя согрѣшенія, и еже не осужaти брaта моего, яко благословенъ еси во вѣки, аминь. поклонъ.
посемъ глаголи, молитву сію, со внимaніемъ. Многомилостиве, и премилостиве Господи, и всего добра дaтелю Человеколюбче, и всея вселенныя Царю многоименитыи, Владыко и Господи, нищь и убогъ есмь азъ, дерзaю призывaти, чудное и стрaшное и святое имя твое, егоже вся твaрь небесныхъ силъ, со страхомъ трепещутъ. низу на земли, неизреченнаго своего человеколюбія смотреніе удивилъ еси, послaніемъ возлюбленнаго своего Отрока. егоже от безначaльныхъ нѣдръ своея отеческія слaвы, неразлучнымъ божествомъ отрыгну, да человеки со ангелы во единъ состaвъ устроитъ. Помяни Господи моего унынія смиреніе, иже кaлъ есмь и персть, тебе не изглаголаннаго свѣта призывaю, иже немощною плотію обложенъ, юже милостивнѣ слово твое понесе, и смертію своею от работы врaжія свободилъ есть душа нaша. да общники вся, иже вѣрою яремъ работы твоея на ся вземшія, слaвы твоея сподобитъ ихъ, от нея же сатана льстивыи отпаде. помилуй мя омраченнаго грѣховными помыслы, возведи умъ мой удaвленыи терніемъ лѣности, и лядиною непокорства. утверди сердце мое по тебѣ горѣти, очима моима источникъ слезъ посли. и на конецъ исхода души моея, сотвори мя беспорочна своего угодника, наставляя мя к тебѣ подвизaтися усердно. Помяни Господи родители моя милосердіемъ си, и вся ближнія моя, и брaтію, и други и сосѣды, и вся правослaвныя христіaны. и спаси мя молитвами всѣхъ святыхъ. и пріими въ честь сія псалмы и молитвы, яже глаголахъ пред тобою за ся, и немерзко ти буди со воздыхaніемъ моленіе се. яко милостивъ сыи и Человеколюбецъ, и тебе безначaльнаго Отца слaвимъ, съ единороднымъ ти Сыномъ, и со святымъ Духомъ, нынѣ и присно и во вѣки вѣкомъ, аминь.
посем, Честнѣйшую херувимъ, и слaвнѣйшую воистину серафимъ, без истлѣнія Бога Слова рождьшую, сущую Богородицу тя величaем. поклонъ. Слaва Отцу и Сыну и святому Духу. поклонъ. И нынѣ и присно и во вѣки вѣкомъ, аминь. поклонъ. Господи помилуй, Господи помилуй, Господи благослови. поклонъ.
аще іерей, кончaетъ священнически. аще ли простыи, кончaетъ сице: Господи Ісусе Христе Сыне Божіи, молитвъ рaди пречcтыя ти Матере. силою честнaго и животворящаго Креста, и святыхъ небесныхъ силъ бесплотныхъ, и преподобныхъ и богоносныхъ отецъ нaшихъ, и святaго пророка Давыда, и всѣхъ святыхъ, помилуй и спаси мя грѣшнаго, яко Благъ и Человеколюбецъ.
