MARTYROLOGIUM ROMANUM

30 Junii   

Pridie Kalendas Julii. Luna ...     xxv. D

Commemoratio sancti Pauli Apostoli.

Romae sanctae Lucinae, Apostolorum discipulae, quae, de facultatibus suis communicans Sanctorum necessitatibus, Christianos in carcere detentos visitabat, ac sepulturae Martyrum inserviebat; juxta quos et ipsa, in crypta a se constructa, sepulta est.

Item Romae sanctae Aemilianae Martyris.

Ipso die sanctorum Martyrum Caji Presbyteri, et Leonis Subdiaconi.

Alexandriae passio sancti Basilidis, qui, sub Severo Imperatore, cum sanctam Potamioenam Virginem, quam ad supplicium ducebat, ab impudicorum hominum petulantia tutatus esset, religiosi officii mercedem ab ea recepit; nam ipsa, post triduum illi apparens et ejus capiti coronam imponens, non tantum convertit eum ad Christum, sed etiam, brevi agone certantem, suis precibus Martyrem gloriosum effecit.

Lemovicis, in Aquitania, sancti Martialis Episcopi, cum duobus Presbyteris Alpiniano et Austricliniano; quorum vita signis miraculorum admodum effulsit.

In territorio Vivariensi, in Galliis, sancti Ostiani, Presbyteri et Confessoris.

Saanicae, in territorio Vicentino, sancti Theobaldi, Presbyteri et Eremitae, ex Campaniae Gallicae Comitibus; quem Alexander Papa Tertius, ob sanctitatis et miraculorum famam, Sanctorum canoni adjunxit.

Et alibi aliorum plurimorum sanctorum Martyrum et Confessorum, atque sanctarum Virginum. R. Deo gratias.