MARTYROLOGIUM ROMANUM

20 Octobris

Tertiodecimo Kalendas Novembris. Luna ...     v. A

Sancti Joannis Cantii, Presbyteri et Confessoris, qui nono Kalendas Januaiii obdormivit in Domino.

In Aviensi civitate, prope Aquilam, in Vestinis, natalis beati Maximi, Levitae et Martyris; qui, patiendi desiderio, inquirentibus se persecutoribus palam ostendit, et, post responsionis constantiam, equiileo suspensus ac tortus, deinde fustibus caesus, ad ultimum, e sublimi loco praecipitatus, occubuit.

Agenni, in Gallia, sancti Caprasii Martyris, qui, cum rabiem persecutionis declinans lateret in spelunca, tandem, audiens qualiter beata Fides Virgo pro Christo agonizaret, indeque animatus ad tolerantiam passionum, oravit ad Dominum, ut, si eum gloria martyrii dignum judicaret, ex lapide speluncae limpidissima aqua manaret; quod cum Dominus praestitisset, securus ad aream certaminis properavit, et palmam martyrii, sub Maximiano Imperatore, fortiter dimicando promeruit.

Antiochiae sancti Artemii, Ducis Augustalis, qui, sub Constantino Magno praelaris militiae honoribus functus, a Juliano Apostata, quem saevitiae in Christianos arguerat, fustibus caedi, aliisque tormentis affligi, ac demum capite truncari jubetur.

Constantinopoli sancti Andreae Cretensis Monachi, qui ob cultum sacrarum Imaginum, sub Constantino Copronymo, saepius verberatus, tandem, amputato altero pede, reddidit spiritum.

Coloniae Agrippinae passio sanctarum Virginum Marthae et Saulae, cum aliis pluribus.

Apud Nabantiam, in Lusitania, sanctae Irenes, Virginis et Martyris; cujus corpus honorifice sepultum fuit in oppido Scalabi, quod ipsius Sanctae nomine insignitum inde permansit.

Alsontiae, in territorio Rhemensi, sancti Sindulphi, Presbyteri et Confessoris.

Apud Mindam, in Germania, Translatio sancti Feliciani, Episcopi Fulginatis et Martyris; cujus ibi deposita fuit sacrarum pars reliquiarum, quae in Germaniam advectae sunt ex Umbriae civitate Fulgineo, ubi ipse nono Kalendas Februarii passus quondam fuerat.

Lutetiae Parisiorum item Translatio sanctorum Martyrum Georgii Diaconi, et Aurelii, ex urbe Hispaniae Corduba, in qua olim, una cum aliis tribus Sociis, ambo martyrium compleverant sexto Kalendas Augusti.

Et alibi aliorum plurimorum sanctorum Martyrum et Confessorum, atque sanctarum Virginum.  R. Deo gratias.