Ezechiel chapter 15 tag:/www.fsspx-fsipd.lv,2026-04-08:20260408 2026-04-08T10:39:26+03:00 tag:/www.fsspx-fsipd.lv,2026-04-08:20260408 2026-04-08T10:39:26+03:00

И бысть слово Господне ко мне глаголя: сыне человечь, что было бы древо лозное от всех древес гроздных, сущих во древесех дубравных? Аще возмут от него древо, еже сотворити дело? И аще возмут кол от него, еже обесити на нем кий либо сосуд? Разве еже огневи предастся на потребление, летнее очищение его потребляет огнь, и изчезает до конца: еда потребно будет на дело? И еще целу ему сущу не будет на дело, кольми паче аще огнь е попалит до конца, будет ли на дело потом? Сего ради рцы: сице глаголет Господь Бог: якоже лоза виноградная во древех дубравных, юже дах на потребление огневи, тако дам живущыя во Иерусалиме: и дам лице Мое на ня, от огня изыдут, и огнь пояст я: и уведят, яко Аз Господь, егда утвержду лице Мое на них: и дам землю в пагубу, зане впадоша в грех, глаголет Адонаи Господь.

Pro Hereditate Catholica admin@/www.fsspx-fsipd.lv