https://www.fsspx-fsipd.lv/media/com_zefaniabible/images/bible_100.jpg https://www.fsspx-fsipd.lv/uk/knigi/bible-chslav-1757/standard/biblechslav/21-psalmi/25-chapter?ord=040826 https://www.fsspx-fsipd.lv/uk/knigi/bible-chslav-1757/standard/biblechslav/21-psalmi/25-chapter?ord=040826 Zefania Bible uk-ua Pro Hereditate Catholica Psalmi chapter 25 https://www.fsspx-fsipd.lv/uk/knigi/bible-chslav-1757/standard/biblechslav/21-psalmi/25-chapter?ord=040826 https://www.fsspx-fsipd.lv/uk/knigi/bible-chslav-1757/standard/biblechslav/21-psalmi/25-chapter?ord=040826 Wed, 08 Apr 2026 12:55:18 +0300 Суди ми, Господи, яко аз незлобою моею ходих: и на Господа уповая не изнемогу. Искуси мя, Господи, и испытай мя, разжжи утробы моя и сердце мое. Яко милость Твоя пред очима моима есть, и благоугодих во истине Твоей. Не седох с сонмом суетным, и со законопреступными не вниду. Возненавидех церковь лукавнующих, и с нечестивыми не сяду. Умыю в неповинных руце мои, и обыду жертвенник Твой, Господи, еже услышати ми глас хвалы Твоея и поведати вся чудеса Твоя. Господи, возлюбих благолепие дому Твоего и место селения славы Твоея. Да не погубиши с нечестивыми душу мою и с мужи кровей живот мой, ихже в руку беззакония, десница их исполнися мзды. Аз же незлобою моею ходих: избави мя, Господи, и помилуй мя. Нога моя ста на правоте: в церквах благословлю Тя, Господи.