https://www.fsspx-fsipd.lv/media/com_zefaniabible/images/bible_100.jpg https://www.fsspx-fsipd.lv/uk/knigi/bible-chslav-1757/standard/biblechslav/20-job/30-chapter?ord=040826 https://www.fsspx-fsipd.lv/uk/knigi/bible-chslav-1757/standard/biblechslav/20-job/30-chapter?ord=040826 Zefania Bible uk-ua Pro Hereditate Catholica Job chapter 30 https://www.fsspx-fsipd.lv/uk/knigi/bible-chslav-1757/standard/biblechslav/20-job/30-chapter?ord=040826 https://www.fsspx-fsipd.lv/uk/knigi/bible-chslav-1757/standard/biblechslav/20-job/30-chapter?ord=040826 Wed, 08 Apr 2026 21:00:53 +0300 Ныне же поругашамися малейшии: ныне учат мя от части, ихже отцев уничтожах, ихже не вменях достойными псов моих стад. Крепость же рук их во что мне бысть? У них погибаше скончание. В скудости и гладе безплоден: иже бежаху в безводное вчера сотеснение и бедность: иже обхождаху былие в дебрех, имже былие бяше брашно, безчестнии же и похуленнии, скудни всякаго блага, иже и корение древес жваху от глада великаго. Восташа на мя татие, ихже домове беша пещеры каменны: от среды доброгласных возопиют, иже под хврастием дивиим живяху: безумных сынове и безчестных, имя и слава угашена на земли. Ныне же гусли есмь аз им, и мене в притчу имут: возгнушалися же мною отступивше далече, ни лица моего пощадеша от плюновения. Отверз бо тул Свой уязви мя, и узду устам моим наложи. На десную отрасли восташа, нозе свои простроша и путесотвориша на мя стези пагубы своея. Сотрошася стези моя, совлекоша бо ми одежду. Стрелами своими устрели мя: сотвори ми, якоже восхоте: в болезнех скисохся, обращаются же ми скорби. Отиде ми надежда якоже ветр, и якоже облак спасение мое. И ныне на мя излиется душа моя: и одержат мя дние печалей: нощию же кости моя смятошася, жилы же моя разслабеша. Многою крепостию ятся за ризу мою: якоже ожерелие ризы моея объя мя. Вменяеши же мя равна брению, в земли и пепеле часть моя. Возопих же к Тебе, и не услышал мя еси: сташа же и смотриша на мя. Наидоша же на мя без милости, рукою крепкою уязвил мя еси: вчинил же мя еси в болезнех и отвергл еси мя от спасения. Вем бо, яко смерть мя сотрет: дом бо всякому смертну земля. Аще бы возможно было, сам бых себе убил, или молил бых иного, дабы ми то сотворил. Аз же о всяцем немощнем восплакахся, воздохнух же видев мужа в бедах. Аз же ждах благих, и се, сретоша мя паче дние зол. Чрево мое воскипе и не умолчит: предвариша мя дние нищеты. Стеня ходих без обуздания, стоях же в соборе вопия. Брат бых сиринам, друг же птичий. Кожа же моя помрачися вельми, и кости моя сгореша от зноя. Обратишася же в плачь гусли моя, песнь же моя в рыдание мне.