https://www.fsspx-fsipd.lv/media/com_zefaniabible/images/bible_100.jpg https://www.fsspx-fsipd.lv/knigi/bible-chslav-1757/standard/biblechslav/38-michæa/3-chapter?ord=040726 https://www.fsspx-fsipd.lv/knigi/bible-chslav-1757/standard/biblechslav/38-michæa/3-chapter?ord=040726 Zefania Bible lv-lv Pro Hereditate Catholica Michæa chapter 3 https://www.fsspx-fsipd.lv/knigi/bible-chslav-1757/standard/biblechslav/38-michæa/3-chapter?ord=040726 https://www.fsspx-fsipd.lv/knigi/bible-chslav-1757/standard/biblechslav/38-michæa/3-chapter?ord=040726 Tue, 07 Apr 2026 23:29:21 +0300 И речет: слышите убо сия, власти дому Иаковля и оставшии дому Израилева: не вам ли есть еже разумети суд? Ненавидящии добра, а ищущии зла, похищающии кожы их с них и плоти их от костей их: якоже объядоша плоти людий Моих, и кожы их от костей их одраша, и кости их столкоша и содробиша яко плоти в коноб и яко мяса в горнец: тако возопиют ко Господу, и не послушает их и отвратит лице Свое от них в то время, понеже слукавноваша в начинаниих своих на Ня. Сия глаголет Господь на пророки льстящыя людий Моих, угрызающыя зубы своими и проповедающыя мир на них, и не вдася во уста их, возставиша на них рать: сего ради нощь будет вам от видения, и тма будет вам от волхвования, и зайдет солнце на пророки, и померкнет на ня день: и усрамятся видящии сония, и посмеяни будут волсви, и возглаголют на них вси сии, зане не будет послушаяй их. Аще аз не наполню силы Духом Господним и судом и силою, еже возвестити Иакову нечестия его и Израилеви грехи его. Слышите сия, старейшины дому Иаковля и оставшии дому Израилева, гнушающиися судом и вся правая развращающии, созидающии Сиона кровьми и Иерусалима неправдами: старейшины его на дарех суждаху, и жерцы его на мзде отвещаваху, и пророцы его на сребре волхвоваху, и на Господе почиваху, глаголюще: не Господь ли в нас есть? Не приидут на ны злая. Сего ради вас дела Сион якоже нива изорется, и Иерусалим яко овощное хранилище будет, и гора дому якоже луг дубравный.