https://www.fsspx-fsipd.lv/media/com_zefaniabible/images/bible_100.jpg https://www.fsspx-fsipd.lv/knigi/bible-chslav-1757/standard/biblechslav/21-psalmi/61-chapter?ord=041126 https://www.fsspx-fsipd.lv/knigi/bible-chslav-1757/standard/biblechslav/21-psalmi/61-chapter?ord=041126 Zefania Bible lv-lv Pro Hereditate Catholica Psalmi chapter 61 https://www.fsspx-fsipd.lv/knigi/bible-chslav-1757/standard/biblechslav/21-psalmi/61-chapter?ord=041126 https://www.fsspx-fsipd.lv/knigi/bible-chslav-1757/standard/biblechslav/21-psalmi/61-chapter?ord=041126 Sat, 11 Apr 2026 01:45:34 +0300 В конец, о Идифуме, псалом Давиду. Не Богу ли повинется душа моя? От Того бо спасение мое. Ибо Той Бог мой и спас мой, заступник мой: не подвижуся наипаче. Доколе належите на человека? Убиваете вси вы, яко стене преклонене и оплоту возриновену. Обаче цену мою совещаша отринути, текоша в жажди: усты своими благословляху, и сердцем своим кленяху. Обаче Богови повинися, душе моя: яко от Того терпение мое. Ибо Той Бог мой и спас мой, заступник мой: не преселюся. О Бозе спасение мое и слава моя: Бог помощи моея, и упование мое на Бога. Уповайте на Него, весь сонм людий: излияйте пред Ним сердца ваша, яко Бог помощник наш. Обаче суетни сынове человечестии, лживи сынове человечестии в мерилех еже неправдовати: тии от суеты вкупе. Не уповайте на неправду, и на восхищение не желайте: богатство аще течет, не прилагайте сердца. Единою глагола Бог, двоя сия слышах, зане держава Божия, и Твоя, Господи, милость: яко Ты воздаси комуждо по делом его.