Psalmi chapter 56 tag:/www.fsspx-fsipd.lv,2026-04-10:20260410 2026-04-10T16:16:36+03:00 tag:/www.fsspx-fsipd.lv,2026-04-10:20260410 2026-04-10T16:16:36+03:00

В конец, да не растлиши, Давиду в столпописание, внегда ему отбегати от лица Саулова в пещеру. Помилуй мя, Боже, помилуй мя: яко на Тя упова душа моя, и на сень крилу Твоею надеюся, дондеже прейдет беззаконие. Воззову к Богу Вышнему, Богу благодеявшему мне. Посла с небесе и спасе мя, даде в поношение попирающыя мя: посла Бог милость Свою и истину Свою, и избави душу мою от среды скимнов. Поспах смущен: сынове человечестии, зубы их оружия и стрелы, и язык их мечь остр. Вознесися на небеса, Боже, и по всей земли слава Твоя. Сеть уготоваша ногам моим, и слякоша душу мою: ископаша пред лицем моим яму, и впадоша в ню. Готово сердце мое, Боже, готово сердце мое: воспою и пою во славе моей. Востани, слава моя, востани, псалтирю и гусли: востану рано. Исповемся Тебе в людех, Господи, воспою Тебе во языцех: яко возвеличися до небес милость Твоя и даже до облак истина Твоя. Вознесися на небеса, Боже, и по всей земли слава Твоя.

Pro Hereditate Catholica admin@/www.fsspx-fsipd.lv