Библия на церковнославянском (1757)Exodus chapter 1tag:/www.fsspx-fsipd.lv,2026-04-04:202604042026-04-04T17:22:14+03:00Exodus chapter 1tag:/www.fsspx-fsipd.lv,2026-04-04:202604042026-04-04T17:22:14+03:00
Сия имена сынов Израилевых, входящих во Египет вкупе со Иаковом отцем их, кийждо со всем домом своим внидоша:
Рувим, Симеон, Левий, Иуда,
Иссахар, Завулон и Вениамин,
Дан и Неффалим, Гад и Асир: Иосиф же бяше во Египте.
Бяше же всех душ изшедших из Иакова седмьдесят пять.
Умре же Иосиф, и вся братия его, и весь род оный:
сынове же Израилевы возрастоша и умножишася, и мнози быша и укрепишася зело зело: умножи же их земля.
Воста же царь ин во Египте, иже не знаше Иосифа,
рече же языку своему: се, род сынов Израилевых великое множество и укрепляется паче нас:
приидите убо, прехитрим их, да не когда умножатся: и егда аще приключится нам брань, приложатся и сии к супостатом, и одолевше нам изыдут из земли (нашея).
И пристави над ними приставники дел, да озлобят их в делех. И создаша грады тверды фараону: Пифо, и Рамесси, и он, иже есть Илиополь.
По елику же их смиряху, толико множайшии бываху и укрепляхуся зело зело. И гнушахуся Египтяне сынми Израилевыми,
и насилие творяху Египтяне сыном Израилевым нуждею,
и болезненну тем жизнь творяху в делех жестоких брением и плинфоделанием, и всеми делы, яже в полях, во всех делех, имиже порабощаху их с нуждею.
И рече царь Египетский бабам Еврейским: единей их имя Сепфора и имя вторей Фуа,
и рече (им): егда бабите Евреаныням, и суть к рождению, аще убо мужеский пол будет, убивайте его: аще же женский, снабдевайте его.
Убояшася же бабы Бога, и не сотвориша, якоже повеле им царь Египетский, и живляху мужеский пол.
Призва же царь Египетский бабы и рече им: что яко сотвористе вещь сию, и оживляете мужеский пол?
Рекоша же бабы фараону: не яко жены Египтяныни, тако и жены Евреаныни: раждают бо прежде неже внити к ним бабам, и раждаху.
Благо же творяше Бог бабам, и множахуся людие и укрепляхуся зело.
И понеже бояхуся бабы Бога, сотвориша себе жилища.
Заповеда же фараон всем людем своим, глаголя: всяк мужеский пол, иже родится Евреом, в реку ввергайте, и всяк женский пол снабдевайте и жив.
Pro Hereditate Catholicaadmin@/www.fsspx-fsipd.lv