Библия на церковнославянском (1757)Judith chapter 2tag:/www.fsspx-fsipd.lv,2026-04-06:202604062026-04-06T14:22:31+03:00Judith chapter 2tag:/www.fsspx-fsipd.lv,2026-04-06:202604062026-04-06T14:22:31+03:00
И в лето осмоенадесять, и в двадесять вторый (день) перваго месяца, бысть слово в дому Навуходоносора царя Ассирийска, отмстити всяцей земли, якоже глаголаше.
И созва вся служители своя и вся вельможы своя, и сообщи с ними тайну совета своего, и соверши всю злобу земли от яст своих:
и тии судиша истребити всяку плоть, иже не последоваша словеси уст его.
И бысть, егда соверши совет свой, призва Навуходоносор царь Ассирийский Олоферна вождоначалника силы своея, втораго суща по нем, и рече к нему:
сия глаголет царь великий, господин всея земли: се, ты изыдеши от лица моего и возмеши с собою мужей уповающих в крепости своей, пешцев до тысящей сто двадесять, и множество коней со всадниками тысящей дванадесять,
и изыдеши бо сретение всей земли на запады, яко не повинушася глаголу уст моих:
и возвестиши им уготовляти землю и воду, яко изыду в ярости моей на них, и покрыю все лице земли ногами силы моея, и дам их в расхищение им:
и язвеннии их исполнят дебри и потоки их, и река наводняющаяся мертвыми их наполнится:
и приведу плен их до конец всея земли:
ты же изшед приодержиши мне всяк предел их, и отдадут тебе самих себе, и соблюдеши ми их на день обличения их:
непокаряющихся же не пощадит око твое, еже дати их на убиение и расхищение во всей земли твоей:
яко жив аз, и держава царства моего: глаголах и сотворю сия рукою моею:
ты же да не преступиши единаго коего от глагол господина твоего, но совершая да совершиши, якоже заповедах тебе, и да не укосниши сотворити сия.
И изыде Олоферн от лица господина своего, и созва вся вельможы и воеводы и началники силы Ассурския,
и изчисли избранных мужей на ополчение, якоже заповеда ему господин его, до дванадесять тем, и конников стрелцев дванадесять тысящей,
и устрои их, имже образом брани множество устроевается:
и взя велблюды и ослы и мски припасов ради своих множество много зело, и овцы и волы и козлы на уготование их, имже не бе числа,
и пищи всякому мужу во множестве, и злата и сребра из дому царева много зело:
и изыде сам и вся сила его в путь, еже предити царю Навуходоносору и покрыти все лице земли к западом колесницами и конницами и пешцами избранными своими:
и многое примешение яко прузи изыдоша с ними и яко песок земли, не бо бе числа от множества их.
И изыдоша из Ниневии путем триех дний на лице поля Вектилеф, и ополчишися от Вектилефа близ горы сущия ошуюю вышния Киликии.
И поя всю силу свою, пешцы и конники и колесницы своя, и отиде оттуду в горнюю,
и изсече Фуда и Луда, и поплени всех сынов Рассиса и сынов Исмаилевых сущих по лицу пустыни Хеллеонския к югу.
И прейде Евфрат, и пройде Месопотамию, и раскопа вся грады высокия сущыя при потоце Авроне, дондеже приити к морю:
и объят пределы Киликийския, и посече всех противостоящих себе: и прииде даже до предел Иафефовых, сущих к югу на лицы Аравии,
и обыде всех сынов Мадиамлих, и пожже селения их и плени стада их:
и сниде на поле Дамасково во днех жатвы пшениц, и пожже вся нивы их, а овчия и воловыя стада даде в погубление, и грады их поплени, и поля их опустоши, и порази вся юношы их острием меча.
И нападе страх и трепет его на всех живущих в примории, сущих в Сидоне и Тире и обитающих в Суре и Окине и на всех живущих во Иемнаане. И живущии во Азоте и Аскалоне убояшася его зело.
Pro Hereditate Catholicaadmin@/www.fsspx-fsipd.lv